ەلباسى نۇرسۇلتان ءابىش ۇلى نازارباەۆ ۇلى دالا ەلىنە «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى كەزەكتى جولداۋىن جاريا ەتتى. مەملەكەت باسشىسى قاي كەزدە دە قازاقستاندىقتاردى الەۋمەتتىك تۇرعىدان قولداۋدى باستى نازاردا ۇستاپ كەلەدى. بۇل جولعى جولداۋدا دا مەملەكەتتى نىعايتۋدا الەۋمەتتىك-ەكونوميكالىق دامۋدىڭ ماڭىزدى باسىمدىلىقتارىن جاڭعىرتىپ, جانداندىرۋ اسا قاجەت ەكەنىن باسا ايتتى.
حالىقتىڭ الەۋمەتتىك جاعدايىن جاقسارتۋ جولدارى ۇسىنىلدى. پرەزيدەنت ءىجو-ءنىڭ 10%-ءىن ءبىلىم, عىلىم جانە دەنساۋلىق ساقتاۋ سالاسىنا باعىتتاپ, بۇرىن-سوڭدى بولماعان شەشىم قابىلدادى. ايتۋلى جولداۋ الەۋمەتتىك باستامالاردى جۇزەگە اسىرۋدا «الەۋمەتتىك مەملەكەت پەن ۇلتتىق ءال-اۋقاتتىڭ قازاقستاندىق ۇلگىسىن» قۇرۋ يدەياسىن ءارى قاراي دامىتۋعا جول اشادى.
بۇگىندە جاستارعا عالامدىق ولشەممەن ءبىلىم بەرۋ ماسەلەلەرى ستراتەگيالىق ماڭىزعا يە. ەڭبەك نارىعىن قانىقتىرا وتىرىپ, ونىڭ باسەكەگە قابىلەتتىلىگىن قامتاماسىز ەتۋ دە اسا ماڭىزدى. ەلباسىنىڭ پىكىرىنشە, ەكسپورتقا باعىتتالعان يندۋستريالاندىرۋ ەكونوميكالىق ساياساتتىڭ باستى ەلەمەنتى بولۋى كەرەك. وسى ستراتەگيانى ىسكە اسىرۋ ءۇشىن ەكونوميكانىڭ ءارتۇرلى سەكتورلارىنا جان-جاقتى ءبىلىم العان, كەلەشەكتى كەڭىنەن ويلايتىن, وتانسۇيگىشتىك قاسيەتكە يە جالىندى جاستاردى تارتۋ اسا قاجەت.
مەملەكەت باسشىسى بالامالى ەنەرگەتيكا, بيومەديتسينا, اۋىل شارۋاشىلىعى, IT-تەحنولوگيالار سالاسىنداعى عىلىمي زەرتتەۋلەردى جانداندىرۋ ارقىلى ەكونوميكانىڭ يننوۆاتسيالىق الەۋەتىن دامىتۋدىڭ ماڭىزدىلىعىن تۇسىنە وتىرىپ, وسى ماقساتقا قوسىمشا 100 ملرد. تەڭگە ءبولدى. بۇل جوعارى وقۋ ورىندارىنىڭ عىلىمى ءۇشىن قولدانبالى زەرتتەۋلەردى كەڭەيتىپ, ولاردىڭ ناتيجەلەرىن ەكونوميكادا سىناقتان وتكىزىپ, جۇزەگە اسىرۋعا زور مۇمكىندىك تۋعىزادى.
ەلباسى ۇكىمەتكە حالىق دەنساۋلىعىن جاقسارتۋ ماقساتىنداعى كەزەك كۇتتىرمەيتىن ماسەلەلەردىڭ وڭ شەشىم تابۋىن تاپسىردى. سالاماتتى ءومىر سالتىن قالىپتاستىرۋ – دەنساۋلىق كەپىلى. وسى تۇرعىدا مەملەكەت باسشىسى قازاقستاندىق وقۋشىلاردىڭ قوعام ءۇشىن ماڭىزدى دەنساۋلىعىنا, قابىلەتتەرىنە جانە بولاشاعىنا مۇقيات قاراۋ تۋرالى ءوز ويىن ءبىلدىردى. ءار بالانىڭ جۇرەگىنە جول تابۋ ارقىلى, ولاردىڭ ءبىلىم الۋىنا جاعداي تۋعىزۋ ارقىلى جاس وسكىننىڭ الەۋەتىن اشۋعا بولادى. پرەزيدەنتىمىز قاي كەزدە دە ۇستازدار قاۋىمىنا قولداۋ تانىتىپ كەلەدى, وسى جولداۋدا دا مۇعالىمدەردىڭ كاسىبي تۇرعىدان شىڭدالۋىنا باسا نازار اۋداردى. الداعى ۋاقىتتا مەملەكەت باسشىسىنىڭ باستاماسى بويىنشا «مۇعالىمنىڭ مارتەبەسى تۋرالى» زاڭ قابىلداناتىن بولادى, ول بۇل ماماندىقتىڭ قوعامداعى بەدەلىن ارتتىرىپ, ەڭ تاجىريبەلى, دارىندى, وزىندىك كوزقاراسى قالىپتاسقان ماقساتكەر جاس مامانداردىڭ كۇشتى اعىنىن قامتاماسىز ەتەدى.
بۇگىنگى كۇنى جۇمىس بەرۋشىلەردىڭ ساۋالناماسى نەگىزىندەگى رەيتينگتىك كورسەتكىشتەر مەن جوعارى وقۋ ورنىن تامامداعان تۇلەكتەردىڭ جۇمىسقا ورنالاستىرىلۋىنداعى تالداۋلار ۋنيۆەرسيتەتتىڭ قىزمەتىن باعالاۋدا زور ماڭىزعا يە. اتالعان رەيتينگكە ءبىر عانا مىسال, ««اتامەكەن» ۇكپ جانە قازاقستان رەسپۋبليكاسى ءبىلىم جانە عىلىم مينيسترلىگىنىڭ بىرلەسكەن جۇمىسىنىڭ اياسىندا جۇرگىزىلەتىن رەيتينگ بويىنشا ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتى حالىق شارۋاشىلىعى ۋنيۆەرسيتەتى (جاڭا ەكونوميكالىق ۋنيۆەرسيتەت) جانە قبتۋ-مەن قاتار ءوز ماماندىقتارىنىڭ ساپاسى, وزەكتىلىگى مەن زاماناۋيلىعى بويىنشا ەڭ جوعارى باللداردى كورسەتە وتىرىپ, قازاقستاندىق جوعارى ءبىلىم كوشباسشىلارىنىڭ قاتارىنا ەندى. ۋنيۆەرسيتەت ۇجىمى ەلباسىنىڭ جولداۋىن باستى نازاردا ۇستاي وتىرىپ, جۇمىس بەرۋشىلەرمەن قارىم-قاتىناس جاساۋ ارقىلى تۇلەكتەردى تابىستى جۇمىسقا ورنالاستىرۋ جولدارىن انىقتاپ, باسەكەگە قابىلەتتى ءبىلىم بەرۋ باعدارلامالارىن ەنگىزۋ ارقىلى قىزمەتتىڭ وسى باعىتىن نىعايتادى.
وتاندىق جوعارى وقۋ ورىندارى ءۇشىن قازاقستاندا تابىستى جۇمىس ىستەيتىن يننوۆاتسيالىق ۋنيۆەرسيتەتتەردىڭ تاجىريبەسىن جيناپ, قولدانۋعا مۇمكىندىك زور. ەلىمىزدەگى جوعارى مەكتەپتىڭ كوشىن باستاپ تۇرعان نازارباەۆ ۋنيۆەرسيتەتىمەن ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتى اراسىنداعى ناتيجەلى بايلانىس زاماناۋي ءبىلىم بەرۋ تەحنولوگيالارى مەن باعالاۋ ادىستەرىن ءبىلىم وردامىزدىڭ جۇمىس تاجىريبەسىنە ەنگىزۋگە مۇمكىندىك تۋعىزدى. اتالعان جۇمىستىڭ وڭ ناتيجە بەرەرى حاق, بۇل ءبىلىمدى باعالاۋدىڭ وبەكتيۆتىلىگىن ارتتىرىپ, ءبىلىم الۋشىلاردىڭ وزىندىك جەتىستىكتەرىن ەسكەرە وتىرىپ, وقۋ ءۇردىسىن ۇيىمداستىرۋداعى اشىقتىقتى كورسەتەدى.
پرەزيدەنتتىڭ باستامالارى سونداي-اق, جەڭىلدىكتى شاعىن نەسيە ارقىلى حالىقتىڭ كاسىپكەرلىك بەلسەندىلىگىن دامىتۋعا ىقپال ەتەدى. پرەزيدەنتتىڭ كرەديتتىك قاراجاتتى پايدالانۋ تيىمدىلىگى تۋرالى الاڭداۋشىلىعى تەرەڭ ەكونوميكالىق تالداۋعا نەگىزدەلەدى. كوپتەگەن جاعدايلاردا قارجى قاراجاتتارىن ءتيىمسىز پايدالانۋ سەبەپتەرى ءوز بيزنەسىن ۇيىمداستىرعىسى كەلەتىن ادامداردىڭ كاسىپكەرلىك ساۋاتتىنىڭ ازدىعىنان ورىن الادى. جاستاردىڭ كاسىپكەرلىك داعدىلارىن قالىپتاستىرۋ – «قۇقىق نەگىزدەرى جانە كاسىپكەرلىك» وقۋ ءپانى اياسىندا ستارتاپ قوزعالىسقا ستۋدەنتتەردى تارتۋ ارقىلى قاراعاندى مەملەكەتتىك ۋنيۆەرسيتەتىمەن بىرگە ءساتتى شەشىمىن تاپقان مىندەتتەردىڭ ءبىرى. ۋنيۆەرسيتەتتە ستارتاپ جوبالارعا قاتىسۋ ارقىلى مول تاجىريبە جيناعان ستۋدەنتتەرىمىز بولاشاقتا ءوز ىستەرىن باستايدى دەپ سەنەمىز.
پرەزيدەنت جولداۋىندا قازاقستاندىقتاردىڭ ءومىر ءسۇرۋ ساپاسىن جاقسارتۋ, وڭىرلەردىڭ, قالالار مەن اۋىلداردىڭ الەۋمەتتىك ينفراقۇرىلىمىن دامىتۋ باستامالارىنا باسىمدىلىق بەرىلگەن. مەملەكەت ازاماتتاردىڭ جارقىن بولاشاققا باستايتىن باستامالارىن قولداۋعا دايىن. جوعارى وقۋ ورىندارى جاس ۇرپاقتىڭ الەۋمەتتىك جاۋاپكەرشىلىگىن قالىپتاستىرا وتىرىپ, ساپالى ءبىلىم بەرۋدى باستى باعداردا ۇستايدى. ەلباسىنىڭ كەزەكتى جولداۋى دا مەملەكەتىمىزدىڭ تۇراقتى دامۋ جولىنداعى سىندارلى, سارابدال ساياساتىنا سەرپىن بەرە وتىرىپ, ەل يگىلىگىن ەسەلەيدى.
ەركىن كوبەەۆ,
ە.ا. بوكەتوۆ اتىنداعى قارمۋ-دىڭ رەكتورى,
قاراعاندى وبلىستىق ءماسليحاتىنىڭ دەپۋتاتى
قاراعاندى