بۇگىن قر پرەمەر-ءمينيسترى باقىتجان ساعىنتاەۆ پاۆلودار وبلىسىنا جۇمىس ساپارى اياسىندا ەكىباستۇز قالاسىنداعى №36 ورتا مەكتەپكە باردى, وندا جەرگىلىكتى مەكتەپتەردىڭ قامقورشىلار كەڭەستەرىمەن, اتا-انالار كوميتەتتەرىمەن كەزدەسىپ, ءبىلىم بەرۋ جۇيەسىن دامىتۋدىڭ وزەكتى ماسەلەلەرىن تالقىلادى. بۇل — ءبىلىم بەرۋ ساپاسىن ارتتىرۋ, وقۋ ماتەريالدارىمەن قامتاماسىز ەتۋ, ماتەريالدىق-تەحنيكالىق بازانى جاقسارتۋ, تسيفرلاندىرۋ جانە ت.ب.
№36 جالپى ءبىلىم بەرۋ مەكتەبى 2016 جىلدان باستاپ جۇمىس ىستەيدى. قازىرگى تاڭدا مەكتەپتە 916 بالا ءبىلىم الۋدا. مەكتەپتىڭ پەداگوگتەر قۇرامى 53 مۇعالىمنەن تۇرادى. كابينەتتەر قاجەتتى جابدىقتارمەن جاراقتاندىرىلعان. زاماناۋي وقۋ پروتسەسىنىڭ جاڭا تاسىلدەرىن ەسكەرە وتىرىپ, روبوتتى تەحنيكا جانە شاحمات كابينەتتەرى اشىلعان.
پرەمەر-مينيستر ات-كابينەتتەردى ارالادى, وندا پەداگوگ ب. بەلگىباەۆا ء«وز بولاشاعىڭدى باعدارلا» پيلوتتىق جوباسىنىڭ ىسكە اسىرىلۋى جايىندا مالىمدەدى. ءوز كەزەگىندە, وقۋشى ا. امانگەلدى ينتەراكتيۆتى تاقتادا ءوزى ازىرلەگەن, اعىلشىن تىلىندەگى انيماتسيالىق جوبامەن تانىستىردى.
مەكتەپتىڭ اكت زالىندا باقىتجان ساعىنتاەۆ جەرگىلىكتى مەكتەپتەردىڭ قامقورشىلار كەڭەستەرى مەن اتا-انالار كوميتەتتەرىمەن كەزدەستى. كەزدەسۋگە قاتىسۋشىلار ءبىلىم بەرۋ جۇيەسىندەگى پروبلەمالارعا قاتىستى ءوز ويلارىن ورتاعا سالىپ, ءبىلىم بەرۋ قىزمەتتەرىنىڭ ساپاسىن كوتەرۋ تۋرالى ۇسىنىستارىن ءبىلدىردى.
№18 مەكتەپتىڭ وكىلى ا. ارمانگۇل ءبىرىنشى سىنىپ وقۋشىلارىن مەملەكەتتىك تىلىندەگى وقىتۋ ماتەريالدارىمەن قامتاماسىز ەتۋ ماسەلەسىن كوتەردى. №2 مەكتەپتىڭ اتىنان ن. قوسداۋلەتوۆا وقىتۋ ورىندارىنىڭ ينفراقۇرىلىمىن ودان ءارى دامىتۋ ماسەلەسىن تىلگە تيەك ەتتى. №17 مەكتەپ وكىلى س. اقنۇروۆا ارالاس مەكتەپتەردىڭ جۇمىسىن جەتىلدىرۋ جايىن قوزعادى. ۆ. كولوديۋك (№35 مەكتەپ) — الەۋمەتتىك پەداگوگتار, مەكتەپ پسيحولوگتارى مەن ادىسكەرلەردىڭ جالاقىسىن كوتەرۋ ماسەلەلەرى تۋرالى ايتتى. №22 مەكتەپ وكىلى ق. كوكىمباەۆا ۇلتتىق بىرىڭعاي تەستىلەۋ سەرتيفيكاتىنىڭ قولدانىلۋ مەرزىمىن ۇزارتۋ ماسەلەسىن كوتەردى. №10 مەكتەپتەن كەلگەن ۆ. پوتراحينا ءبىلىمدى باعالاۋ جۇيەسىنە ۇسىنىس ءبىلدىردى. №21 مەكتەپ وكىلى س. بەرتەنەۆا بەس كۇندىك وقۋ اپتاسىنا كوشۋ ارقىلى وقۋشىلاردىڭ جۇكتەمەسىن ازايتۋ تۋرالى سۇراق قويدى. ش. اقمۋرزينا وڭىردە مەكتەپتەردىڭ بازاسىندا قوسىمشا ۇزارتىلعان كىشى سىنىپتار اشۋ ماسەلەسىن كوتەردى.
جيىن قاتىسۋشىلارىنىڭ سۇراقتارىنا پرەمەر-مينيستر ب. ساعىنتاەۆ پەن ءبىلىم جانە عىلىم ءمينيسترى ە. ساعاديەۆ جاۋاپ بەردى. وسىنداي اشىق اڭگىمەلەسۋ ماسەلەلەردى انىق ايقىنداۋعا جانە ولاردى شەشۋدىڭ ءتيىمدى جولدارىن تابۋعا جول اشادى. تالقىلاۋ قورىتىندىسى بويىنشا وبلىس اكىمدىگىنە جانە ءبىلىم جانە عىلىم مينيسترلىگىنە ايتىلعان ۇسىنىستار مەن كوتەرىلگەن ماسەلەلەر بويىنشا ناقتى تاپسىرمالار بەرىلدى.