ەلىمىزدە «سولتۇستىك-وڭتۇستىك» تۇراقتى ەلەكتر جەلىسى سالىنباق. جاڭا تەحنولوگيالىق جەلىنىڭ قۋاتى ءداستۇرلى جەلىگە قاراعاندا 4-5 ەسەگە ارتىق بولادى. بۇل تۋرالى ورتالىق كوممۋنيكاتسيالار قىزمەتىندە وتكەن جيىندا «KEGOG» اق-تىڭ باسقارما توراعاسى باقىتجان قاجيەۆ مالىمدەدى.
− قازىرگى تاڭدا «سولتۇستىك-وڭتۇستىك» تۇراقتى توك جەلىسىن سالۋ مۇمكىندىگىن قاراستىرۋدامىز. بۇل قازاقستاندا عانا ەمەس, سونىمەن بىرگە تمد ەلدەرى كەڭىستىگى بويىنشا العاش قولعا الىنىپ وتىرعان جوبا. جاڭا ەلەكتر ەنەرگياسىن ءوندىرۋ جەلىسى ءوز كەزەگىندە ءداستۇرلى جەلىلەرمەن سالىستىرعاندا قۋاتتى 4-5 ەسەگە ارتىق جەتكىزۋگە مۇمكىندىك بەرەدى. سونىمەن قاتار ينتەللەكتۋالدى تەحنولوگيا ارقىلى ۇزاق قاشىقتىقتان ەلەكتر ەنەرگياسىنىڭ جەتكىزىلۋىن باسقارۋدى قامتاماسىز ەتەدى, – دەدى «KEGOG» اق-تىڭ باسقارما توراعاسى.
«KEGOG» كومپانياسىنىڭ باسشىسى كەلتىرگەن اقپارات بويىنشا, بۇگىندە رەسپۋبليكاداعى ەلەكتر ستانسالارىنىڭ بەلگىلەنگەن قۋاتىنىڭ جيىنتىق كولەمى 428 مۆت-تى قۇرايدى, ونىڭ اراسىندا «بۋرنىە سوليار 1,2» جشس (جامبىل وبلىسى, جيىنتىق قۋاتى – 100 مۆت), «تۇڭعىش جەل ەلەكتر ستانساسى» جشس (اقمولا وبلىسى, قۋاتى – 45 مۆت) سياقتى ءىرى نىساندار بار.
− بۇگىنگى تاڭدا كومپانيا الدىنداعى تاعى ءبىر ماڭىزدى شارۋالاردىڭ ءبىرى – ەنەرگيا تاراتۋشى كومپانيالاردان باسەكەگە قابىلەتتىلىكتى تالاپ ەتۋ. وسى ورايدا, اعىمداعى جىلدىڭ مامىر جانە ماۋسىم ايلارىندا العاشقى اۋكتسيون وتكىزىلدى. ونىڭ قورىتىندىسى بويىنشا جالپى قۋاتى شامامەن 200 مۆت-تى قۇرايتىن كۇن, جەل, بيوگاز جانە گيدروەلەكتر ستانسالارىن سالۋ بويىنشا 19 جاڭا جوبا ىرىكتەلىپ الىندى. ۇستىمىزدەگى جىلدىڭ قازان ايىندا اۋكتسيوننىڭ ەكىنشى كەزەڭىن وتكىزۋ جوسپارلانىپ وتىر, – دەدى ب.قاجيەۆ.
سونىمەن قاتار «تسيفرلى قازاقستان» مەملەكەتتىك باعدارلاماسى اياسىندا «KEGOC» اق «قازاقستاننىڭ ءبىرتۇتاس ەلەكتر ەنەرگەتيكالىق جۇيەسى رەجىمدەرىن باسقارۋدى اۆتوماتتاندىرۋ» جوباسىن ىسكە اسىرىپ جاتقانىن ايتا كەتەيىك.
ەركەجان ايتقازى,
«ەگەمەن قازاقستان»