وتكەندە تالدىقورعان قالاسىنداعى «جاستار» سپورت سارايىنىڭ جاتتىعۋ زالىنا كەزدەيسوق باس سۇققان جاندار قىزىق وقيعانىڭ كۋاگەرى بولدى. وقيعا دەگەندە, قازىرگى زامانعى وزىق ۇلگىمەن بوي كوتەرگەن سپورت عيماراتىنىڭ ءىشى ءبىر كۇندە وزگەرىپ, وتكەن عاسىردىڭ 80-جىلدارداعىداي ساۋلەت كەيپىنە ەنگەنىن كورىپ, تاڭىرقاعان ەدى...
شىن مانىسىندە بۇل كوركەم فيلمگە لايىقتالىپ جاسالعان دەكوراتسيا بولاتىن. 1980 جىلى ماسكەۋدە وتكەن وليمپيا ويىندارىنىڭ چەمپيونى, بالۋان, بۇگىنگى ەڭبەك ەرى جاقسىلىق ۇشكەمپىروۆ جايلى ءفيلمنىڭ نەگىزگى ءتۇسىرۋ جۇمىستارى تالدىقورعاندا جالعاسۋدا. جەتىسۋدا تۇسىرىلگەن فيلم ەپيزودىنا بالۋاننىڭ وليمپيادا الدىنداعى دايىندىق كەزەڭى مەن الەمدىك دودا ۇستىندەگى تەڭدەسسىز جەڭىس ءساتى ارقاۋ بولعان. ۇشكەمپىروۆتىڭ جالىندى شاعىن جاس اكتەر ولجاس ساق سومدايدى.
– جاقسىلىق اعامىزدىڭ ءرولىن سومداۋ ءارى جەڭىل, ءارى قيىنعا سوقتى. جەڭىل بولاتىنى, ءومىرى نۇرلى, جولى جارقىن عوي ول كىسىنىڭ, ءوزى دە ۇنەمى اقىل كەڭەسىن ايتىپ, قامقور بولىپ قاسىمدا ءجۇر. قينالعانىم, بالۋاننىڭ بوز كىلەمدەگى ءادىس-ايلاسىن اينىتپاي قايتالاۋعا ءتيىسپىن. ءوزىم ەركىن كۇرەسكە قاتىسقان ەدىم, جاقسىلىق اعا كلاسسيكالىق كۇرەستىڭ شەبەرى. ەكى اي بويى جاتتىعۋ زالىنان شىقپاي دايىندالۋعا تۋرا كەلدى, – دەيدى اكتەر.
قالماحانبەت مۇقامەتقالي,
«ەگەمەن قازاقستان»
الماتى وبلىسى