تۇرعىن ءۇي ماسەلەسى قاي كەزدە دە وزەكتى. ء«ۇيى جوقتىڭ, كۇيى جوق» دەگەندەي, ءۇي باسپاناسىز جاننىڭ باستى مۇڭىنا اينالادى. دەي تۇرعانمەن, بۇگىنگى تاڭدا ەل تۇرعىندارى ءۇشىن باسپانالى بولۋدىڭ مۇمكىندىكتەرى كوپ. وڭىرلەردە «نۇرلى جەر» باعدارلاماسى ارقىلى ءبىرشاما تۇرعىن ءۇي كەشەندەرى سالىنىپ, ەل يگىلىگىنە بەرىلدى. كوپتەگەن وتباسى قونىس تويىن تويلاپ, قۋانىشقا كەنەلىپ جاتىر. مەملەكەتتىڭ مىڭداعان ازاماتتارعا جاساعان قامقورلىعى مەن مۇمكىندىكتەرىنىڭ ناتيجەسىندە ءاربىر ازامات ءوز شاڭىراعىنىڭ يەسى اتانىپ, مەرەيى تاسۋدا.
ء«وز ءۇيىم – ولەڭ توسەگىم» دەيدى حالقىمىز. باقىت شامى ماڭدايىنا بۇيىرعان باسپانالى ازاماتتاردىڭ قاتارى بۇگىندە جامبىل وبلىسىندا دا كوبەيىپ كەلەدى. جۋىردا «نۇرلى جەر» مەملەكەتتىك باعدارلاماسى بويىنشا تاراز قالاسىنداعى «اراي» القابىنان بوي كوتەرگەن 80 پاتەرلىك بەس قاباتتى تۇرعىن ءۇي پايدالانۋعا بەرىلدى. تۇرعىن ءۇي پاتەرلەرىنىڭ كىلتى تولىق ەمەس وتباسىلارعا, جەتىم بالالارعا, ۇلى وتان سوعىسىنىڭ ارداگەرلەرىنە, سونىمەن قاتار ۇزاق جىلدان بەرى كەزەكتە تۇرعان بيۋدجەتتىك مەكەمە قىزمەتكەرلەرىنە تابىستالدى. جامبىل وبلىسى اكىمىنىڭ ورىنباسارى ەركەبۇلان داۋىلباەۆتىڭ ايتۋىنشا, بۇل باعىتتاعى جۇمىستار وبلىستىڭ بارلىق ەلدى مەكەندەرىندە «نۇرلى جەر» باعدارلاماسى اياسىندا جانە جەرگىلىكتى, سونىمەن قاتار وبلىستىق بيۋدجەت ەسەبىنەن جالعاسىن تاباتىن بولادى.
«اراي» القابىنان ءبىر جارىم جىلدا بوي كوتەرگەن تۇرعىن ءۇيدىڭ قۇرىلىس جۇمىستارىنا رەسپۋبليكالىق بيۋدجەت ەسەبىنەن 614 ميلليون تەڭگە جۇمسالدى. تۇرعىن ءۇيدىڭ جالپى اۋماعى 5 مىڭ شارشى مەتردى قۇرايدى. جاڭا تۇرعىن ۇيدە 15 ءبىر بولمەلى, 30 ەكى بولمەلى جانە 35 ءۇش بولمەلى پاتەر بار. سونىمەن قاتار بارلىق پاتەر زاماناۋي ۇلگىدە جاساقتالعان. ءبىر ايتا كەتەرلىگى, اعىمداعى جىلدىڭ سوڭىنا قاراي «بايتەرەك» شاعىن اۋدانىندا جالدىق نەگىزدە پايدالانۋعا ارنالعان تاعى دا 100 جانە 60 پاتەرلى ەكى تۇرعىن ءۇيدىڭ قۇرىلىسى اياقتالاتىن بولادى. بۇل دا تالاي تۇرعىننىڭ باسپانالى بولۋىنا مۇمكىندىك سىيلايتىن جاعداي.
جامبىل وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادىلەت احاتاەۆ جىل سوڭىنا دەيىن №15 شاعىن اۋداندا 800 پاتەرلىك 10 كوپقاباتتى تۇرعىن ءۇي قۇرىلىسىنىڭ اياقتالاتىنىن جەتكىزدى. سونىمەن قاتار 255 كوتتەدجدىك جەكە تۇرعىن ءۇي سالىنۋ ۇستىندە. «وڭىردەگى جالپى تۇرعىن ءۇي قۇرىلىسىنا بيىل 7,2 ميلليارد تەڭگە قاراستىرىلعان. بارلىعى 1600-گە تارتا وتباسى قونىس تويىن تويلايتىن بولادى. ءبىرىنشى جارتىجىلدىقتا تاراز, قاراتاۋ جانە جاڭاتاس قالالارىندا التى تۇرعىن ءۇي پايدالانۋعا بەرىلدى. وتكەن جىلى 397 مىڭ شارشى مەتر تۇرعىن ءۇي سالىنعان بولسا, بيىل بۇل كورسەتكىش 430 مىڭ شارشى مەترگە دەيىن جەتىپ وتىر», دەيدى باسقارما باسشىسى.
سالىنىپ بىتكەن تۇرعىن ۇيلەردى ءبولۋ مەملەكەتتىك «7 – 20 – 25» باعدارلاماسى ارقىلى جۇزەگە اساتىن بولادى. ال ۇلتتىق بانكتىڭ جامبىل وبلىستىق فيليالىنىڭ مالىمەتىنشە, وسى ۋاقىتقا دەيىن وڭىردە «7 – 20 – 25» باعدارلاماسىمەن جالپى قۇنى 92 ميلليون تەڭگە بولاتىن 10 ءوتىنىش قابىلدانىپ, 8 ءوتىنىش ماقۇلدانعان ەكەن. وڭىردە 23 مىڭعا تارتا ازامات باسپانا كەزەگىندە تۇر. سونىڭ ىشىندە 16 مىڭنان استام ازامات تاراز قالاسىنىڭ تۇرعىندارى. وبلىس ورتالىعىنداعى قارقىندى قۇرىلىستىڭ ناتيجەسىندە كەلەشەكتە «نۇرلى جەر» مەملەكەتتىك باعدارلاماسى ارقىلى بارلىق كەزەكتە تۇرعان تۇرعىندار باسپانالى بولا الادى.
كەلەشەكتە №15 شاعىن اۋداندا تۇرعىندار ءۇشىن وقۋشىلار سارايى, نەكە قيۋ سارايى, حالىققا قىزمەت كورسەتۋ ورتالىعى جانە سالتانات سارايى سياقتى بىرقاتار كوز تارتاتىن كەشەن بوي كوتەرمەك. اتالعان نىسانداردىڭ قۇرىلىسىن اياقتاۋ كەلەسى جىلعا جوسپارلانعان.
جىل باسىنان بەرى تاراز قالاسىندا جالپى كولەمى 120 مىڭ شارشى مەتردەن استام تۇرعىن ءۇي پايدالانۋعا بەرىلگەن بولسا, جىل سوڭىنا دەيىن تاعى دا 13 كوپقاباتتى تۇرعىن ءۇيدىڭ قۇرىلىسىن اياقتاۋ جوسپارلانۋدا. دەمەك, جىل سوڭىندا «نۇرلى جەر» باعدارلاماسى ارقىلى تاعى دا ءبىراز ازاماتتار قونىس تويىن تويلايتىن بولادى.
حاميت ەسامان,
«ەگەمەن قازاقستان»
جامبىل وبلىسى