بقو تجد جەدەل قۇتقارۋ جاساعىنىڭ №5 قۇتقارۋ بولىمشەسىنىڭ قۇتقارۋشىلارى ۋاحيتوۆ تەمىربولات پەن نيكيفوروۆ ولەگ شالقار كولىندە پاترۋلدەۋ كەزىندە 4 ادامدى قاتەردەن قۇتقارىپ قالدى.
شالقار كولىنە كەلگەندەردىڭ ىشىندەگى 3 ادام ۇرلەمەلى ماتراسقا ءمىنىپ, 2 شاقىرىمعا دەيىن, ال سونىمەن بىرگە تاعى ءبىر ادام دا الىس قاشىقتىققا ءجۇزىپ كەتكەن. وسى جايتتى كورگەن قۇتقارۋشىلار دەر كەزىندە كومەكتەرىن كورسەتىپ, ولاردى جاعاعا الىپ شىقتى.
ماتراسقا جاتىپ, الىسقا ءجۇزىپ كەتكەن دوستارىنا كومەكتەسەمىن دەپ ارتتارىنان ءجۇزىپ بارعان ازامات تا ولارعا جەتپەي شارشاپ قالعان. ونىڭ ۇستىنە جەل دە كەدەرگى كەلتىرىپ, سۋعا تۇسۋشىلەردى ماتراسپەن بىرگە ىقتىرىپ اكەتكەن. وسى ارالىقتا ۇرلەمەلى ماتراستىڭ جەلى دە ازداپ شىققان ەكەن. قۇتقارۋشىلار ولاردى قۇتقارۋ كاتەرىنە وتىرعىزىپ, جاعاعا شىعارعاننان كەيىن سۋداعى قاۋىپسىزدىك ەرەجەلەرىن ءتۇسىندىردى.