زامانامىزدىڭ تانىمال پروزاشىسى پاۋلو كوەلو: «كەيدە ءومىر ەكى ادامدى ءبىر-بىرىنە قانشالىقتى قىمبات ەكەنىن ۇعىندىرۋ ءۇشىن اجىراتادى» دەپ پايىمداساداعى وتباسىلى بولۋدىڭ قادىرىن بىلمەي, باسىنداعى باعىن وپ-وڭاي ۇشىرىپ وتىرعاندار قاتارى كوبەيمەسە, ازايار ەمەس.
جاھاندانۋ داۋىرىندەگى قىزىقتىڭ جالعان تۇرلەرى كوبەيىپ تۇرعاندا جاڭا شاڭىراق كوتەرگەن جاستارعا جۇبايلىق ءومىردىڭ وڭ-سولىن كورسەتىپ, اقىلدارىنا اقىل, سابىرلارىنا ءتوزىم سىيلاپ وتىراتىن الدىڭعى بۋىننىڭ ءوزى التەك-التەك كەزەڭدەردەن ءوتىپ, سانسىراپ قالعان جايى تاعى بار.
وسىنداي جاعدايدا ءبىرىنشى نەكە تاڭىردەن ەكەنىن ءتۇسىندىرىپ, ناسيحاتتاپ وتىراتىن بارلىق وتباسىلىق ينستيتۋتار مەن تەتىكتەر اۋاداي قاجەت بولىپ تۇر.
ەندەشە بۇل كۇندەرى «Almaty Towers» عيماراتىندا ورنالاسقان «Open Almaty» الماتى قالاسى اكىمدىگىنىڭ قوعامدىق قابىلداۋ الاڭىندا سوتقا دەيىنگى تاتۋلاستىرۋ ورتالىعى ىسكە كىرىستى.
اشىلعانىنا اي تولماعان اتالمىش ورتالىقتىڭ تۇساۋكەسەر راسىمىندە الماتى قالالىق سوتىنىڭ توراعاسى نۇرعازى ابدىقانوۆ جۇرتشىلىقتى سوتسىز تاتۋلاستىرۋ ورتالىعىنىڭ جۇمىسىمەن تانىستىرىپ, ونىڭ تيىمدىلىگى, داۋدى سوتقا دەيىنگى رەتتەۋدىڭ ارتىقشىلىقتارى توڭىرەگىندە اڭگىمەلەپ بەردى.
– اتا-بابالارىمىز: «داۋ-دامايدىڭ مۇراتى – ءبىتىم» دەپ تەگىننەن-تەگىن ايتپاعان. ازاماتتار كىشىگىرىم قۇقىقبۇزۋشىلىقتار سوت ماجىلىسىنە بارماي-اق, ورتالىققا كەلىپ, وزدەرىنىڭ داۋلارىن رەتتەي الادى. تاتۋلاسۋ ورتالىعىنىڭ ارقاسىندا ولار وزدەرىنىڭ ۋاقىتى مەن شىعىندارىن ۇنەمدەي الادى. مۇنىڭ ەكونوميكالىق جاعىنان تيىمدىلىگى مول. قوس تاراپ وزدەرىنىڭ داۋلارىن ىنتىماقپەن, بىتىمگەرشىلىكپەن شەشە الادى, – دەدى الماتى قالالىق سوتىنىڭ توراعاسى نۇرعازى ابدىقانوۆ.
ەندىگى جەردە بۇل ورتالىققا الماتىداعى بارلىق اۋداننىڭ تۇرعىندارى كەلىپ, وزدەرىنىڭ داۋلارىن شەشە الادى. مۇندا پسيحولوگ, پەداگوگ, ادۆوكات, مەدياتور, سۋديالار وتىرادى. ولار حالىققا تەگىن قىزمەت كورسەتەدى.
دەگەنمەن قازىرگە تاتۋلاستىرۋ ورتالىعىنا كەلىپ تابىسىپ, ماسەلەلەرىنە مەدەت تاۋىپ جاتقان وتباسىلار جوقتىڭ قاسىنداي دەۋگە بولادى.
اتالمىش ورتالىقتىڭ مەدياتورى اللا شابانوۆانىڭ ايتۋىنشا, قازىر مۇندا اقىل سۇراپ كەلىپ وتىرعان ادامدار از. باستاپقىدا بىرنەشە جۇپ كەلىپ, كەڭەس الىپ كەتكەن. بىراق, ورتالىق قىزمەتكەرلەرى ولاردىڭ ءارى قارايعى تاعدىرلارىنان حابارسىز. ويتكەنى جۇمىسى جاندانا قويماعان مۇنداي مەكەمەنىڭ بار ەكەنى كوپشىلىككە ءالى دە ءمالىم ەمەس. جارناماسى جەتىسپەي تۇرعان سىڭايلى.
الايدا قازىر ەلىمىزدە بىتىمگەرلەر كومەگىنە جۇگىنەتىندەر قاتارى ارتىپ كەلەدى ەكەن. ماسەلەن, مەدەۋ اۋداندىق سوتىنا 361 ارىز-شاعىم تۇسسە, سونىڭ جارتىسىنا جۋىعى بىتىمگەرشىلىكپەن اياقتالعان. ەگەر بۇل ورتالىقتىڭ جۇمىسىن حالىق جاقسى قابىلدايتىن بولسا, ارىزدار سوتقا ەمەس, وسىندا تۇسەتىن بولسا, سوتتا قارالاتىن ىستەر مەيلىنشە ازايسا, وندا مۇنداي ورتالىقتار قالانىڭ باسقا دا ايماقتارىنان اشىلاتىن بولادى.
ايناش ەسالي, «ەگەمەن قازاقستان»