اكادەميك قانىش ساتباەۆتىڭ عىلىمي مۇراسىن كوپشىلىككە تانىتۋ ماقساتىندا اشىلعان ورتالىق كىتاپحانالىق, ارحيۆتىك قورلارداعى ماتەريالدار نەگىزىندە جانە عالىمنىڭ جەكە زاتتارىمەن تولىقتى, دەپ حابارلايدى Egemen.kz.
ورتالىق زەرتتەۋشىلەرگە, ستۋدەنتتەرگە, وقۋشىلار مەن عىلىمعا قىزىعۋشىلار ءۇشىن دەرەككوزدەرمەن, ءبىلىم بەرۋ ماتەريالدارىمەن جۇمىس ىستەۋگە مۇمكىندىك بەرەدى.
كەلۋشىلەر ءۇشىن «قانىش الەمى» پورتالى, «Satpaev AI» قوسىمشاسى, كىتاپحانالىق رەسۋرستار, بەينەدارىستەر مەن ارحيۆتىك ماتەريالدار قولجەتىمدى. بۇل رەسۋرستار جۇيەلى تۇردە جاڭارتىلىپ, تولىقتىرىلىپ وتىرادى. بولاشاقتا «قانىش الەمى» پلاتفورماسى ساتباەۆ ەسىمىمەن بايلانىستى مەكتەپتەردىڭ, مۋزەيلەردىڭ, كىتاپحانالار, ينستيتۋتتار مەن عىلىمي ورتالىقتاردىڭ قورلارىن بىرىكتىرەتىن بىرىڭعاي ءبىلىم ورتالىعى رەتىندە داميتىن بولادى.
«قانىش الەمى» پورتالى مەن سايتىندا قانىش ساتباەۆتىڭ ىرگەلى 10 تومدىق شىعارمالار جيناعى, سونداي-اق م.و.اۋەزوۆ اتىنداعى ادەبيەت جانە ونەر ينستيتۋتىمەن بىرلەسكەن جوبا اياسىندا دايىندالعان اكادەميالىق ەڭبەكتەرىنىڭ تولىق 5 تومدىق جيناعى بار.
تسيفرلىق ەكوجۇيەسىندە گەولوگيا ماماندىعىنىڭ ستۋدەنتتەرى ازىرلەگەن «Satbayev AI» قوسىمشاسى جۇمىس ىستەيدى.
ورتالىق قانىش ساتباەۆتىڭ 125 جىلدىعىنا ارنالعان رەسپۋبليكالىق ءىس-شارالار جوسپارى اياسىندا ساتباەۆ ۋنيۆەرسيتەتىنىڭ پروفەسسورى باقىتجان امرالينوۆانىڭ جەتەكشىلىگىمەن جۇرگىزىلگەن «اكادەميك ق.ي.ساتباەۆتىڭ عىلىمي-مادەني مۇراسىن زەرتتەۋ – قازاقستاننىڭ عىلىمي مەكتەپتەرىن دامىتۋ جولى» اتتى باعدارلامالىق-نىسانالى قارجىلاندىرۋ جوباسىن ىسكە اسىرۋ ناتيجەسىندە اشىلدى. جوبا عالىمنىڭ مۇراسىن جۇيەلى تۇردە زەرتتەۋگە, ساقتاۋعا جانە ناسيحاتتاۋعا مۇمكىندىك بەرىپ, عىلىمي-زەرتتەۋ جۇمىستارىن جۇرگىزۋدە دەرەككوزگە قولجەتىمدىلىكتى قامتاماسىز ەتەدى.