بۇگىن الماتىدا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى, كونستيتۋتسيالىق رەفورمالار جونىندەگى كوميسسيا توراعاسىنىڭ ورىنباسارى ايدا بالاەۆا باستاعان «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ مۇشەلەرى عىلىمي قاۋىمداستىق وكىلدەرىمەن كەزدەستى, دەپ حابارلايدى Egemen.kz.
وتىرىسقا عىلىم جانە جوعارى ءبىلىم ءمينيسترى ساياسات نۇربەك, قازاقستان ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ, ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەباەۆ, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى بولات تىلەپ, قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ اكادەميگى ۆياچەسلاۆ لوكشين قاتىستى.
كەزدەسۋ بارىسىندا ايدا بالاەۆا ەلدە جۇرگىزىلىپ جاتقان كونستيتۋتسيالىق رەفورمانىڭ ماڭىزىنا كەڭىنەن توقتالىپ, مەملەكەت باسشىسى قاسىم-جومارت توقاەۆ باستاماشىلىق ەتكەن وزگەرىستەر ادىلەتتى, ورنىقتى ءارى ءتيىمدى مەملەكەتتىك باسقارۋ مودەلىن قالىپتاستىرۋعا باعىتتالعانىن اتاپ ءوتتى. اۋقىمدى رەفورمالار پاكەتىنىڭ نەگىزگى باعىتتارىنىڭ ءبىرى – ءبىر پالاتالى پارلامەنتكە كوشۋ.
كواليتسيا مۇشەسى رەتىندە ايدا بالاەۆا مەملەكەت مادەني ارالۋاندىلىقتى دامىتۋعا, عىلىمي زەرتتەۋلەرگە جانە بىلىمگە نەگىزدەلگەن دامۋعا ستراتەگيالىق باسىمدىق بەرىپ وتىرعانىن ايتتى.
«بۇل نورمالار ۇلتتىق مادەنيەتتى ساقتاۋعا جانە جاڭعىرتۋعا, پروگرەسسيۆتى ۇلت قالىپتاستىرۋعا, سونداي-اق عىلىم مەن يننوۆاتسيانى دامىتۋعا بەرىك قۇقىقتىق نەگىز بولادى دەپ ەسەپتەيمىن», دەدى ول.
سونىمەن قاتار قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ ۆيتسە-پرەزيدەنتى اسقار جۇمادىلداەۆ, جاس عالىم, ءال-فارابي اتىنداعى قازۇۋ-دىڭ عىلىم دەپارتامەنتىنىڭ ديرەكتورى قۋانىش تاستامبەك جانە باسقا دا قاتىسۋشىلار جوبا ەرەجەلەرى جونىندەگى پىكىرىن ءبولىسىپ, عىلىمي قاۋىمداستىقتى بولاشاق قازاقستاننىڭ قۇقىقتىق نەگىزىن قالىپتاستىرۋعا شاقىردى.
«وزدەرىڭىز كورىپ وتىرعانداي, جۋىردا ەل پرەزيدەنتى قاراۋعا جاڭا كونستيتۋتسيا جوباسىن ۇسىندى. بۇل جوبا ءبىر عانا ادامنىڭ ەمەس, مول تاجىريبەسى بار 130 ماماننىڭ ۇزاق ءارى مۇقيات تالداۋىنىڭ ناتيجەسى, سونداي-اق كەڭ جۇرتشىلىقپەن جان-جاقتى تالقىلاۋ نەگىزىندە ازىرلەندى. كوميسسياعا تۇسكەن 10 مىڭنان استام ۇسىنىس – وسى جۇمىستىڭ ايقىن دالەلى», دەپ اتاپ ءوتتى تلەپ بولات.
ايتا كەتەيىك, جاڭا كونستيتۋتسيا جوباسى مەملەكەت باسشىسىنا ۇسىنىلدى جانە 2026 جىلعى 15 ناۋرىزدا وتەتىن رەسپۋبليكالىق رەفەرەندۋم ارقىلى حالىقپەن بىرگە قابىلدانادى.