قازاقستاننىڭ جاڭا استاناسىنىڭ نەگىزىن قالاعاندا, ەلباسى نۇرسۇلتان نازارباەۆ ونىڭ جاستىق پەن جاسامپازدىق قالاسى بولاتىنىن ايتقانى ەستە. راسىندا, جاڭا ەلوردامىزعا ارمان قۋعان مىڭداعان جاس قىز-جىگىتتەر اعىلۋدا. ولاردىڭ كوبى تاۋەلسىزدىك تۇسىندا دۇنيەگە كەلگەن, ەركىن ويلى, سانالى ازاماتتار. استانا سولارمەن بىرگە كوركەيىپ, وركەندەۋدە. وسى ورايدا بەلگىلى ساياساتكەر, قازاقستاننىڭ كورنەكتى مەملەكەت جانە قوعام قايراتكەرى قىرىمبەك كوشەرباەۆتىڭ ماعان اڭگىمەلەپ بەرگەن ءبىر ەستەلىگى ەسكە تۇسەدى.
اقمولا استانا رەتىندە جاڭا قالىپتاسىپ جاتقان كەز. ەلباسى جاۋاپتى تۇلعالاردى ەرتىپ, كەزەكتى رەت قالانى ارالاۋعا شىعادى. كەنەت پرەزيدەنتتىڭ كوزى قارسى الدىندا كەلە جاتقان كىشكەنتاي قارادومالاق قازاق بالاسىنا تۇسەدى. بالاقايدىڭ بەتى كۇنگە ابدەن قاقتالىپ, قاپ-قارا بولىپ كۇيىپ كەتكەن. قوس قولىندا دا بالمۇزداق: ءبىرىن جالاپ, ەكىنشىسىن تىستەپ قويادى. بىراق ءوزى تاتتىگە ەلتىپ, ءلاززات العانى شامالى, قايتا الدەنەگە اشۋلى كورىنەدى, قاباعىن ءتۇيىپ, سوڭىنان ىلەسكەن اتا-اناسىنا الدەبىر قارسىلىق ءبىلدىرىپ, مىنەز تانىتىپ, جۇلقىنىپ كەلەدى.
نۇرسۇلتان ءابىش ۇلى بارىنە توقتاۋعا بۇيىردى. «انا بالانى بايقادىڭدار ما؟ بولاشاقتا ەل باسقاراتىن بالا!» دەدى دە, جاقىنداپ باردى. اتا-اناسى مەملەكەت باسشىسىن كورىپ, جىلىۇشىراي امانداسىپ جاتىر. قازاقستاننىڭ تۇڭعىش پرەزيدەنتى بالاعا بۇرىلدى:
– مەنى بىلەسىڭ بە؟
– بىلمەگەندە شە؟ نۇرسۇلتان نازارباەۆ ەمەسسىز بە؟
– وندا قانە, قولىڭدى جاي, باتا بەرەيىن! – دەدى نۇرسۇلتان نازارباەۆ.
بۇل ءۇشىن پرەزيدەنت الگى بالاعا قوس قولىنداعى بالمۇزداعىن وزىنە ەرگەن ەل اعالارىنا بەرە تۇرۋدى ۇسىندى. بالا بۇدان باس تارتتى دا, بالمۇزداقتاردى قوس قالتاسىنا تىعا سالدى.
«باتا بەرگەن سوڭ, ەلباسى قالتاسىنا قولىن سالىپ, ءاميانىن سۋىردى. بىزگە دە ىم-يشارا جاسادى, ءبارىمىز جاپۇر-جۇپىر قالتالارىمىزعا قول سالدىق, ءبىر بۋما اقشا جيناپ بەردىك, دەپ ەسكە تۇسىرەدى ق.كوشەرباەۆ. – نۇرسۇلتان ءابىش ۇلى اقشانىڭ ءبارىن ءبۇلدىرشىننىڭ اتا-اناسىنا ۇسىندى دا:
– وسى بالانىڭ وقۋىنا, وسۋىنە كەرەكتىنىڭ ءبارىن ساتىپ الىڭىزدار! – دەپ امانات جۇكتەدى.
– اعاسى, ولار ءبارىبىر ماعان ەشتەڭە بەرمەيدى! – دەپ, توسىننان سوزگە ارالاسقان بالاقاي شورت كەستى.
ەلباسى وعان ك ۇلىمسىرەي قارادى: «وندا مەن ءبارىن سەنىڭ وزىڭە بەرەيىن دە!» سوسىن قايتادان ونىڭ اتا-اناسىنا قايىرىلدى: «وسى قارجىنى باسقاعا جۇمساماي, وسى بالانىڭ وزىنە جۇمساڭىزدار! بولايىن دەپ تۇر ەكەن!» – دەپ تاپسىردى. الىستاپ كەتكەننەن كەيىن نۇرسۇلتان ءابىش ۇلى قاسىنداعى ازاماتتاردان: «نە بايقادىڭدار؟» دەپ سۇرادى. ارتىنشا ءوزى جاۋاپ قاتتى: «مىنەزدى بالا ەكەن. تايسالمايدى. بالا كەزدەن ءوز ۇستانىمىن قورعاۋدا تاباندىلىق تانىتىپ, تۇسىندىرۋگە جان سالادى. ەلدى ەرتەڭ العا اكەتەتىن دە وسىلار بولادى! مەن مىنا جاڭا استانانى دا وسى ۇرپاق ءۇشىن سالىپ جاتىرمىن!»
* * *
ەلباسىنىڭ قازاقستان استاناسىن كوشىرۋى – تۇتاس ۇلتتىڭ ساناسىن جاڭارتقان, ساياسي, ەكونوميكالىق جانە رۋحاني جاڭعىرۋ اكەلگەن عالامات جوبا, تاريحي بەتبۇرىس بولدى. بۇل بەتبۇرىس تاۋەلسىزدىكتىڭ العاشقى بەسجىلدىعىندا-اق جاسالدى.
باس قالانى استاناعا اۋىستىرۋمەن بىرگە قازاقستاندا تەرەڭ جاڭارۋلار, بارلىق سالادا تۇبەگەيلى وزگەرىس اكەلگەن رەفورمالار ۇدەمەلى تۇردە جۇرگىزىلە باستادى. ولار ادامداردىڭ پسيحولوگياسىن وزگەرتتى. قازاقستاندىقتار بويىندا ءوزى مەن بالالارىنىڭ جارقىن بولاشاعىن جاڭا جاعدايلاردا ءوز قولىمەن جاساۋعا بولاتىنىنا دەگەن نىق سەنىم بەكىدى.
وتكەنگە شولا قاراساق, باتىسى تورعاي ويپاتىنا تىرەلىپ, شىعىسى قارا ەرتىسكە ەڭكەيىپ بارىپ توقتايتىن, تۇستىگىن بالقاشتىڭ كوگىلدىر تولقىندارى شايسا, تەرىستىگى كوك ەسىلمەن كومكەرىلىپ جاتاتىن ۇلان-عايىر سارىارقا سان عاسىرلاردان بەرى قازاق دەگەن ازاتشىل حالىقتىڭ قۇتتى قونىسى بولىپ كەلەدى. وسى دالادا ادامزات دامۋىنىڭ ۇلى كوشىنە ىقپالىن تيگىزگەن تالاي وقيعالار مەن قۇبىلىستار بولعان.
سارىارقا – قازاق جەرىنىڭ جۇرەگى. بۇل – مىڭجىلدىقتار مەن ادامزاتتىڭ سان الۋان وركەنيەتى قاۋىشقان قاسيەتتى مەكەن. مۇنى ارحەولوگيالىق قازبالار بارىسىندا تابىلعان جادىگەرلەر راستايدى. 1998 جىلى ارحەولوگتار قازىرگى استانادان بەس شاقىرىم جەردە ورتاعاسىرلىق قالا – بوزوقتىڭ ورنىن تاپتى. بوزوق قىپشاق حاندىعىنىڭ ورتالىعى ءرولىن اتقارعان. ەلوردامىز بوي كوتەرگەن اۋماق ارقىلى زامانىندا, ناقتىراق ايتساق, XVI عاسىردا ءسىبىر – ورتالىق ازيا دالا جولى دۇرىلدەگەن, تەڭ-تەڭ جۇك ارتقان كەرۋەندەر اعىلعان.
سارىارقا – قازاقستاننىڭ تابيعي بايلىقتارىنىڭ اسىل قويماسى. دۇنيە ءجۇزى تاريحىنداعى العاشقى مەتاللۋرگيا ورتالىقتارىنىڭ ءبىرى دە وسىندا ورنالاسقان. ياعني سارىارقامىز بۇكىل ادامزاتتىڭ ءوز دامۋىنىڭ كەلەسى كەزەڭىنە كوتەرىلۋىنە ىقپال ەتتى. تاريحشىلاردىڭ ايتۋىنشا, قولا داۋىرىندە قازاق ەلى بۇكىل الەمدەگى ەڭ ءىرى قولا ءوندىرۋشى بولىپتى. سونىڭ ىشىندە ماسەلەن, جالعىز جەزقازعان وڭىرىندە عانا 100 مىڭ توننا مىس وندىرىلگەن. تەك سارىارقادا سول بايىرعى داۋىردە 130 مىڭ توننا قالايى الىنعان, بۇل 15 مىڭ توننا تاپ-تازا قولانى قۇيۋعا جەتكىلىكتى بولعان كورىنەدى. الەمدەگى ەڭ الىپ كولدەردىڭ ءبىرى – بالقاش تا وسىندا.
1999 جىلعى 25 اقپانداعى ساناق قورىتىندىسى بويىنشا استانادا 319,3 مىڭ ادام تۇرىپ جاتقانى ءمالىم بولعان ەدى. ال 2016 جىلعى 4 شىلدەدە, «استانا كۇنىنە» ارنالعان ءىس-شارالاردىڭ باستاۋى بولىپ سانالاتىن «مەملەكەتتىك تۋدى كوتەرۋ» سالتاناتتى راسىمىندە ەلباسى ەلوردانىڭ ميلليونىنشى تۇرعىنى ومىرگە كەلگەنىن جاريالادى.
اقمولانىڭ استاناعا اينالۋى ارقاسىندا سارىارقانىڭ وڭىنە قازاقى قان جۇگىرىپ, وڭىرگە مەملەكەت قۇراۋشى ۇلت وكىلدەرى كوپتەپ كوشىپ كەلە باستادى. ايتپەسە كەيبىر دەرەكتەر بويىنشا وعان دەيىن جەرگىلىكتى تۇرعىندار اراسىندا قازاقتاردىڭ ۇلەس سالماعى 10-15 پايىزدان اسپايتىن بولعان. بۇكىل قالادا قازاق ءتىلدى تەك ءبىر عانا مەكتەپ جۇمىس ىستەگەن. وسىلايشا, تسەلينوگراد اتانىپ, قازاقى تامىرى سولىپ, قازاق ەلىمەن بايلانىسىن تۇپكىلىكتى ۇزە جازداعان بۇل وڭىردە بۇرىن قۇيتىمداي دا ساڭىلاۋ تابا الماي, سانسىراعان ۇلتتىق ءدىل, رۋحاني قاينار ەندى كەڭ ارنا تاۋىپ, ساۋلاپ قۇيىلدى. سودان بەرى استانادان ۇلتتىق جاڭعىرۋدىڭ مەيىرىمدى شۋاعى بۇكىل ەلگە مولىنان توگىلۋدە.
ەلباسى ءوز ەستەلىكتەرىندە تاۋەلسىز قازاقستاننىڭ استاناسىن اۋىستىرۋدىڭ نەگىزگى سەبەپتەرىن ناقتى تۇجىرادى. ەلباسىنىڭ بايلامىنشا, بىرىنشىدەن, استانانى اۋىستىرۋ قازاقستاندى گەوساياسي جاعىنان كۇشەيتۋ قاجەتتىگىنەن تۋىندادى. ەكىنشىدەن, بۇل شەشىمدى قابىلداعاندا قاۋىپسىزدىك ماسەلەسى دە ەسكە الىندى. ۇشىنشىدەن, استانانى اۋىستىرۋ قازاقستاننىڭ ەكونوميكاسىن ساۋىقتىرۋ قاجەتتىگىنەن دە تۋىندادى. ول ەلدىڭ ەكونوميكاسى ءۇشىن تيىمدىلىكتى قامتاماسىز ەتتى. شىنىندا, استانا – دامۋ لوكوموتيۆىنە اينالدى. تورتىنشىدەن, استانانى سولتۇستىك ايماققا قاراي كوشىرە وتىرىپ, ەلباسى ءبىر شاڭىراق استىندا تىرشىلىك ەتكەن ءارتۇرلى ەتنوس وكىلدەرى اراسىنداعى دوستىقتى ساقتاپ قالدى, ولار اراسىنداعى جىككە بولىنۋشىلىك, سەپاراتيزم كورىنىستەرىن جويدى. استانانى كوشىرۋدىڭ گەوستراتەگيالىق, ساياسي, ەكونوميكالىق, الەۋمەتتىك, ەكولوگيالىق جانە باسقا دا قاجەتتىلىكتەرى بولدى.
بىراق وسى ماسەلەنى ەسكەرىپ, ەلباسىنىڭ دانالىعىن تۇسىنگەندەر 90-شى جىلدارى بيلىكتە دە, پارلامەنتتە دە, ءتىپتى زيالى قاۋىم اراسىندا دا تىم از ەدى. شەنەۋنىكتەر جىپ-جىلى الماتىدان قىزىلشۇناق ايازى قالتىراتىپ, الاي-دۇلەي بورانى اقىرعان اقمولاعا كوشۋ تۋرالى جارلىقتى ءدال ءبىر سىبىرگە جەر اۋدارىلعالى جاتقانداي سەزىممەن قارسى العانىن بىلەمىز.
ءاپ دەگەننەن-اق, استانانىڭ الماتىدان كوشىرىلۋى تەك قايتا قونىستانۋشى مەملەكەتتىك قىزمەتشىلەردىڭ عانا ەمەس, ءارى قاراي دا قالادا قالاتىن الماتىلىقتاردىڭ قۋاتتى قارسىلىعىنا ۇشىراعانى تاريحي شىندىق. سۇراۋ كورسەتكەنىندەي, الاتاۋ باۋرايىنداعى اسەم قالا تۇرعىندارىنىڭ باسىم كوپشىلىگى بۇل باستاماعا ءۇزىلدى-كەسىلدى قارسى بولعان. ءتىپتى شاھاردا تامىرىن جايىپ, قۇتتى مەكەن ەتكەن بەلگىلى قوعام قايراتكەرلەرى, زيالى قاۋىم وكىلدەرى, ەڭ تانىمال ارتىستەر مەن انشىلەر «مەنىڭ استانام – الماتى!» دەپ ۇران تاستادى, شەتەلدىك جانە وتاندىق بەتكەۇستار اقپارات قۇرالدارىنا بەرگەن سۇحباتتارىندا كوڭىل تولماستىعىن اشىق ءبىلدىردى.
سودان استانانىڭ تۇساۋكەسەر سالتاناتىندا قازاقستاننىڭ تۇڭعىش پرەزيدەنتى نۇرسۇلتان نازارباەۆقا الماتىلىقتارعا جەكە قايىرىلىپ, باسۋ ايتۋعا تۋرا كەلدى:
ء«بارىمىزدىڭ دە جاستىق داۋرەنىمىز, دەگەندەرىمىزگە جەتۋىمىز, كەمەلىمىزگە كەلۋىمىز سول ءبىر عاجايىپ قالامەن ەتەنە بايلانىستى. جاڭاشا داۋرەندەۋىمىزدىڭ ءدال وسى ءبىر شىرايلى شاعىندا, شاپاعاتتى ساعاتى مەن مەرەيلى مەزەتىندە ازاماتتىعىمىزدىڭ, ازاتتىعىمىزدىڭ اق قۇسىن ءوز باۋىرىنان اسپانداتا سامعاتقان ايالى الماتى مەن ءازىز الاتاۋعا ءبارىمىز دە تىكەمىزدەن تىك تۇرىپ, باسىمىز جەرگە جەتكەنشە, ءيىلىپ, قانشا مارتە تاعزىم ەتسەك تە ارتىقتىعى جوق دەپ بىلەم! دۇنيە تۇرعانشا تۇر, ءجاننات قالپىڭنان جازباي جاساي بەر, جايناي بەر, قىدىر قونىپ, قۇت دارىعان كيەلى قونىس, مۇباراك مەكەن – الماتى! بيىككە سامعاپ, قيىردى شارلاۋ, زاماننان قالماي, زىمىراي زاۋلاۋ – مىنا بىزدەرگە ءوزىڭ بەرگەن تاربيە, ءوزىڭ كورسەتكەن ونەگە, ءوزىڭ تاپسىرعان امانات!» دەپ تولعادى ەلباسى.
ارينە, باس قالا بولۋدان قالعانىمەن, الماتىنىڭ شامى ءوشىپ, جۇلدىزى سونگەن جوق, كەرىسىنشە, شامشىراعى جارقىراي ءتۇستى, ەلىمىزدىڭ باستى مەگاپوليسى رەتىندە دامۋ قارقىنىنا قارقىن قوستى. استانانىڭ كوشىرىلۋى وسىلاي ءىرى قالالارىمىز اراسىندا جاقسى جارىس, يگىلىكتى باسەكەلەستىك تۋدىرىپ, ولاردىڭ ارقايسىسىنىڭ بۋىرقانا دامۋىنا سەرپىن بەردى.
سول تۇستا مەن دە الماتىلىق ەدىم. باۋىر باسقان قالانىڭ باعىنا, بولاشاعىنا الاڭداعانىممەن, ەلباسى باستاماسىنىڭ دۇرىستىعىنا كامىل سەندىم. سونىمەن بىرگە باستامانىڭ قۇنىن تۇسىرۋگە باعىتتالعان قۋاتتى قارسىلىققا كۇنبە-كۇن كۋا بولا ءجۇرىپ, كەيبىر جانداردىڭ ۇلى يدەيالاردى تۇسىنۋگە, ەلباسىنىڭ تۇپكى, تەلەگەي, تەرەڭ ويلارىن, تولعامىن ۇعىنۋعا جارامايتىنىنا شىن نالىدىم.
مەملەكەتتىك قىزمەتشىلەردى, قايراتكەرلەردى ءبىرىنشى كەزەكتە ۇرەيلەندىرگەنى – «قىتىمىر كليمات» ەدى. ارقانى ارقىراعان ايازسىز, تۇتەگەن بورانسىز كوز الدىمىزعا ەلەستەتە قويۋ مۇمكىن ەمەس. بۇل ونىڭ تابيعات بەرگەن وزىندىك ەرەكشەلىگى, دارا قاسيەتى. بۇل جەردىڭ تابيعاتى بۇگىن اق كورپەسىن جامىلىپ, اسەم كۇيگە بولەنىپ تۇرادى دا, ارتىنشا قىلىمسىعان قىلىعىن ءۇزىپ, قاھارىنا مىنەدى. مۇندايدا باسقانى ايتپاعاننىڭ وزىندە, كوشەنى قاردان تازارتىپ, جۇرگىنشىلەر مەن كولىكتىلەرگە قوزعالۋعا جاعداي جاساۋ ءبىراز كۇش پەن قاۋقاردى تالاپ ەتەتىنى بەلگىلى.
«ليۋتىە يانۆارسكيە حولودا ي وبرۋشيۆشيەسيا سنەجنىە مەگاتوننى ۆپولنە موجنو بىلو بى پريچيسليت ك كاتاستروفيچەسكيم ياۆلەنيام» – بەلدى رەسمي باسىلىمداردىڭ ءوزى وسى سىڭايلى سۋىق سوزدەرمەن ۇرەيدى ۇشىرا ءتۇستى. شىنىندا, الاي-دۇلەي بوران مەن ساقىلداعان سارى اياز سول كەزدە مۇندا ناۋرىز ايىنىڭ اياعىنا دەيىن شىر اينالا قايتا-قايتا سوعىپ, اڭدى ىنىنە, ادامدى ۇيىنە قۋىپ تىعاتىن. اقمولادا قاھارلى قىستىڭ قاتقىل قاباعى الماتىدان «اۋىپ» كەلگەن جۇرتشىلىققا وڭاي تيمەدى. تەمىردىڭ ءوزىن كوكايازداندىرىپ, قارىپ جىبەرگەن سۇراپىل اياز كارىنە مىنگەندە, اقمولاعا ەمەس, بەينە ءبىر اركتيكاعا اياق باسقانداي بۋلىعىپ, قينالا دەمىگىپ, قاقالاسىڭ.
بيىك لاۋازىمدى تۇلعالاردىڭ ءوزى كوپ ۋاقىت بويى الماتىدان كىندىگىن ۇزە الماي ءجۇردى, مەملەكەتتىك قىزمەتشىلەردىڭ ءبىرازى اپتاداعى جۇمىس كۇندەرىن ەلوردادا وتكەرىپ, ال دەمالىس كۇندەرى الماتىعا كەرى شۇبىراتىن. تابيعاتتىڭ جان جىلىتار شۋاعىنا شەكسىز شومىلعان تاۋ بوكتەرىنە, اسقارالى الاتاۋدىڭ ايالى الاقانىنا قونعان اسەم شاھارعا تەڭ كەلەر تەڭدەسى تابىلادى دەگەنگە ولار سەنبەگەن, سەنگىسى كەلمەگەن.
قازىر ويلايمىن, ەگەر قازاقستاننىڭ باسشىسى باسقا ادام بولعاندا, جاپپاي قىسىمعا شىداماي, مۇنداي تاريحي ۇلى شەشىمدى قۇندىلىقتىڭ ەمەس, قوقىستىڭ ەنشىسىنە تاستاپ, العان بەتىنەن كەرى قايتۋى مۇمكىن بە ەدى. ويتكەنى كوشباسشى دا – ادام, ءومىردىڭ كولەڭكەلى ءھام كومەسكى تۇستارى, وزگەلەردىڭ وڭمەڭنەن وتەر سۋىق كوزدەرى ءار تۇستان انتالاپ, تۇمشالاعاندا ويعا كەلگەن ءىرى ىسكە دارمەنىن كەلتىرمەي تاستاۋى عاجاپ ەمەس.
نۇرسۇلتان نازارباەۆ سونىڭ بارىنە توتەپ بەردى, كەزەكتى تاعدىر سىناعىنا مورت سىنبادى. ءوز باستاماسىنىڭ دۇرىستىعىن پارمەندى ىستەرمەن دالەلدەپ شىقتى. ءوزى دە باس بولىپ, استاناعا كوشتى.
قارىنىڭ ءار كريستالى حرۋستالداي سىڭعىرلاعان اقمولا توسىنە مىعىم تابان تىرەپ, ىزعارىنان قايمىقپاي, كوكىرەك كەرە تازا اۋانى قۇشىرلانا جۇتۋ ونىڭ قولىنان كەلدى. ءبىز دە ەلباسىعا ەرىپ, «تاۋدان ءتۇسىپ», كەڭ دالانىڭ كەرىمسال اۋاسىنا ۇيرەندىك. ادام دەنەسىن تۇرشىگە تىتىركەندىرەتىن قاڭتاردىڭ قاڭىلتىر ايازىنا شىنىقتىق. ۇلتتىڭ قيىندىقتارعا قارسى يممۋنيتەتى كوتەرىلدى.
استانانىڭ ورنىعۋىمەن بىرگە ءبىز بۇل ءوڭىردىڭ سۇلۋلىعىنا سۇقتانا قاراپ, كوركەمدىگىن كورە باستادىق. اقىن اقۇشتاپ باقتىگەرەەۆا ايتقانداي, شىنىندا, «كوز جەتپەس كوكجيەككە قاراساڭ, كوگىلدىر دالا كولبەيدى. قىزعالداعىن سامالدىڭ ەكپىنى تەربەتكەن بەتكەيدەن قۇستار شىرىلى ءومىردىڭ ءتاتتى ءبىر اۋەنىن باستاعانداي! كوك اسپانعا كۇلە شىققان جارىق كۇن بۇگىنگى ءوز ەنشىمىزگە تيگەن كوگىلدىر تۋدىڭ تابيعاتتاعى كوشىرمەسى ءتارىزدى. كوك تۋى جەلبىرەگەن ەل ەكەنى ەسىڭە تۇسكەندە, مىنا دالا وزىڭدىكى ەكەنى ەسىڭە تۇسكەندە, كەۋدەڭدى كەرنەگەن قۋانىشتى سەزىمدى ايتۋعا ءتىل جەتپەيتىن عاجايىپ ءبىر كۇيگە بولەنەسىڭ».
تۇڭعىش پرەزيدەنتىمىزدىڭ بۇل باستاماسى وسى قىرىمەن دە قىمبات. ول ۇلتقا كەلگەن جاڭا قۇندىلىق!
ء«بىز استانانى مۇلدە جاڭادان سالدىق. ونى كوشىرۋگە بايلانىستى بولعان بارلىق پروبلەمالاردى جۇرەگىمىزدەن وتكىزدىك. بۇل ارمان ەدى. ەندى ول – تاماشا قالا, قازاقستاننىڭ ماقتانىشى جانە جۇرەگى!» – دەيدى ەلباسى.
قازاقستاننىڭ تۇڭعىش پرەزيدەنتىنىڭ ءدال سول داعدارىستى 90-شى جىلدارى استانانى كوشىرۋ باستاماسىن جاريالاپ, قارقىندى تۇردە ىسكە اسىرا باستاۋىنىڭ تاعى ءبىر ستراتەگيالىق قىرىن, ماڭىزدى سىرىن, سالماقتى قۇنىن اڭعارامىز. بۇل ۇلتتىڭ بويىنا سەنىم قۇيۋ, تىڭ قۋات دارىتۋ ءۇشىن قاجەت ەدى...
تۇتاس ۇلت ىشتەگى كەرى تارتار «كەسىر تەجەگىشتى» ىستەن شىعارىپ, جىگەر مەن قايراتتى كومەككە شاقىرىپ, جاسامپازدىق جولىندا ەركىن قيمىلداۋعا, قارىمدى ادىمداۋعا كوشتى.
باقىتبەك سماعۇل, پارلامەنت ءماجىلىسىنىڭ دەپۋتاتى