ۇلتتىق نەيروحيرۋرگيا ورتالىعىنا – 10 جىل

فورۋمدى اشقان گۇلشارا ابدىقالىقوۆا كورنەكتى نەيروحيرۋرگ, رەسەي عىلىم اكا­دە­ميا­سىنىڭ اكادەميگى ا.پوتا­پوۆتىڭ 70 جاسقا تولۋىنا وراي جولداعان قازاقستان پرە­زي­دەنتىنىڭ قۇتتىقتاۋ حاتىن وقىپ بەردى. 

ەلباسى ءوز قۇتتىقتاۋىندا ۇلتتىق نەيروحيرۋرگيا ور­تالىعىن قۇرۋ ىسىنە ا.پوتا­پوۆتىڭ بەلسەندى كاسىبي كومەك كورسەتكەنىن اتاپ وتكەن. ء «سىزدىڭ بەلسەندى كومەك جاساپ, كاسىبي كەڭەستەر بەرۋىڭىز ورتالىق جۇمىسىنىڭ جولعا قويىلىپ, قالىپتاسۋىنا ايتارلىقتاي ۇلەس قوستى», دەلىنگەن قۇتتىقتاۋدا. مەملەكەت باسشىسى سونداي-اق ا.پوتاپوۆتىڭ ەڭبەك جولى ادامدار ءومىرىن اجالدان اراشالايتىن, دەنساۋلىعىنا قورعان بولار قۇرمەتتى ماماندىققا قالتقىسىز قىزمەت ەتۋدىڭ جارقىن ۇلگىسى ەكەنىن, وسى جاۋاپتى جۇمىستا ءوزىن الەمگە بەدەلدى دە بىلىكتى نەيروحيرۋرگ رەتىندە دالەلدەپ, ادامزاتتى العا جەتەلەيتىن كوپتەگەن عىلىمي ەڭبەكتەردى دۇنيەگە اكەلگەنىن ايتقان. 

مەملەكەتتىك حاتشى گۇل­شارا ابدىقالىقوۆا نۇر­سۇلتان نازارباەۆتىڭ ء«تور­تىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنا سايكەس, قازاقستاننىڭ يندۋستريا 4.0, ونىڭ ىشىندە مە­ديتسينا سالاسى ەلەمەنتتەرىن ەنگىزۋگە كىرىسكەنىن ايتتى.

– پرەزيدەنتتىڭ باستاماسىمەن 2008 جىلى نەگىزى قالانعان ۇلتتىق نەيروحيرۋرگيا ورتالىعى دەنساۋلىق ساقتاۋ سالاسىنداعى يننوۆاتسيالىق جەتەكشى مەكەمەلەردىڭ ءبىرى بولىپ سانالادى. بۇگىندە ول ورتالىق ازياداعى كوش باستاۋ­شى كلينيكانىڭ بىرىنە اينالدى, – دەدى گ.ابدىقالىقوۆا.

ۇلتتىق نەيروحيرۋرگيا ورتالىعىندا 10 جىلدىڭ ىشىندە 37 مىڭنان استام ادام ەم قابىلدادى, 25 مىڭنان اسا وتا جاسالدى, 66 نەيروحيرۋرگيالىق جاڭا تەحنولوگيا ەنگىزىلدى. ونىڭ بازاسىندا قازاقستاندا العاش رەت نەيروحيرۋرگيانىڭ جاڭا سالالارى – ميكرونەيروحيرۋرگيا, ەندوۆاسكۋليارلىق, ەن­دوس­كوپيالىق جانە فۋنكتسيونالدىق نەيروحيرۋرگيا ەنگىزىلدى.

كىشىينۆازيالىق ج ۇلىن نەيروحيرۋرگياسى, تامىرلى جانە فۋنكتسيونالدى نەيروحيرۋرگيا, ەندوسكوپيالىق نەيروحيرۋرگيا سياقتى سالاداعى باسىم باعىتتاردى دامىتقان ورتالىقتىڭ اۋىز تولتىرا ايتاتىن جەتىستىكتەرىنىڭ ءبىرى– نەيروحيرۋرگيالىق نوزولوگيا­لار بويىنشا پاتسيەنتتەردى ەمدەۋ جانە نەيروحيرۋرگيالىق پاتولوگيا سالدارىنان مۇگە­دەك­تىككە ۇشىراۋدى ازايتۋ, ادام ءومىرىنىڭ ساپاسىن جاقسارتىپ, عۇمىرىن ۇزارتۋ بولدى. سون­­دىقتان دا استانانىڭ 20 جىل­­دىعى مەن «ۇلتتىق نەيروحي­رۋرگيا ورتالىعى» اق-تىڭ 10 جىلدىعى اياسىندا ءوتىپ جاتقان حالىقارالىق نەيرو­حي­رۋرگيالىق فورۋمعا جينالعان ەلىمىزدىڭ بارلىق وڭىرلەرىنەن جانە 20-دان استام ەلدەن كەلگەن حيرۋرگتەر بۇگىنگى تاڭدا كلينيكانىڭ نەيروحيرۋرگيا سالاسىنداعى مەديتسينالىق ين­نو­ۆاتسيا­لار­دىڭ كوشباسشىسى, جە­تەكشى عىلىمي جانە كلي­ني­كا­لىق ورتالىق رەتىندەگى قىزمەتىنە دەن قويدى. 

سوڭىندا مەملەكەتتىك حاتشى فورۋمعا قاتىسۋشىلارعا شىعارماشىلىق تابىس تىلەپ, استانانىڭ 20 جىلدىق مەرەيتويىنا ارنالعان مەرەكەلىك سالتاناتتى ءىس-شارالارعا قاتىسۋعا شاقىردى.

مۇنان سوڭ فورۋمدا دەن­ساۋ­لىق ساقتاۋ ءمينيسترى ە.ءبىر­تانوۆ, استانا قالا­سىنىڭ اكىمى ءا.يسەكەشەۆ, پار­لامەنت ءما­جىلىسىنىڭ دەپۋتا­تى ن.ءابدىروۆ مەرەكەلەر توعى­سىپ جاتقان جاقسى كۇنمەن نەيرو­حيرۋرگتەردى قۇتتىقتادى.

سالتاناتتى شارانىڭ ەن­دى­گى ءبىر ەلەڭ ەتەرلىك تۇسى عارىش­تان جەتكەن قۇتتىقتاۋ بولدى. عارىشتىق ەكيپاج مۇشە­لەرى ولەگ ارتەمەۆ پەن سەرگەي موتور عارىشكەرلەر مەن نەي­رو­حيرۋرگتەردىڭ ماماندىقتارى ءبىر-بىرىنە ۇسقايتىنىن, ەكەۋى دە جاراتىلىستىڭ قۇپياسى مول الەمى – مي مەن عارىشتى زەرت­تەيتىنىن ايتا كەلىپ, استانانىڭ 20 جىلدىعىمەن جانە ۇلتتىق نەيروحيرۋرگيا ورتالىعىنىڭ 10 جىلدىعىمەن قۇتتىقتادى جانە دارىگەرلەردىڭ ەڭبەكتەرىنە تولايىم تابىستار تىلەدى. 

انار تولەۋحانقىزى, «ەگەمەن قازاقستان»