سەمەيلىكتەر بۇگىن تەمىرجول ۆوكزالىندا «قازاقستان بارىسى-2018» سايىسىنىڭ جۇلدەگەرلەرى ەراسىل قاجىباەۆ پەن ايبەك نۇعىماروۆتى قارسى الدى. سەمەي قالاسىنىڭ اكىمى ەرماك ءسالىموۆ, «شىعىس» وڭىرلىك اسكەري قولباسشىلىعىنىڭ قولباسشىسى, گەنەرال-مايور نۇرلان قاشاعانوۆتارمەن بىرگە قالا حالقى, بالۋانداردىڭ تۋعان-تۋىستارى قۇشاق-قۇشاق گۇل اكەلىپ, شاشۋ شاشتى.
ايتا كەتۋ كەرەك, «قازاقستان بارىسى-2018» بەلدەسۋىنىڭ فينالىندا ەرجان شىنكەەۆ «اسكەر بارىسى» ەراسىل قاجىباەۆتى ازعانتاي ۇپاي سانىمەن ۇتىپ, باس جۇلدە يەگەرى اتانعان ەدى. اسكەر بارىسى ەراسىل قاجىباەۆ كۇمىس بەلبەۋدىڭ, ايبەك نۇعىماروۆ قولا بەلبەۋدىڭ يەگەرى بولدى. ەكىنشى جانە ءۇشىنشى ورىنعا سايكەسىنشە كۇمىس جانە قولا بەلبەۋ تاپسىرىلدى. ءىىى ورىن العان بالۋانعا 1,8 ملن تەڭگە, ال ونىڭ باپكەرىنە 900 مىڭ تەڭگە تابىستالدى. ال ءىى ورىن ءۇشىن 5,5 ميلليون تەڭگە, ونىڭ باپكەرىنە 1,8 ملن تەڭگە بەرىلدى.
– ەلباسى نۇرسۇلتان نازارباەۆتىڭ تاپسىرماسىمەن «قازاقستان بارىسى» وسىمەن 8-رەت ءوتىپ وتىر. ەلىمىز بويىنشا 37 بالۋان قاتىسسا, ونىڭ 8-ءى ءبىزدىڭ سەمەيلىكتەر بولعانى قۋانتادى, – دەدى قالا اكىمى ەرماك ءسالىموۆ, – ەلگە ۇلگى بولاتىن وسىنداي سپورتشىلارىمىزدىڭ قاتارى ارتا بەرسىن! ەل نامىسىن كوتەرىپ, ايبەكتىڭ جولىن جالعاپ جۇرگەن ەراسىل باۋىرىمىزعا ۇلكەن راحمەت, تابىستار تىلەيمىز. «اسكەر بارىسى» دا بولدى, قىزمەتىن ابىرويمەن اتقاردى, مىنە ءبىزدىڭ سەمەيلىكتەر 8 جىل بويى ەكى التىن, ەكى كۇمىس, ءتورت قولا جۇلدەگە يە بولىپ وتىر, بۇل ۇلكەن جەتىستىك. جەڭىس قۇتتى بولسىن, حالقىم!
– «قازاقستان بارىسىنا» وسىمەن 8-رەت قاتىسىپ وتىرمىز, – دەدى داڭقتى بالۋان ايبەك نۇعىماروۆ, – 8 جىلدىڭ ىشىندە مەن تيىسىنشە جۇلدەلى ورىنداردان كورىنىپ ءجۇردىم. قالا باسشىسى ەرماك سالىموۆكە جانە ەراسىل قاجىباەۆ قىزمەت ەتەتىن «شىعىس» وڭىرلىك اسكەري قولباسشىلىعىنىڭ قولباسشىسى, گەنەرال-مايور نۇرلان قاشاعانوۆقا وسىنداي قولداۋلارى ءۇشىن ۇلكەن راحمەت! جىلدان جىلعا «قازاقستان بارىسىنىڭ» بەدەلى ارتىپ كەلەدى. جاستاردىڭ دا قىزىعۋشىلىعى بار. بيىل ەراسىلدىڭ وسىنداي جەتىستىككە جەتۋى مەنى قاتتى قۋانتتى.
– ءبىر جىل بويى دايىندالىپ كەلدىم, ويلاعانىم التىن ەدى, بۇيىرعانى وسى بولدى. ءبىرىنشى رەت قاتىسىپ تۇرمىن. التىن العانشا قاتىسامىن, جانتالاسامىن. الماتى قالاسىنداعى تسسكا-دا اسكەري سالادا قىزمەت ەتەمىن. بيىل «اسكەر بارىسىنا» قاتىسىپ, سودان جولداما الدىم. ءبىرىنشى بەلدەسۋىمدە رۋسلان ابدىرازاقوۆپەن شىقتىم. ول دا مىقتى بالۋان. ءوزىم بورودۋليحا اۋدانىندا تۋدىم, بەسقاراعاي اۋدانىندا ءوستىم, سەمەيدە وقىپ, ءبىلىم الدىم, – دەدى ەراسىل قاجىباەۆ.
ەراسىل قاجىباەۆ قىزمەت ەتەتىن «شىعىس» وڭىرلىك اسكەري قولباسشىلىعىنىڭ قولباسشىسى, گەنەرال-مايور نۇرلان قاشاعانوۆ جەڭىمپازعا «شىعىس» وڭىرلىك اسكەري قولباسشىلىعىنىڭ مەدالىن تابىستادى.
ەراسىلدىڭ باپكەرى ەرجان بەيسەنباي ۇلى جارىستىڭ جوعارى دەڭگەيدە وتكەنىن ايتىپ, ءۇشىنشى بەلدەسۋدە قولىنان جاراقات الماعاندا التىننان ءۇمىتتى ەكەنىن جەتكىزدى.
راۋشان نۇعمانبەكوۆا
سۋرەتتەر اۆتوردىكى.
سەمەي