«بجزق» اق قارجى جۋرناليستيكاسى بويىنشا باق وكىلدەرى ءۇشىن ءۇشىنشى رەت وقىتۋ باعدارلاماسىن جۇزەگە اسىرماق. زەينەتاقىمەن قامسىزداندىرۋ سالاسىن قامتيتىن بۇل باعدارلامانىڭ باستى تاقىرىبى: «قر جيناقتاۋشى زەينەتاقى جۇيەسىنە 20 جىل: قورىتىندىلار جانە دامۋ كەلەشەگى».
جازعى جۋرناليستيكا مەكتەبى – بۇل سەرتيفيكاتتاۋشى باعدارلاما. ول مەرزىمدى باسىلىمدار, راديو, تەلەارنالار جانە ونلاين جۇزىندەگى بۇقارالىق اقپارات قۇرالدارىنا ساپالى جۋرناليستىك ماتەريالدار دايىنداۋ ءۇشىن نەگىزگى قۇرالدارمەن جۇمىس ىستەۋ داعدىسىن دامىتادى. سونىمەن قاتار جازعى مەكتەپ ءوزارا ءبىلىم جانە تاجىريبە الماسۋعا, سونداي-اق بجزق ماماندارىنان تىكەلەي اقپارات الۋعا مۇمكىندىك بەرەتىن بىرەگەي تۇعىرناما.
جازعى مەكتەپتىڭ ماقساتى:
– ءبىلىم الۋعا, ءوزارا تاجىريبە الماسۋعا, سونداي-اق, جۋرناليستەر مەن بلوگەرلەردىڭ كاسىبي تۇرعىدا بىرلەسە ارەكەت جاساۋىنا مۇمكىندىك بەرەتىن ورتا جاساۋ;
– زەينەتاقىمەن قامسىزداندىرۋ سالاسى بويىنشا جۋرناليستەردىڭ بىلىكتىلىگىن دامىتۋ;
– جوعارى ساپالى تالدامالىق ماتەريال دايىندايتىن جۋرناليستەردىڭ زەينەتاقىمەن قامسىزداندىرۋ سالاسى بويىنشا قۇزىرەتىن ارتتىرۋ.
بيىلعى وقىتۋ مودۋلدەرى زەينەتاقى قۇقىعىن قالىپتاستىرۋ جانە جۇزەگە اسىرۋدى, قولدانىستاعى ەلەكتروندىق قىزمەتتەردىڭ قالاي جۇمىس ىستەيتىندىگىن كورسەتۋدى, الەم ەلدەرىنىڭ جيناقتاۋشى زەينەتاقى جۇيەسىمەن تانىسۋدى, بولاشاق زەينەتاقىنى جوسپارلاۋ جانە ەسەپتەۋ تاقىرىپتارىن قامتيدى.
جازعى مەكتەپ شاراسى «بجزق» اق الماتى قالاسىنداعى فيليالىندا 13 شىلدە كۇنى ورىس تىلىندە جانە 16 شىلدە كۇنى قازاق تىلىندە وتكىزىلەدى. ساراپشى رەتىندە قوردىڭ جانە ۇلتتىق بانكتىڭ ماماندارى قاتىسادى. ولار قازاقستان رەسپۋبليكاسىنىڭ زەينەتاقى زاڭناماسىنداعى وزگەرىستەر, زەينەتاقى قۇقىعىن قالىپتاستىرۋ جانە جۇزەگە اسىرۋ ماسەلەلەرى جانە حالىقارالىق زەينەتاقى جۇيەلەرىنىڭ مودەلدەرى تۋرالى اڭگىمەلەيتىن بولادى.بۇدان باسقا, «بولاشاق زەينەتاقىنى قالاي جوسپارلاۋعا بولادى؟» دەگەن تاقىرىپتا شەبەرلىك سىنىبى وتكىزىلەدى.
قاتىسۋشىلار قوردىڭ كورسەتەتىن قىزمەتتەرى جانە وڭىرلىك جەلىسىنىڭ جۇمىستارىمەن تانىسادى. سونداي-اق, ساراپشىلاردان وزدەرىنە كەرەكتى ساۋالداردىڭ جاۋابىن تابادى.
دايىنداعان ايناش ەسالي,
«ەگەمەن قازاقستان»
الماتى