قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ حالىقارالىق تۇركى اكادەمياسىنىڭ پرەزيدەنتى دارحان قىدىرالىمەن كەزدەستى, دەپ حابارلايدى president.kg.
كەزدەسۋدە س.جەەنبەكوۆ تۇركى اكادەمياسى كۇللى تۇركى ءتىلدى ەلدەردىڭ رۋحاني مۇراسىن, مادەنيەتىن زەرتتەۋدە ۇلكەن جۇمىس جاساپ جاتقانىنا توقتالىپ, ۇيىمنىڭ قىزمەتىنە جوعارى باعا بەردى.
«قىرعىز حالقىنىڭ رۋحاني مۇراسىن زەرتتەپ, ونى تۇركى الەمىنە تانىتۋداعى جۇمىستارىڭىز قاتتى قۋانتتى. «ماناس» ەپوسى, ۇلى جازۋشى شىڭعىس ايتماتوۆ شىعارمالارى سياقتى مىقتى ادەبي تۋىندىلاردى ورتاق تۇركى مادەنيەتىنىڭ قازىناسىنا قوسىپ, جاريالاپ جاتقاندارىڭىز تۇركى ءتىلدى ەلدەردىڭ جاقىنداسۋىنا, رۋحاني بايلانىسىنا وزگەشە اسەر ەتەدى», دەدى قىرعىز پرەزيدەنتى.
سونداي-اق س.جەەنبەكوۆ سوڭعى ەكى جىل ىشىندە تۇركى اكادەمياسىندا قىرعىز ادەبيەتى مەن فولكلورىنا, مادەنيەتىنە ارنالعان 20-دان استام ەڭبەك جارىق كورگەنىن ەرەكشە اتاپ ءوتتى.
«تۇركى اكادەمياسى ءسىزدىڭ جەتەكشىلىگىڭىزبەن تۇركى تىلدەس ەلدەر اراسىنا رۋحاني كوپىر سالىپ, ءبىر تۋعاندىعىمىزدى, تۇپكى مادەنيەتىمىزدى, سالت-سانامىزدى, مادەني قارىم-قاتىناسىمىزدى شىڭدايدى دەگەن سەنىمدەمىن», دەدى قىرعىز مەملەكەتىنىڭ باسشىسى.
تۇركى اكادەمياسىنىڭ پرەزيدەنتى دارحان قىدىرالى شىڭعىس ايتماتوۆ جىلىنا وراي پاريجدە, يۋنەسكو-نىڭ شتاب-پاتەرىندە, استانا, بىشكەك, تاشكەنت شارالارىندا ۇلى جازۋشىعا ارنالعان كونفەرەنتسيالار ءوتىپ, كىتاپتار شىعارىلعانىن, «ماناس» ەپوسى, قىرعىزدىڭ مادەنيەتى مەن تاريحىنا قاتىستى ءىس-شارالار ءجۇرىپ جاتقانىن ايتتى.
«تۇركى اكادەمياسى حالىقارالىق ۇيىم رەتىندە بارلىق ءىس-شارالارعا قاتىسىپ, ونىڭ ىشىندە قىرعىز ەلىندە دە ءوتىپ جاتقان مادەني-رۋحاني ورتاق شارالارعا ءوز ۇلەسىن قوسۋدا. ءبىزدىڭ ماقسات – تۇركى دۇنيەسىنىڭ عىلىمي بايلانىستارىن نىعايتۋ», دەدى د.قىدىرالى.
سونىمەن قاتار دارحان قىدىرالى جانە تۇركى اكادەمياسىنىڭ وكىلى, پروفەسسور قادىرالى قوڭقاباەۆ اراب تىلىندە جازىلعان «ماناس» ەپوسىنىڭ ءتۇرلى نۇسقاداعى قولجازبا كىتابىمەن تانىستىردى.
ق.قوڭقاباەۆتىڭ ايتۋىنشا 1286 بەتتىك بۇل قولجازبا 1896 جىلدان 1983 جىلعا دەيىن شۋ اڭعارىندا ءومىر سۇرگەن مەدەر مەرگەنباەۆ اقساقالدىڭ ەڭبەگى. مۇنىڭ 16 بەتى تىنىبەك ماناسشىعا, 34 بەتى ساياكباي كارالاەۆكە, ال 108 بەتى توگولوك مولداعا تيەسىلى. «قولجازبانىڭ قالعان بەتتەرىندە مەدەر مەرگەنباەۆ اقساقالدىڭ ساعىنباي وروزباكوۆتىڭ ءوز اۋزىنان جازىپ العان نۇسقاسى بار. بۇل قولجازبا ساعىنباي وروزباكوۆتىڭ نۇسقاسىنداعى كىتاپپەن سالىستىرىلىپ, عىلىمي پىكىرلەرمەن قوسا باسپاعا دايىندالىپ جاتىر», دەدى ق.قوڭقاباەۆ.
اكادەميا باسشىسى پرەزيدەنت سوورونباي جەەنبەكوۆكە التايدىڭ 3000 مەتر بيىكتىگىنەن تابىلىپ, جاڭارتىلعان قىل قوبىزدى سىيعا تارتتى.
س.جەەنبەكوۆ ريزاشىلىعىن ءبىلدىرىپ, قولجازبانى باسىپ شىعارۋعا كومەكتەسەتىنىن جەتكىزدى. سونداي-اق قىل قوبىزدى بىشكەكتەگى تاريح مۋزەيىنە تابىستايتىنىن ايتتى.