پارلامەنت سەناتىنىڭ توراعاسى قاسىم-جومارت توقاەۆ بريتاندىق BBC تەلەكومپانياسىنىڭ «Hardtalk» باعدارلاماسىنداعى سۇحباتىنا بايلانىستى قازاقستاندىق بۇقارالىق اقپارات قۇرالدارىنىڭ ءوتىنىشى بويىنشا تۇسىندىرمە بەردى, دەپ حابارلايدى سەناتتىڭ ءباسپاسوز قىزمەتى.
توراعا اڭگىمە بارىسىندا كوپتەگەن وتكىر ماسەلەلەر تالقىلانعانىن اتاپ ءوتتى. «بۇقارالىق اقپارات قۇرالدارىندا ەرەكشە ىقىلاس تۋعىزعان سۇحباتتىڭ ءبىر بولىگىنە قاتىستى ايتار بولساق, مەنىڭ جاۋابىمنىڭ ماعىناسى ەلباسىنىڭ مارتەبەسى تۇڭعىش پرەزيدەنت – ەلباسى تۋرالى زاڭدا دا, تاياۋدا قابىلدانعان «قاۋىپسىزدىك كەڭەسى تۋرالى» زاڭدا دا ناقتىلانعانى تۋرالى بولاتىن. پرەزيدەنت كەلەسى سايلاۋعا قاتىسسا دا, قاتىسپاسا دا ىشكى جانە سىرتقى ساياسات ماسەلەلەرى بويىنشا سوڭعى شەشىمدى ءوزى ايتادى. ول زاڭدا بەلگىلەنگەن, ول ەلباسى جانە سولاي قالا بەرەدى.
ق. توقاەۆتىڭ ايتۋىنشا, ەلباسى الداعى سايلاۋعا قاتىسۋ تۋرالى شەشىمدى پاراساتتى ءارى دانا ادام رەتىندە ءوزى قابىلدايدى.
«حالىقارالىق ارەنادا ەلباسىنىڭ بەدەلى زور, - دەپ اتاپ ءوتتى ق. توقاەۆ. – ونى ءىس جۇزىندە ءبىزدىڭ ەلىمىزدىڭ بارلىق تۇرعىندارى قولداپ وتىر, سوندىقتان ول سۇحبات كەزىندە ايتىلعاندارعا قارا بۇلتتى ءتوندىرۋدىڭ قاجەتى جوق. ول وتە قىزىقتى ءارى كۇردەلى سۇحبات بولدى. «Hardtalk» («اۋىر اڭگىمە») اياسىندا سۇحبات بەرۋ وڭاي ەمەس ەكەنى تۇسىنىكتى. سوندا دا مەن وسى اڭگىمەلەسۋگە كەلىسكەن دۇرىس دەپ ەسەپتەدىم, ويتكەنى ءبىز دەموكراتيانى جانە ەلىمىزدىڭ ەكونوميكالىق الەۋەتىن دامىتۋ ءۇشىن ەل ىشىندە نە ىستەپ جاتقانىمىزدى باتىس ءتۇسىنۋ ءۇشىن ءجيى ايتىپ تۇرۋىمىز قاجەت. مەنىڭ ويىمشا, سۇحبات بۇل تۇرعىدا پايدالى بولدى».