مەملەكەت باسشىسى نۇرسۇلتان نازارباەۆ ءۇندىستان پرەمەر-ءمينيسترى نارەندرا موديمەن كەزدەستى
قازاقستان پرەزيدەنتى ەكى ەل اراسىنداعى قارىم-قاتىناستاردىڭ دايەكتى دامىپ كەلە جاتقانىنا توقتالىپ, ءۇندىستان پرەمەر-ءمينيسترىن ەلدەرىنىڭ شانحاي ىنتىماقتاستىق ۇيىمىنا تولىق قۇقىلى مۇشە بولۋىمەن قۇتتىقتادى. نۇرسۇلتان نازارباەۆ وسى ماسەلەگە بايلانىستى قازاقستاننىڭ ءۇندىستاندى اۋەل باستان تولىق قولداعانىن ايتتى.
– بىلتىر بىزگە قولداۋ كورسەتىپ, استانادا وتكەن حالىقارالىق «ەكسپو-2017» مامانداندىرىلعان كورمەسىنە كەلگەنىڭىز ءۇشىن سىزگە ريزاشىلىعىمدى بىلدىرەمىن. سول ارقىلى بۇل شاراعا حالىقارالىق دەڭگەيدە نازار اۋدارىلۋىنا سەپتىگىڭىزدى تيگىزدىڭىز, – دەدى قازاقستان پرەزيدەنتى.
مەملەكەت باسشىسى قول جەتكىزىلگەن ۋاعدالاستىقتاردى جۇزەگە اسىرۋ ناتيجەسىندە بىلتىردىڭ وزىندە قازاقستان مەن ءۇندىستان اراسىنداعى تاۋار اينالىمى 53 پايىزعا ارتىپ, 1 ميلليارد دوللارعا جەتكەنىن اتاپ ءوتتى.
– قازىرگى ۋاقىتتا ەلدەرىمىز اراسىندا عارىش, فارماتسەۆتيكا سالاسىنداعى, اسكەري-تەحنيكالىق سەكتورداعى جانە باسقا دا سالالارداعى ىنتىماقتاستىق بەلسەندى دامىپ كەلەدى. بىزگە وسى باعىتتاعى جۇمىستاردى جالعاستىرۋ كەرەك, – دەدى قازاقستان پرەزيدەنتى.
ءۇندىستان پرەمەر-ءمينيسترى ءۇندىستان وكىلىنىڭ بىرىككەن ۇلتتار ۇيىمى حالىقارالىق سوتىنىڭ قۇرامىنا سايلانۋىنا قولداۋ كورسەتكەنى ءۇشىن نۇرسۇلتان نازارباەۆقا العىس ايتىپ, ەكى ەل اراسىنداعى كوپ جاقتى ىنتىماقتاستىقتىڭ تابىستى دامىپ, نىعايىپ كەلە جاتقانىنا توقتالدى.
– ءسىزدى قازاقستاننىڭ ەلورداسى – استانا قالاسىنىڭ 20 جىلدىعىمەن قۇتتىقتايمىن جانە «استانا» حالىقارالىق قارجى ورتالىعىنىڭ اشىلۋىنا بايلانىستى ىزگى نيەتىمدى بىلدىرەمىن, – دەدى ءۇندىستان پرەمەر-ءمينيسترى.
كەزدەسۋ سوڭىندا نارەندرا مودي قازاقستاننىڭ ءۇندىستان ءۇشىن ورتالىق ازياداعى ەڭ ءىرى ساۋدا سەرىكتەستەرىنىڭ ءبىرى سانالاتىنىنا توقتالىپ, ۇندىستاننىڭ «تسيفرلىق قازاقستان» باعدارلاماسى اياسىنداعى جوبالاردى جۇزەگە اسىرۋعا مۇددەلىلىك تانىتىپ وتىرعانىن جەتكىزدى. سونىمەن قاتار, ءۇندىستان پرەمەر-ءمينيسترى قازاقستاننىڭ حالىقارالىق كۇن اليانسىنا قوسىلۋىنا ءوتىنىش ءبىلدىردى.