الماتىداعى دوستىق ۇيىندە ەتنومادەني بىرلەستىكتەردىڭ جەتەكشىلەرى جانە قوعام قايراتكەرلەرىنىڭ قاتىسۋىمەن قازاقستان رەسپۋبليكاسىنىڭ مەملەكەتتىك رامىزدەر كۇنىنە ارنالعان دوڭگەلەك ۇستەل ءوتتى.
دوڭگەلەك ۇستەل جۇمىسى ءانۇران ايتۋدان باستالىپ, مەملەكەتتىك رامىزدەر تاريحىنا قاتىستى بەينەفيلم كورسەتۋمەن جالعاسىن تاپتى. ءىس-شارانى الماتى قالاسى اكىمى اپپاراتىنىڭ «قوعامدىق كەلىسىم» كمم ديرەكتورى ج.ش.مۇرىنوۆا جۇرگىزىپ, ايتۋلى كۇنگە قاتىستى قۇتتىقتاۋ لەبىزىن ءبىلدىردى. الماتى قالاسى قازاقستان حالقى اسسامبلەيا حاتشىلىعىنىڭ مەڭگەرۋشىسى ن.ا.بالعىمباەۆ قۇتتىقتاۋ سوزىنەن كەيىن مەملەكەتتىك رامىزدەردىڭ قابىلدانۋ تاريحىنا توقتالدى.
«بۇگىندە تاۋەلسىز قازاقستاننىڭ رامىزدەرىمەن قاتار اتا زاڭى, ۇلتتىق ۆاليۋتاسى ەلىمىز تاريحى ءۇشىن كيەلى دە قاستەرلى ۇعىم رەتىندە تاريحىمىزدىڭ, مادەنيەتىمىز بەن ءداستۇرىمىزدىڭ حابارشىسى رەتىندە ۇلتىمىزدىڭ ماقتانىشىنا اينالعان. سونداي-اق مەملەكەت باسشىسىنىڭ «رۋحاني جاڭعارۋ: بولاشاقققا باعدار» باعدارلاماسىندا كورسەتىلگەن قۇندىلىقتارىمىزدى الەمدىك دەڭگەيدە دارىپتەۋگە, قادىرلەپ-قاستەرلەۋگە ۇندەيتىن باستى ۇرانىمىز ىسپەتتى. بۇگىندە ەلىمىزدىڭ دامۋىنا, الەمنىڭ وزىق ەلدەرىنىڭ قاتارىنا قوسىلۋىندا, ۇلتتىق قۇندىلىقتارىمىزدى دارىپتەۋدە جىگەرلى جاستاردىڭ جاۋاپكەرشىلىگى جوعارى. مەملەكەتتىك باسشىسىنىڭ تاپسىرماسىنا وراي الماتى قالاسىندا جاستارعا باعىتتالعان كەشەندى باعدارلامالار جۇزەگە اسىپ كەلەدى. سونىڭ دالەلىندەي وتكەن جىل جاستار جىلى رەتىندە قابىلدانعان بولاتىن. مەملەكەتتىك رامىزدەرگە دەگەن قۇرمەت جاستار بويىندا وتانسۇيگىشتىك قاسيەتتەردىڭ دامۋىنا ىقپال ەتەدى. ال بويىندا ەلى مەن جەرىنە دەگەن سۇيىسپەنشىلىگى جوعارى جاستاردىڭ كەلەشەگىنەن كۇتەر ءۇمىتىمىز زور» دەپ اتاپ ءوتتى. ال يندۋستريا جانە جاڭا تەحنولوگيالار مينيسترلىگىنىڭ الماتى قالاسى بويىنشا تەحنيكالىق رەتتەۋ جانە مەترولوگيا كوميتەتى دەپارتامەنتىنىڭ باس مامانى ق.ب.قىزعارين «قر مەملەكەتتىك رامىزدەرىن قولدانۋ بويىنشا ۇلتتىق ستاندارتتار» تاقىرىبىنا بايانداما جاساپ, رامىزدەردى قولدانۋ تارتىبىنە, ەرەجەسىنە قاتىستى ناقتى مالىمەتتەرمەن ءبولىستى. وسىعان وراي «الماتى قالاسىندا جاۋىن-شاشىننىڭ ءجيى بولاتىندىعىن ەسكەرسەك, رامىزدەردىڭ وڭىپ, جىرتىلىپ كەتپەي, قالپىنىڭ دۇرىس ساقتالۋىنا ءتيىستى مەكەمەلەر باسشىلارى ايرىقشا باقىلاۋ جاساپ وتىرۋى قاجەت»,-دەدى ج.ش.مۇرىنوۆا.
كەلەسى بايانداماشى د.ا.قوناەۆ اتىنداعى ەۋرازيالىق زاڭ اكادەمياسى قوعامدىق پاندەر جانە قازاقستان حالقى اسسامبلەياسى كافەدراسىنىڭ مەڭگەرۋشىسى ب.ز.باتتالحانوۆ رامىزدەر تاريحىنا شولۋ جاسادى. بۇگىندە اتالعان اكادەميادا رامىزدەرگە بايلانىستى ارنايى لەكتسيالار وقىلىپ, ستۋدەنتتەردىڭ تولىققاندى اقپارات الۋىنا مۇمكىندىكتەر قاراستىرىلعان.
ەگەمەندىك جانە مەملەكەتتىك اتريبۋتتار ارقىلى وتانسۇيگىشتىكتى قالىپتاستىرۋ, اسكەري قىزمەتكەرلەر مەن جاستار ساناسىن قالىپتاستىرۋداعى مەملەكەتتىك رامىزدەردىڭ ءرولى, ت.ب. تاقىرىپتارعا بايانداما جاساعان م.و.اۋەزوۆ اتىنداعى ادەبيەت جانە ونەر ينستيتۋتىنىڭ سىرتقى بايلانىستار ءبولىمىنىڭ مەڭگەرۋشىسى س.ۆ. انانەۆا, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى م.ج.شايمەردەنوۆا, قر ۇلتتىق قاۋىپسىزدىك كوميتەتىنىڭ شەكارالىق قىزمەت اكادەمياسىنىڭ باس وقىتۋشىسى د. ق.بەلعوجاەۆ, «جاس قادام» جاستار قوعامدىق ۇيىمىنىڭ توراعاسى م.ا.احمەتوۆ قوعامنىڭ ءاربىر مۇشەسى قاستەرلەۋگە ءتيىس مەملەكەتتىك رامىزدەر – قازاق ەلىنىڭ وتكەنى مەن بۇگىنى, دەپ اتاپ ءوتتى.
ەلۆيرا سەرىكقىزى, «ەگەمەن قازاقستان»