«ەرجان حازىرەت تولەگەن ۇلىنىڭ ءىسى مەن ەڭبەگىن ەستە قالدىرۋ» قوعامدىق قورى 31 مامىر ساياسي قۋعىن-سۇرگىن قۇرباندارىن ەسكە الۋ كۇنىنە وراي ماڭعىستاۋ وبلىستىق بەكەت اتا مەشىتىندە اۋىزاشار بەردى.
اۋىزاشارعا ماڭعىستاۋ وبلىسى اكىمىنىڭ ورىنباسارى م.سقاقوۆ قاتىسىپ, قۋعىن-سۇرگىن قۇرباندارى قالاي قۇرمەتتەۋگە دە لايىق ەكەندىگىن ايتىپ, اۋىزاشاردى ۇيىمداستىرۋشىلارعا العىس ايتتى.
ءوڭىردىڭ بەلگىلى اقساقالدارى, زيالى قاۋىم وكىلدەرى, مەملەكەتتىك قىزمەتكەرلەر مەن باق وكىلدەرى, سونداي-اق قالا تۇرعىندارى قاتىسقان اۋىزاشاردا ماڭعىستاۋ وبلىسىنىڭ باس يمامى سمايىل قاجى سەيىتبەكوۆ يماندىلىق, ادامگەرشىلىك باعىتىندا ۋاعىز ايتىپ, ورازا تۇتۋدىڭ ەرەكشەلىكتەرى تۋرالى باياندادى.
بەلگىلى ءدىنباسى, قىزىل يمپەريانىڭ قىلىشىنان قان تامىپ تۇرعان كەزىنىڭ وزىندە ومىرىنە تالاي قاۋىپ تونسە دە ءدىني ۇستانىمىن تارك ەتپەي, دىنىنە بەرىك, انتىنا ادال, حالقىنا قامقور بولعان ەرجان حازىرەت ەسىمى – ماڭعىستاۋلىقتار ءۇشىن قاستەرلى ەسىم. جۋىردا ىشىندە حالقىمىزدىڭ ءداستۇرلى ءدىني جولى باياندالعان قوس قولجازباسى تابىلىپ, تىڭ جاڭالىق رەتىندە جۇرتىمەن جامىراي تابىسقان بولاتىن. دەرتتى قوعامعا كەزى كەلگەندە بەرىلگەن دارىدەي ساف جول, ناق ۇستانىمدى كورسەتكەن قوس قولجازبا ءدىن وكىلدەرى مەن ءدىنتانۋشىلار تاراپىنان جوعارى باعالانىپ, اداسقان ۇرپاقتى اق جولعا باستار باعدارشام رەتىندە تانىلۋدا. قازىرگى تاڭدا ەرجان حازىرەت تولەگەن ۇلىنىڭ ەكىنشى كىتابى اۋدارىلۋ ۇستىندە. جاڭا كىتاپ قولدانىسقا بەرىلگەن ساتتە حالىقتىڭ تاعى ءبىر جاعىمدى جاڭالىقپەن جۇزدەسەرى, كوپتەن كۇتكەن تاعىلىمدى باعىتتى تانىرى انىق. دەمەك, حازىرەتتى تانۋ, ونىڭ تاعىلىمدى ءىسىن جالعاستىرۋ, ۇلتجاندى, حالقىمىزدىڭ ءداستۇر مەن ءدىندى ساباقتاستىرعان ساف جولىن جالعاستىرار بۋىن قالىپتاستىرۋ باعىتىنداعى جۇمىستار بولاشاقتا كەڭ ارناعا ءتۇسىپ, قانات جايا بەرەتىن بولادى.
الدىنا سۇبەلى جۇمىستار مەن ماڭىزدى مىندەتتەر قويىپ وتىرعان «ەرجان حازىرەت تولەگەن ۇلىنىڭ ءىسى مەن ەڭبەگىن ەستە قالدىرۋ» قوعامدىق قورىنىڭ قاسىرەت قۇرباندارىنىڭ رۋحىنا جانە اۋزى بەرىك جۇرتشىلىققا ارناپ اۋىزاشار بەرۋى - قوردىڭ تاعىلىمدى, ۇلاعاتتى ىستەرىنىڭ ءبىرى عانا.
اۋىزاشاردا ەرجان حازىرەتتىڭ كوزىن كورگەن ازامات, بۇگىندە 80-ءنىڭ سەڭگىرىندەگى ەل اعاسى - ت. كوشەكوۆ حازىرەت تۋرالى ەستەلىك اڭگىمەلەرىن ايتسا, د.ءارىپوۆ, ق.ەرەجەپوۆ سىندى ازاماتتار جاقسى ىسكە قاتىستى وي-پىكىرلەرىن ورتاعا سالدى.
سونداي-اق, ەرتەسىنە قور توراعاسى ب.نۇرجىگىت ۇلى باستاعان ازاماتتار ىزگى ءىستى ەرجان حازىرەت ماڭگىلىك مەكەن ەتكەن شاقپاق اتا قاۋىمىنا بارىپ جالعاستىرىپ, اۋىزاشار بەرىپ, ءارى ارۋاقتار قۇرمەتىنە ساداقا شالىپ, قۇران باعىشتاپ, ەلىمىزدىڭ اماندىعى, جەرىمىزدىڭ تىنىشتىعى ءۇشىن تىلەك تىلەپ, دۇعا جاسادى.
گۇلايىم شىنتەمىرقىزى, «ەگەمەن قازاقستان»