اقتاۋدا ءتورت باۋىرىن ورتتەن قۇتقارعان 13 جاسار دارحان بولاتوۆتى ماراپاتتاۋ شاراسى ءوتتى.
وقيعا جۋىردا تۇپقاراعان اۋدانى سايىن شاپاعاتوۆ اۋىلىندا بولعان. سول ءتۇنى اكەسى جۇمىسقا كەتكەن وتباسىنىڭ اناسى دا بالاباقشاعا تۇنگى كەزەكشىلىكتە بولادى. اتا-انا كىشىسى 3 جاستاعى بالالارعا باس-كوز بولۋدى تۇڭعىشى دارحانعا تاپسىرادى.
– تۇنگى مەزگىلدە ءۇيدىڭ ءىشىن قايتا-قايتا ارالاپ, قۇددى ءبىر توتەنشە جاعداي ورىن الاتىنىن جۇرەگىم سەزگەندەي بولدى, بىراق ۇيىقتاپ كەتىپپىن. تۇسىمدە ءتىلسىز جاۋمەن ارپالىسىپ جاتىر ەكەنمىن. ويانىپ كەتتىم. راسىندا كوز الدىم تۇتىننەن بايلانىپ قالدى, ءۇيدىڭ ءىشى تۇماندانىپ كەتكەن. دەرەۋ ءىنىم مەن ءۇش قارىنداسىمدى ۇيدەن الىپ شىعىپ, كورشىنىڭ ۇيىنە اپارىپ تاستاعان سوڭ, ءورت ءسوندىرۋ قىزمەتىنە حابارلاستىم, دەيدى باتىر بالا دارحان ءامىرحان.
ءورت سوندىرۋشىلەردەن بەلگىلى بولعانداي, شاقىرتۋ 02:12 ۋاقىتىندا تۇسكەن. ماماندار ءتىلسىز جاۋدى تەز ارادا اۋىزدىقتاعان. ال ءورتتىڭ سەبەبى ناقتى نەدەن ەكەندىگى ازىرگە بەلگىسىز. ماڭعىستاۋ وبلىسى توتەنشە جاعدايلار دەپارتامەنتىنىڭ ءورت ءسوندىرۋ جانە اۆاريالىق قۇتقارۋ قىزمەتى مەملەكەتتىك مەكەمەسىنىڭ باسشىسى ەرلان ماۋلەنوۆ بولسا, ءورت توقتىڭ قىسقاشا تۇيىقتالۋى سەبەبىنەن پايدا بولعان دەگەن الدىن الا بولجام جاساپ وتىر. سونىمەن قاتار ءورت سالدارىنان كەلتىرىلگەن ماتەريالدىق شىعىن مولشەرى دە جاقىن كۇندەرى بەلگىلى بولماق. «نۇر وتان» پارتياسى ماڭعىستاۋ وبلىستىق فيليالى توراعاسىنىڭ ءبىرىنشى ورىنباسارى نۇري تۋمىشەۆ باتىر بالانىڭ اكەسى باقىتجان بولاتوۆقا العىس حات تاپسىردى. دارحانعا توتەنشە جاعدايلار دەپارتامەنتى باسشىسىنىڭ اتىنان العىس حات, ۆەلوسيپەد, باعالى سىيلىقتار بەرىلدى.
– الدىمەن اللا, سودان سوڭ بالاما ريزامىن. كىم بىلەدى, ول قايسارلىق تانىتپاعاندا, بەس بالامنان ايىرىلىپ قالۋىم مۇمكىن ەدى. وزگە زاتتاردىڭ بىرەۋى دە پايداعا اسپايتىن دارەجەدە ورتكە ورانعان ءۇيدىڭ ىشىنەن تەك قۇران كىتاپتىڭ جانباي قالۋى اسىل دىنىمىزگە دەگەن سەنىم-قۇرمەتىمىزدى نىعايتىپ, كوڭىلىمىزدى قۋانىشقا بولەيدى. ءبىزدى قۇداي, قۇران قۇتقاردى, – دەيدى دارحاننىڭ اكەسى باقىتجان.
قازىرگى تاڭدا وتاعاسى جاڭا ءۇي سالۋدىڭ قامىنا كىرىسكەن.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى