باتىس قازاقستان وبلىستىق ءماسليحاتىنىڭ شەشىمىمەن وبلىستى 2000-2003 جىلدارى باسقارعان قىرىمبەك كوشەرباەۆقا «باتىس قازاقستان وبلىسىنىڭ قۇرمەتتى ازاماتى» اتاعى بەرىلگەن بولاتىن. بۇگىن ورالدىق دەلەگاتسيا قىزىلوردا قالاسىنا ارنايى بارىپ, ماراپات يەسىنە قۇرمەتتى اتاعى مەن وبلىس اكىمى التاي كولگىنوۆتىڭ العىس حاتىن تابىس ەتتى.
دەلەگاتسيانى باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ باستاپ باردى.
«ەلباسى ن.ءا.نازارباەۆتىڭ وڭىرلەردى دامىتۋ تۋرالى باعدارلامالارىن ورىنداۋ ماقساتىندا اقجايىق وڭىرىندە اتقارعان ادال ەڭبەگىڭىزدى باتىسقازاقستاندىقتار ءاردايىم جوعارى باعالايدى. وبلىستىڭ «قۇرمەتتى ازاماتى» اتانۋىڭىز – وڭىرىمىزدە قالعان «كوشەرباەۆ قولتاڭباسىنىڭ» قوعامدىق مويىندالۋى. جاڭا مىڭجىلدىقتىڭ باس كەزىندە ورال ءوڭىرىنىڭ گۇلدەنۋىنە قوسقان ۇلەسىڭىز ءۇشىن سىزگە ءوڭىر تۇرعىندارىنىڭ اتىنان العىس بىلدىرەمىن» دەلىنگەن ا.كولگىنوۆتىڭ قۇتتىقتاۋىندا.
قىرىمبەك كوشەرباەۆ تا اق جايىق جۇرتىنا ءوز ريزاشىلىعىن جەتكىزدى.
- اق جايىق ءوڭىرى جاسارىپ جاڭارۋدا, قارقىندى دامۋدا. ەلباسىنىڭ سارابدال ساياساتىن ىسكە اسىرۋ ماقساتىندا باتىس قازاقستاننىڭ مارتەبەسى بيىك بولسىن! وسىنداي شەشىم قابىلداعان وبلىس اكىمدىگىنە, التاي ارىپتەسىمە, وبلىستىق ءماسليحاتتىڭ دەپۋتاتتارىنا, اق جايىق ءوڭىرىنىڭ بارلىق ازاماتتارىنا باسىمدى ءيىپ راحمەتىمدى ايتامىن. قازاقتا «سىر – الاشتىڭ اناسى, سىر – الاشتىڭ پاناسى» دەگەن ءسوز بار. وسىنداي كيەلى دە قاسيەتتى, قورقىت بابا جەرىنەن سالەمىمدى جەتكىزىڭىزدەر, - دەدى قىرىمبەك كوشەرباەۆ.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان