بۇگىن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا ەلباسى نۇرسۇلتان نازارباەۆ وڭتۇستىك قازاقستان وبلىسىندا پارا بەرۋ ۋشىعىپ تۇرعانىنا نارازىلىق تانىتتى, دەپ حابارلايدى.
كەڭەس بارىسىندا شىمكەنتتەن تىكەلەي بايلانىسقا شىققان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ وڭىردە تسيفرلاندىرۋ باعىتىندا اتقارىلىپ جاتقان جۇمىستار جايىندا ەسەپ بەرگەن بولاتىن. "قازىرگى تاڭدا اۋرۋحانالاردا, ەمحانالاردا كەزەككە تۇرۋ بۇرىنعىداي ەمەس, ۇيدەن كەزەككە تۇرۋ ماسەلەسى, ناقتى مالىمەتتەر الۋ ماسەلەسى تسيفرلاندىرۋ ارقىلى جۇزەگە اسۋدا. سونداي-اق بۇكىل اۋرۋحانالار مەن ەمحانالاردا كەلەسى جىلدىڭ ورتاسىنا دەيىن تولىق كومپيۋتەرمەن قامتاماسىز ەتۋدى جوسپارلاپ وتىرمىز", - دەدى وبلىس باسشىسى.
بۇعان پرەزيدەنت: "وسىنىڭ بارلىعى بارلىق وبلىستارعا, اسىرەسە, وڭتۇستىك قازاقستان وبلىسىنا قاجەت. بۇل وبلىس باسقا سالالاردان قالىپ قالدى دەگەن ءسوز ەمەس. وبلىستىڭ حالقى تىعىز قونىستانعان. ار جاعىنداعى وزبەك اعايىندارمەن بايلانىسىمىز جاقسارىپ كەلەدى. وڭتۇستىك قازاقستاندا باسەكەلەستىك تە ءوسىپ كەلە جاتىر. ولاردىڭ ساۋدا-ساتتىققا, ءوز جۇمىسىنا دەگەن ىقىلاسى بىزدەن گورى ارتىق ەكەنى بەلگىلى. ەگەردە دايىندالماساڭدار, قالىپ قالاسىڭدار. بارلىق بيزنەسكە سول اعايىندار كەلەتىن بولادى",- دەپ ەسكەرتتى. سونىمەن قاتار ەلباسى وڭتۇستىك قازاقستان وبلىسىندا پارا بەرۋدىڭ ءورشىپ تۇرعاندىعىنا الاڭداۋشىلىعىن ءبىلدىردى.
"ەشقانداي رەنىش بولماۋى كەرەك. اسىرەسە, جاڭا ءوزىڭ ايتىپ وتىرعان جۇمىسقا قابىلداۋعا قاتىستى. مەندە نەشە ءتۇرلى حابارلار بار. مەكتەپكە, ەدەندى جۋعا قابىلداۋ ءۇشىن پارا بەرۋ كەرەك. مەكتەپكە مۇعالىم بولىپ ورنالاسۋ ءۇشىن پارا بەرۋ كەرەك. باسقا وبلىستاردا ونداي جوق. تەك قانا سەندەردە بار", - دەدى مەملەكەت باسشىسى. قر پرەزيدەنتى جەر ساتۋ, بيزنەستى دامىتۋ, اۋرۋحانالار مەن مەكتەپكە جۇمىسقا الۋ ماسەلەلەرى تسيفرلاندىرىلاتىن بولسا, مۇنداي پروبلەمانىڭ جويىلاتىندىعىن باسا ايتتى.