كەشە مەملەكەت باسشىسى نۇرسۇلتان نازارباەۆ استانا قالاسىندا «تۇلپار-تالگو» جولاۋشىلار ۆاگوندارىن شىعاراتىن العاشقى زاۋىتتىڭ سالتاناتتى اشىلۋ راسىمىنە قاتىستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
مەملەكەت باسشىسى ۆاگونداردىڭ اسپالى جابدىقتاۋ مونتاجدىق ۋچاسكەسىندە بولىپ, ىشكى جابدىقتار مەن ينتەرەردى قۇراستىرۋ ۋچاسكەسىنە ارنالعان وندىرىستىك ۇدەرىستەرمەن, قوسىمشا تىركەۋ جانە ستاتيستيكالىق سىناق تسەحىمەن تانىستى, سونداي-اق ءبىر جولاۋشى ۆاگونىن كورىپ شىقتى. «قازاقستان تەمىر جولى» ۇك» اق پرەزيدەنتى ا.مامين نۇرسۇلتان نازارباەۆقا زاۋىتتىڭ نەگىزگى تەحنيكالىق سيپاتتارى, جولاۋشىلار قوزعالىسىنىڭ جىلدامدىعىن شەكتەۋ مەن دامىتۋ جوسپارى تۋرالى باياندادى.
زاۋىتتى ارالاۋ كەزىندە مەملەكەت باسشىسى زاۋىتتاعى ستاتيستيكالىق ستەندتىك سىناقتار وتكىزۋ تسەحىن ىسكە قوستى.
نۇرسۇلتان نازارباەۆ زاۋىتتىڭ جۇمىسشىلارىمەن اڭگىمەلەستى.
– يندۋستريالىق باعدارلامانى ىسكە اسىرۋ ەلىمىزدىڭ تاياۋ جىلدارداعى باسىم مىندەتتەرى بولىپ تابىلادى. «تۇلپار-تالگو» زاۋىتى – تاۋەلسىزدىك كۇنىنە تاماشا سىيلىق. 2015 جىلى جەرگىلىكتى ءونىم قازاقستان بويىنشا پايدالانىلاتىن بولادى. ءبىزدىڭ كولىك جۇيەسى جۇمىسىنىڭ تيىمدىلىگى ەداۋىر ارتادى, – دەدى مەملەكەت باسشىسى.
جاڭا زاۋىت قۇرىلىسىنىڭ جوباسى يسپانيالىق سەرىكتەستەرمەن بىرلەسىپ جۇزەگە اسىرىلعان. ونىڭ جوبالىق قۋاتى – جىلىنا 150 جولاۋشى ۆاگونىن شىعارۋ. جوبانىڭ قۇنى: 8,8 ملرد. تەڭگە. زاۋىتتا 18, 12, 10 ورىندىق ۆاگوندار, سونداي-اق مۇگەدەك جولاۋشىلار ءۇشىن 6 ورىندىق ۆاگوندار شىعارىلاتىن بولادى. ۆاگوننىڭ ورتاشى قۇنى – 780 مىڭ ەۋرو. ۆاگوندار قازاقستاننىڭ كليماتتىق جاعدايىنا بەيىمدەلىپ جاسالادى, ولاردىڭ كونسترۋكتسيالىق جىلدامدىعى ساعاتىنا 350 شاقىرىمدى قۇرايدى.
تەحنولوگيالىق ۇدەرىسكە قوزعالمالى ءبولشەكتەرىن قۇراستىرۋ, اۋا جانە ەلەكترمەن جابدىقتاۋ جۇيەسىن قوسۋ, كۋپە ەلەمەنتتەرىن دايىنداۋ, قورابىن دانەكەرلەۋ جانە سىرلاۋ, جابدىقتاردىڭ جەكەلەگەن ءتۇرلەرىن دايىنداۋ جانە مونتاجداۋ جاتادى. تەحنيكالىق قاداعالاۋدى ەۋروستاندارتتاردىڭ تالاپتارىنىڭ ورىندالۋىنا باقىلاۋ جاسايتىن يسپان تارابى جۇزەگە اسىرادى. سونداي-اق زاۋىتتىڭ جۇمىسشىلارى يسپانيانىڭ زاۋىتتارىندا وقىپ كەلگەن. اتالعان جوبانى ىسكە اسىرۋ جولاۋشىلار ۆاگوندارىنا تاپشىلىق ماسەلەسىن شەشۋگە, پويىزدار قوزعالىسىنداعى قاۋىپسىزدىك دەڭگەيى مەن جولاۋشىلار قولايلىلىعىن ارتتىرۋعا, قازاقستاندىق تەمىر جول كولىگىنىڭ باسەكەگە قابىلەتتىلىگىن ۇلعايتۋعا مۇمكىندىكتەر تۋعىزادى. سونداي-اق جاڭا جولاۋشىلار ۆاگوندارىن قۇراستىرۋ كەزىندە جەكەلەگەن ءتۇيىنى مەن ءبولشەكتەرىن دايىنداۋعا ارنالعان تاپسىرىستاردى ورنالاستىرۋ ەسەبىنەن بىرقاتار ونەركاسىپ كاسىپورىندارى ءوندىرىسىنىڭ كولەمى ۇلعايتىلاتىن بولادى.
-----------------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.