الماتى وبلىسى قۋعىن-سۇرگىن قۇرباندارىن ازا تۇتتى

تاعزىم ەتۋ شاراسىن ەسكەرتكىش-مەموريالعا گۇل شوقتارىن قويۋدان باستاعان وبلىس اكىمى اماندىق باتالوۆ كوپشىلىك الدىندا ءسوز سويلەپ, 31 مامىر ەل تاريحىنداعى ەڭ ءبىر ازالى كۇندەردىڭ ءبىرى ەكەنىنە توقتالىپ ءوتتى.

- جىل سايىن وسى كۇنى – ەل تاۋەلسىزدىگى ءۇشىن كۇرەسكەن, ۇلتىمىزدىڭ ءبىرتۋار, اياۋلى ۇل-قىزدارىن, جازىقسىز جاپا شەككەن قۇربانداردى ەسكە الامىز. جاپپاي ساياسي قۋعىن-سۇرگىن قۇرباندارىن اقتاۋ, زاڭسىز قۋدالانعان ازاماتتاردىڭ قۇقىعىن قالپىنا كەلتىرۋ جۇمىستارى قانشا ۋاقىت وتسە دە توقتالماۋى ءتيىس. ءبىز ەلباسىنىڭ «رۋحاني جاڭعىرۋ» باعدارلاماسى اياسىندا جازىقسىق قۇربان بولعان بابالاردىڭ رۋحىنا ارناپ, جاڭالىق اۋىلىندا مۋزەي سالۋدى ۇيعارىپ, بيىل قۇرىلىسىن باستادىق. مۋزەيدىڭ ەكسپوزيتسيالىق زالىندا ۇلت قايراتكەرلەرى تۋرالى ماتەريالدار قويىلىپ, وسى جەردە جەرلەنگەن ساياسي قۋعىن-سۇرگىن قۇرباندارىنىڭ اتى-جوندەرى تاس تاقتاعا ويىلىپ جازىلاتىن بودادى, - دەدى ايماق باسشىسى.

ءوز كەزەگىندە ءسوز العان رەسپۋبليكالىق قۋعىن-سۇرگىنگە ۇشىراعاندار قاۋىمداستىعىنىڭ توراعاسى جۇمابەك اشۋ ۇلى قازاق جەرىندە ءار كەزەڭدە ءتۇرلى سيپاتتا ورىن العان ناۋبەتتەردىڭ تاريحىنا, ونىڭ زالالى مەن بولاشاق ءۇشىن سول قارالى تاريحتى ءبىلۋدىڭ ماڭىزىنا توقتالدى. ال ساياسي قۋعىن-سۇرگىن قۇربانى, اقىن, قوعام قايراتكەرى ءىلياس جانسۇگىروۆتىڭ ۇلى سايات جانسۇگىروۆ اكەسىنە ارناعان جوقتاۋ جىرىن وقىدى.

وبلىس اكىمى اتاپ وتكەندەي, وسى جاڭالىق اۋلىندا ساياسي قۋعىن-سۇرگىن قۇرباندارىنا ارنالعان مۋزەي ىرگە كوتەرىپ جاتىر. قۇرىلىس جۇمىستارىنا 288 ملن. تەڭگە بولىنگەن. جالپى اۋماعى 535 شارشى مەتردى قۇرايتىن تاعزىم ءۇيى وتكەنگە سالاۋات ايتىپ, قاسىرەتتى كەزەڭگە تاۋبە ەتەتىن كيەلى ورىنعا اينالماق.

- وسىدان 20 جىل بۇرىن «ادىلەت» قوعامدىق بىرلەستىگىنە وسى اۋماقتان 17 گەكتار جەر بەرىلگەن ەدى. بىراق, اۋەلگىدە ويعا العانىمىزداي, مۋزەي سالۋ باستاماسى كەيىنگە قالىپ كەلدى. سول 20 جىلدىق ارمان-ماقساتتارىمىز بيىل جۇزەگە اسىپ جاتىر. وسى ءۇشىن الماتى وبلىسىنىڭ باسشىلىعىنا ريزاشىلىق بىلدەرەمىز, - دەدى رەسپۋبليكالىق «ادىلەت» قوعامدىق بىرلەستىگىنىڭ توراعاسى عاريفوللا انەس.

قالماحانبەت مۇقامەتقالي,

«ەگەمەن قازاقستان»

الماتى وبلىسى