الماتىدا قوعام قايراتكەرلەرى, رەپرەسسيا جانە اشارشىلىق قۇرباندارىنىڭ ۇرپاقتارى, ۇكىمەتتىك ەمەس ۇيىمدار وكىلدەرى جانە قالا جاستارى 1931-1933 جىلدارعى اشارشىلىق قۇرباندارىن ەسكە الىپ, تاعزىم ەتتى.
«قاراعايلى» سكۆەرىندە 1931-1933 جىلدارعى اشارشىلىق قۇرباندارىنا ارناپ ورناتىلعان ەسكەرتكىشتەگى قولىنا باۋىرىنا بالاسىن قۇشقان انانىڭ بەينەسى ناۋبەت جىلداردى ەسكە ءتۇسىرىپ, قازاق حالقىنىڭ اۋىر تاعدىرىنىڭ حابارشىسىنداي كوڭىلدەردى جابىرقاتادى.
قالا اكىمى باۋىرجان بايبەك ەل باسىنا كۇن تۋعان سول قارالى كۇن تاريحىنىڭ قازاق حالقىنىڭ جادىنان وشپەيتىندىگىنە توقتالىپ, «بۇل – ەلباسى اتاپ وتكەندەي, «اشارشىلىقتا قۇربان بولعان ميلليونداردىڭ رۋحىنا بۇگىنگى بۋىننان تاعزىم جانە كەلەر ۇرپاق اتا-بابالارىنىڭ قانداي قاسىرەتتەردى باستان وتكەرگەنىن ءبىلىپ جۇرۋىنە قاجەتتى تاعىلىم», دەپ اتاپ ءوتتى.
- سول ءبىر قاسىرەتتى جىلداردا حالقىمىز ەڭسەسىن تىك كوتەرىپ قانا قويماي, قازاق توپىراعىنا جەر اۋدارىلعان وزگە ۇلت وكىلدەرىن باۋىرىنا تارتىپ, قامقورلىعىنا الدى. بۇگىندە باستى بايلىعىمىز – تاۋەلسىزدىگىمىزدىڭ ارقاسىندا ءبىر شاڭىراقتىڭ استىنا جۇزدەن استام ۇلتتار مەن ۇلىس وكىلدەرىن سىيدىرعان قازاق حالقى بەيبىتشىلىك پەن بىرلىكتىڭ مەكەنىنە اينالىپ وتىر.
ەلۆيرا سەرىكقىزى,
«ەگەمەن قازاقستان»
الماتى