كەشە ورتالىق سايلاۋ كوميسسياسى جالپىۇلتتىق سوتسيال-دەموكراتيالىق پارتياسىنىڭ (جسدپ) قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا 54 كانديدات ەنگىزىلگەن پارتيالىق ءتىزىمىن تىركەدى.
جسدپ-نىڭ تىركەلگەن پارتيالىق تىزىمىندەگى كانديداتتاردىڭ قۇرامىندا بەس ۇلتتىڭ وكىلى بار. ولاردىڭ 25 پايىزىن ايەلدەر قۇرايدى. تىزىمگە ەنگىزىلگەن كانديداتتاردىڭ 40 پايىزى جاسى 55-كە دەيىنگىلەر. ال ەڭ جاس ۇمىتكەردىڭ جاسى – 25-تە. بىلىمدەرىنە كەلسەك, كانديداتتاردىڭ 96 پايىزى جوعارى ءبىلىمدى. ولاردىڭ ۇشتەن بىرىنە جۋىعىنىڭ ماماندىقتارى زاڭگەر جانە ەكونوميست بولىپ كەلەدى. ۇمىتكەرلەردىڭ 25 پايىزدان استامى ءتۇرلى حالىق شارۋاشىلىعى سالالارىنىڭ ماماندارى.
جالپىۇلتتىق سوتسيال-دەموكراتيالىق پارتياسىنان ۇسىنىلعان كانديداتتاردىڭ جارتىسىنان كوبى پارتيالىق قۇرىلىمداردىڭ نەمەسە باسقا دا قوعامدىق ۇيىمداردىڭ قىزمەتكەرلەرى بولىپ تابىلادى. اتاپ ايتقاندا, 18 پايىزى كوممەرتسيالىق ۇيىمداردا, 7,5 پايىزى عىلىم, مادەنيەت جانە ءبىلىم سالالارىندا جۇمىس ىستەيدى.
ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ حاباردار ەتۋىنشە, 9 جەلتوقسان كۇنگى جاعداي بويىنشا ءماسليحاتتار دەپۋتاتتارىنىڭ سايلاۋىنا بارلىعى 4500 كانديدات ۇسىنىلعان. ولاردىڭ ىشىندە وبلىستىق, استانا مەن الماتى قالالىق ماسليحاتتارعا ۇسىنىلعان 407, اۋداندىق ماسليحاتتارعا – 3392, قالالىق ماسليحاتتارعا – 701 كانديدات بار. كەشەگى كۇنگە دەيىن ءماسليحاتتار دەپۋتاتتىعىنا 63 كانديدات تىركەلگەن.
ءاليسۇلتان قۇلانباي.