كەشە استاناداعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا دەموكراتيالىق ازەربايجان رەسپۋبليكاسىنىڭ نەگىزىن قالاۋشى, قايراتكەر تۇلعا گەيدار اليەۆ تۋرالى جازىلعان «ەلىنە جول اشقان» كىتابىنىڭ تۇساۋكەسەرى ءوتتى. اتالمىش ەڭبەك مەملەكەت قايراتكەرىنىڭ 95 جىلدىعىنا وراي قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى مەن حالىقارالىق تۇركى اكادەمياسىنىڭ ورتاق جوباسى رەتىندە جارىق كوردى.
ءىس-شاراعا ازەربايجان پرەزيدەنتىنىڭ قوعامدىق-ساياسي ماسەلەلەر بويىنشا كومەكشىسى ءالي گاسانوۆ, ازەربايجان پارلامەنتىنىڭ دەپۋتاتى, «ازەربايجان-قازاقستان» پارلامەنتارالىق دوستىق توبىنىڭ توراعاسى ءادىل اليەۆ, ازەربايجان پارلامەنتىنىڭ دەپۋتاتى, «ازەربايجان-قازاقستان» پارلامەنتارالىق دوستىق توبىنىڭ مۇشەسى نيزامي دجافاروۆ باستاعان ءبىر توپ دەلەگاتپەن بىرگە, ايتۋلى جيناقتىڭ قازاق تىلىندە جارىق كورۋىنە اتسالىسقان ەلىمىزدىڭ بەلگىلى تۇلعالارى, زيالى قاۋىم وكىلدەرى قاتىستى. ولاردىڭ اراسىندا قازاقستان رەسپۋبليكاسى پرەزيدەنتى كەڭسەسىنىڭ باستىعى, جاڭا باسىلىم رەداكتسيا القاسىنىڭ جەتەكشىسى ماحمۇت قاسىمبەكوۆ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇماباەۆ, ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ, حالىقارالىق تۇركى اكادەمياسىنىڭ پرەزيدەنتى دارحان قىدىرالى, ل.ن.گۋميلەۆ اتىنداعى ەۇۋ رەكتورى ەرلان سىدىقوۆ جانە تاعى باسقا ەل ازاماتتارى بار.
«وتكەن عاسىردىڭ توقسانىنشى جىلدارىندا بۇرىنعى كەڭەس وداعىنىڭ قۇرامىندا بولعان بارلىق رەسپۋبليكا ەگەمەندىككە قول جەتكىزگەندە, بۇل الماعايىپ كەزەڭدى ءار مەملەكەت باسىنان ءارتۇرلى جاعدايدا وتكەردى. سونداي قيىن-قىستاۋ كەزەڭدەردە دە قازاقستان مەن ازەربايجان مەملەكەتى دوستىق, باۋىرلاستىق قارىم-قاتىناسىنا قىلاۋ تۇسىرمەي, كەرىسىنشە, ءبىر-بىرىنە دەمەۋ بولدى. ونىڭ ايقىن ايعاعى ەلباسىمىز نۇرسۇلتان نازارباەۆ پەن گەيدار اليەۆتىڭ اراسىنداعى ۇلى دوستىق, رۋحاني جىلى قارىم-قاتىناس. گەيدار اليەۆ تەك ازەربايجان ەلى ءۇشىن عانا ەمەس, كۇللى تۇركى الەمىنە ورتاق قايراتكەر تۇلعا. ونىڭ كورەگەن ساياساتىنىڭ ارقاسىندا قازىرگى گۇلدەنگەن, دەموكراتيالىق ازەربايجان مەملەكەتىنىڭ نەگىزى قالاندى. گەيدار ءالىرزا ۇلىنىڭ ەڭ ءبىرىنشى الدىنا قويعان مىندەتى – ازەربايجان حالقىنىڭ, مەملەكەتىنىڭ تاۋەلسىزدىگىن تۇعىرلى ەتۋ بولاتىن. ول ارمانىنا ءسوزسىز جەتتى. ءوز حالقىن دامۋدىڭ داڭعىل جولىنا سالىپ كەتتى. گەيدار اليەۆ – ەلىنە جول اشقان ناعىز قايراتكەر تۇلعا» – دەپ جاڭا كىتاپتىڭ جارىققا شىعۋىمەن بارشا وقىرماندى قۇتتىقتاعان قازاقستان رەسپۋبليكاسى پرەزيدەنتى كەڭسەسىنىڭ باستىعى, جاڭا باسىلىم رەداكتسيا القاسىنىڭ جەتەكشىسى ماحمۇت قاسىمبەكوۆ كورنەكتى تۇلعانىڭ ازاماتتىق, قايراتكەرلىك جولىن بايان ەتتى.
قازاق وقىرمانىنا جول تارتقان ايتۋلى عۇمىرنامالىق ەڭبەككە ازەربايجاننىڭ بۇرىنعى پرەزيدەنتى, كورنەكتى مەملەكەت قايراتكەرى گەيدار اليەۆپەن ۇزەڭگىلەس ەل باسشىلارىنىڭ, شەت مەملەكەتتەر كوشباسشىلارىنىڭ, ازەربايجاننىڭ قازىرگى باسشىلىعى مەن ساياسات, ەكونوميكا جانە بيزنەس سالاسىنداعى تۇلعالارىنىڭ ءىرى ساياساتكەر ءھام الەمدىك دەڭگەيدەگى ازامات جايىنداعى ەستەلىكتەرى توپتاستىرىلعان. ال باسىلىمنىڭ العىسوزىن گەيدار اليەۆپەن تامىرى تەرەڭ دوستىقتا بولعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ جازدى. «بۇل رەتتە, گەيدار ءالىرزا ۇلىنىڭ 95 جىلدىعىنا وراي باسىلىپ شىققان عۇمىرنامالىق ەڭبەكتىڭ العاش رەت قازاق تىلىنە اۋدارىلىپ, قالىڭ وقىرمانعا ۇسىنىلۋى – قازاقستان مەن ازەربايجان اراسىن جاقىنداتا تۇسەتىن ايتۋلى وقيعا ەكەنىن اتاپ وتكىم كەلەدى» دەلىنگەن كىتاپتىڭ كىرىسپە سوزىندە.
راسىمەن دە, ازەربايجان ەلىنىڭ اياۋلى پەرزەنتى گەيدار اليەۆتىڭ 95 جىلدىعىنا وراي قازاق تىلىندە جارىق كورگەن كىتاپتىڭ ەلباسى نۇرسۇلتان نازارباەۆتىڭ العىسوزىمەن شىعۋى ۇلىلار ۇندەستىگىنىڭ جارقىن كورىنىسى بولسا كەرەك. مۇنى كىتاپتىڭ تۇساۋكەسەر راسىمىنە ارنايى قاتىسقان مارتەبەلى مەيمان, ازەربايجان پرەزيدەنتىنىڭ قوعامدىق-ساياسي ماسەلەلەر بويىنشا كومەكشىسى ءالي گاسانوۆ ءوز سوزىمەن سالماقتى ساباقتادى.
ء«تۇبى ءبىر تۇركى جۇرتىمىز» دەسەك, بۇگىن ەكى ەلگە بىردەي ورتاق ماڭىزدى كۇن. ولاي دەيتىنىمىز – نۇرسۇلتان نازارباەۆتىڭ ءبىزدىڭ ەلىمىزگە ىقىلاسى ايرىقشا ەكەنىن بىلەمىز. وعان ەكى ەل پرەزيدەنتىنىڭ اراسىنداعى رۋحاني دوستىق ءھام اعالى-ىنىلىدەي تۋىسقاندىق, باۋىرلاستىق قارىم-قاتىناستارى كۋا. وسى ورايدا ازەربايجان حالقىنىڭ ماقتانىشى گەيدار اليەۆتىڭ 95 جىلدىق مەرەيتويى قازاق جەرىندە وسىنداي يگى شارادان باستاۋ الىپ, قازاق تىلىندەگى جاڭا كىتاپتىڭ تۇساۋكەسەرىمەن جالعاسۋى – باۋىرلاس قوس مەملەكەت اراسىنداعى ەجەلدەن كەلە جاتقان ءتىنى ۇزىلمەگەن ۇلكەن دوستىقتىڭ بەلگىسىندەي. بۇگىنگى جارىق كورگەن گەيدار اليەۆ جايىنداعى عۇمىرنامالىق ەڭبەككە نۇرسۇلتان ءابىش ۇلىنىڭ العىسوز جازىپ, ءوزىنىڭ جۇرەكجاردى تىلەگىن ءبىلدىرىپ ءھام ساياسي باعاسىن بەرۋى ءبىز ءۇشىن ۇلكەن مارتەبە. ازەربايجان مەن قازاقستان ورتاق قۇندىلىقتار مەن قىزىعۋشىلىق جولىندا ءالى دە جەمىستى ەڭبەك ەتە بەرەدى دەپ سەنەمىن» – دەپ تۇيىندەدى ءسوزىن ءالي گاسانوۆ.
ء«وز قولىممەن قۇرعان دۇنيەلەردىڭ ءبارى مەن ءۇشىن قىمبات, ...ءبارى دە ماڭىزدى. الايدا جۇرەگىمە بارىنەن بۇرىن حالقىم مەن تۋعان جەرىم ىستىق» – دەپ ارتىنان وشپەس ءسوز قالدىرىپ, ەلىن شەكسىز ءسۇيىپ وتكەن داڭقتى تۇلعانىڭ شىن مانىندە ازەربايجان حالقىنىڭ كەمەل كەلەشەگى ءۇشىن اتقارعان ەڭبەگى ەرەسەن. گەيدار دەگەن ەسىمىنىڭ ءوزى ماعىنالىق تۇرعىدا كوشباسشى دەگەن ۇعىممەن ۇندەسەتىنى دە تەگىن بولماسا كەرەك. قايراتكەر تۇلعانىڭ ءجۇرىپ وتكەن جولى مەن ءاربىر جاسامپاز ارەكەتى بۇگىندە زايىرلى مەملەكەتكە اينالعان ازەربايجان حالقىنىڭ تاۋەلسىزدىگىن تۇعىرلى, ەركىندىگىن ەڭسەلى ەتۋگە قىزمەت ەتىپ كەلەدى. ال تۇساۋى كەسىلىپ, وقىرمانىنا جول تارتقان ايتۋلى ەڭبەك قازاقستان مەن ازەربايجان مەملەكەتتەرىنىڭ ۇزاق جىلعى ىرگەسى ۇزىلمەگەن بەرىك دوستىعىنىڭ ايعاعىنداي.
نازەركە جۇماباي,
«ەگەمەن قازاقستان»