بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا 2018 جىلدىڭ ءى توقسانىنداعى الەۋمەتتىك-ەكونوميكالىق دامۋ جانە رەسپۋبليكالىق بيۋدجەتتىڭ ورىندالۋ قورىتىندىلارى قارالدى.
ۇلتتىق ەكونوميكا ءمينيسترى تيمۋر سۇلەيمەنوۆ ءبىرىنشى توقساندا ەل ەكونوميكاسىندا وڭ ۇردىستەر ساقتالعانىن مالىمدەدى. ەسەپتى كەزەڭدە ءجىو ءوسىمى 4,1% قۇرادى, 2017 جىلدىڭ وسىنداي كەزەڭىندە 3,6% بولعان.
«مۇنداي سەرپىن ونەركاسىپتىڭ, اۋىل شارۋاشىلىعىنىڭ جانە كورسەتىلەتىن قىزمەتتەر سالاسىنىڭ وسۋىمەن قامتاماسىز ەتىلدى. سونداي-اق, ءجىو ۇلعايۋىنا ينۆەستيتسيالاردىڭ جوعارى ءوسۋى مەن تومەن ينفلياتسيالىق پروتسەستەر سەپتىگىن تيگىزۋدە», — دەدى تيمۋر سۇلەيمەنوۆ.
قر ۇلتتىق ەكونوميكا مينيسترلىگىنىڭ مالىمەتىنە سايكەس, ونەركاسىپتەگى ءوسىم 5,3% قۇرادى (2017 جىلعى I توقساندا — 5,8%). بۇل رەتتە وڭدەۋ ونەركاسىبى وزىق قارقىن كورسەتىپ وتىر. كەن ءوندىرۋ ونەركاسىبىندە ءوندىرىس 5,1% وسكەن. بۇل سالادا تابيعي گاز ءوندىرىسى 6,2%, مۇناي — 6,1% جانە تەمىر كەنى — 3,7% قۇرادى.
وڭدەۋ ونەركاسىبى 6,2% ءوسىمدى كورسەتتى. قاعاز ونىمدەرىن وندىرۋدە (14,9%), حيميا ونەركاسىبىندە (14,3%), فارماتسەۆتيكادا (10,2%) ەكى ماندىك ءوسىم بايقالىپ وتىر. باسقا دا وڭدەۋ ونەركاسىپتەرى جىلدام وسۋدە. ماشينا جاساۋ — 9%, جيھاز ءوندىرىسى — 8,5%, سۋسىن ءوندىرىسى — 8,1% جانە ازىق-ت ۇلىك ونىمدەرىنىڭ ءوندىرىسى — 6,5%, سونداي-اق مەتاللۋرگيا — 5,6% قۇرايدى.
اۋىل شارۋاشىلىعىندا ديناميكا جاقساردى. ءوسىم 3,6% قۇرادى. ءوسۋ مال شارۋاشىلىعى ونىمدەرىنىڭ 3,8% كەڭەيۋىمەن نەگىزدەلەدى.
ءى توقساندا قۇرىلىس جۇمىستارىنىڭ كولەمى ەكى ايلىق تومەندەۋدەن كەيىن ءوسۋ تراەكتورياسىنا شىقتى. قۇرىلىستاعى ءوسۋ 5,9% قۇرادى.
نەگىزگى كاپيتالعا سالىنعان ينۆەستيتسيالار 39,5% ۇلعايدى. ينۆەستيتسيالىق سالىمدار كولىك سالاسىنا (58,5%-كە), قۇرىلىسقا (57,2%-كە), ونەركاسىپكە (51,6%-كە) جانە ساۋداعا (47,3%-كە) ارتتى.
«ەڭبەك نارىعىنداعى جاعداي ورنىقتى بولىپ قالۋدا. ناۋرىز ايىندا جۇمىسسىزدىق دەڭگەيى 4,9% ساقتالدى. ەڭبەكاقىنىڭ ءوسۋى بايقالىپ وتىر. قاڭتار–ناۋرىزدا ورتاشا ايلىق ەڭبەكاقى ناقتى كورىنىستە 2,4% ءوسىپ, 153,2 مىڭ تەڭگەگە دەيىن جەتتى», — دەپ تۇيىندەدى تيمۋر سۇلەيمەنوۆ.