مادەنيەت جانە سپورت مينيسترلىگىنىڭ قولداۋىمەن 2018 جىلعى 1 مامىر كۇنى استانا قالاسىنىڭ 20 جىلدىعىن مەرەكەلەۋ اياسىندا ءىى حالىقارالىق «باۋىرجان Fest» ءازىل فەستيۆالى وتەدى.
«قازاقستان» ورتالىق كونتسەرت زالى ساحناسىندا تانىمال ءارى ءوز ەلىندە عانا ەمەس, الەمگە ايگىلى ءازىل جانرىنىڭ ارتىستەرى جينالادى.
حالىقارالىق ءازىل مەرەكەسىنە رەسەي, قىتاي, ۋكراينا, وزبەكستان, ارمەنيا, قىرعىزستان سياقتى مەملەكەتتەردەن 30-عا جۋىق تاپسىرىس ءتۇستى. فەستيۆالدىڭ ەرەكشەلىگى – قويىلىمداردىڭ ءازىل, پاروديا جانرىندا, مينياتيۋرا تۇرىندە قازاق, ورىس جانە باسقا دا تىلدەردە ورىندالۋىندا. داستۇرگە اينالعان «باۋىرجان Fest» فەستيۆالىنىڭ ەكسكليۋزيۆتى فورماتى ءوز كورەرمەنىن تابادى دەپ سەنەمىز. حالىقارالىق ءازىل مەرەكەسى ءارتۇرلى جاستاعى, ۇلتى مەن ءدىنى بولەك ادامداردى, شىعارماشىلىعى ءبىر, ازىلسۇيگىش جانداردى ءبىر شاڭىراق استىنا جينايدى.
ءازىل فەستيۆالىنە ەسترادا جۇلدىزدارى ەلەنا ۆوروبەي مەن اندرەي بارينوۆ, ۆلاديمير مويسەەنكو مەن ۆلاديمير دانيلەتس, كارەن اۆانەسيان مەن وبيد اسوموۆ, اتىراۋدان «ارا اتىراۋ», شىمكەنتتەن «شانشار», اقتوبەدەن «ەكى ەزۋ», الماتىدان «باۋىرجان شوۋ», «تاماشا», «دۋ-دۋ» جانە «تتت» تەاترلارى وزدەرىنىڭ جاڭا ازىلدىك نومىرلەرىمەن قاتىسادى.
ءىى حالىقارالىق «باۋىرجان Fest» فەستيۆالىنىڭ جەڭىمپازدارىن ماراپاتتاۋ اتالىمدارى قازاقستاننىڭ ساتيرا جانرىنىڭ قۇرىلۋى مەن دامۋىنا زور ۇلەس قوسقان, قازاق ءازىل جانرىنىڭ مايتالماندارى, «تاماشا» تەاترىنىڭ تارلاندارى, ەلىمىزدىڭ ازىلكەش ارتىستەرى, مادەنيەت قايراتكەرلەرى, ساتيرا جانە ءازىل جانرى ماتىندەرىنىڭ اۆتورلارى, جازۋشىلار مەن اقىندار قۇرمەتىنە ارنالعان.
فەستيۆالدە «وسپانحان اۋباكىروۆ اتىنداعى ارنايى جۇلدە», «سادىقبەك ادامبەكوۆ اتىنداعى «تاپقىرلىق» جۇلدەسى, «شونا سماحان ۇلى اتىنداعى «شوق ءتىلدى» جۇلدەسى, «مەيىرمان نۇرەكەەۆ اتىنداعى ۇزدىك ارتىستىك جۇمىس», « ۇلىقپان ەسەنوۆ اتىنداعى ۇزدىك مۋزىكالىق ءنومىر», «مارات ساقاتوۆ اتىنداعى ۇزدىك ستسەناري», «ۋايىس سۇلتانعازين اتىنداعى ۇزدىك وبراز», «جاراسقان ابدىراشەۆ اتىنداعى ۇزدىك مونولوگ», «توقسىن قۇلىبەكوۆ اتىنداعى كورەرمەندەر كوزايىمى», «قۇدايبەرگەن سۇلتانباەۆ اتىنداعى ء«ۇمىت» جۇلدەسى» سەكىلدى اتالىمدار بويىنشا جەڭىمپازدار انىقتالادى. ءىى حالىقارالىق «باۋىرجان Fest» فەستيۆالى قازاقستان حالقىنىڭ دوستىعى مەن بىرلىگى كۇنى جارقىن وقيعاعا اينالادى دەپ سەنەمىز.
مەرەي دىلداباەۆ