تەننيسپەن تانىلعان قازاقستان

«دەۆيس كۋبوگىنىڭ» سوڭعى جارىسى ما؟

سوڭعى 10 جىلدىڭ كولەمىندە قازاقستان تەننيس قاۋىمداستىعى قىرۋار شارۋا اتقاردى. ەلدەگى تەننيستى دامىتۋ ءۇشىن كوپتەگەن باعدارلامالار قابىلدادى. كەيىننەن ۇلتتىق قۇرامانىڭ دەڭگەيىن كوتەردى. ارينە, كىلەڭ سىرتتان كەلگەن تەننيسشىلەر ونەر كورسەتتى دەپ سىناعاندار دا بولدى. الايدا, سول ارقىلى رەيتينگىمىز كوتەرىلىپ, ەل تەننيسىنە كەرەمەت جارناما جاسالدى. ەلىمىزدىڭ اتى دا الەمدىك ارەنادا تالاي مارتە تاڭدانىسپەن ايتىلدى. الگى, «استانا» ۆەلوكومانداسى مەن «استانا» فۋتبول كلۋبى سەكىلدى قازاقستان اتىن, ەل برەندىن قالىپتاستىرۋ ماقساتىندا تەننيسشىلەرىمىزدىڭ دە سىڭىرگەن ەڭبەگى وراسان زور دەپ ايتار ەدىم. مىسالى, «دەۆيس كۋبوگىندا» قازاقستان شۆەيتساريا, بەلگيا, يتاليا, ارگەنتينا سەكىلدى تەگەۋرىندى قۇرامالاردى جەڭدى ەمەس پە؟

ال قازىر كوماندا ساپىنا بىرتىندەپ ەل تەننيسىنىڭ تۇلەكتەرى الىنا باستادى. قازىرگى قۇرامامىزدى قاراڭىز: دميتري پوپكو, رومان حاسانوۆ, دميتري ەۆسەەۆ, تيمۋر حابيبۋللين. بارلىعى قازاقستان تەننيس مەكتەبىنىڭ تۇلەكتەرى. ولارعا تاجىريبيەلى دەگەن ميحايل كۋكۋشكين مەن الەكساندر نەدوۆەسوۆتى قوسامىز.

ال ەندى وسىنداي جۇيەدە وتەتىن سوڭعى «دەۆيس كۋبوگى» ءبىزدىڭ جىگىتتەر ءۇشىن قالاي بولماق؟ سوڭعى ەكەنى ارينە, ازىرگە بەلگىسىز. الايدا, تەننيس سالاسىندا جۇرگەندەر ءبىراۋزدان ءتۋرنيردىڭ ءتۇر-الپەتى تۇگەل وزگەرەتىنىن ايتادى. ەندى ءبىر عانا ەلدە, ءبىر اپتانىڭ ىشىندە وتە شىعاتىن تەننيس تويىنا اينالادى. ياعني, كادىمگى فۋتبولدىڭ ءمۋنديالى سەكىلدى الەم چەمپيوناتى بولىپ وزگەرمەك. ىرىكتەلىپ كەلگەندەر, كىم مىقتىنى انىقتايتىن بولادى.

بيىلعى جارىس جولىمىز جايلى قوزعاساق, الدىمەن ارگەنتينانى جەڭىپ, الەمدىك توپقا تۇسكەن سوڭ, قارسىلاسىمىز شۆەيتساريا بولدى. فەدەرەر قۇراماعا وينامايمىن دەدى, ۆاۆرينكا جاراقات الدى, ايتەۋىر ولاردى دا ۇتىپ جارىستىڭ شيرەك فينالىنا جولداما الدىق. ال ەندىگى قارسىلاس – حورۆاتيا قۇراماسى.

حورۆاتيا نەسىمەن قورقىتادى؟

كەزىندە يۋگوسلاۆيا ىدىراعان تۇستا حورۆاتيا بولەك شىعا سالىپ بىردەن سپورتتا ۇلكەن جەتىستىككە جەتتى. بۇل ەلدىڭ فۋتبولشىلارى مەن تەننيسشىلەرى الەمدى اۋزىنا قاراتتى. اتاعى جەر جارعان گوران يۆانيشەۆيچ جەر بەتىندەگى ءنومىرى ەكىنشى تەننيسشى ەدى. «ۋيمبلدون» جارىسىن جەڭدى. مىنە, ودان بەرى دە جوعارعى دەڭگەيدە ونەر كورسەتكەن حورۆاتيالىق تەننيسشىلەر تالاي مارتە تاڭداي قاقتىرتتى. وسى كۇنى حورۆاتيا قۇراماسىنداعى 5 تەننيسشىنىڭ 5-ەۋى دە توپ-50-گە كىرەدى. مارين چيليچ 2018 جىلدى «اۋستراليان وۋپەن» دوداسىنىڭ فينالىنا شىعۋمەن باستادى. ودان بەرى ءىرى-ءىرى بىرنەشە جارىستى ۇتتى. قازىر الەمنىڭ ءۇشىنشى راكەتكاسى.

استانادا وتەتىن «پرەزيدەنت كۋبوگى» جارىسىن 2010 جىلى جەڭگەن يۆان دوديگ قازىر جۇپتاسىپ ونەر كورسەتۋدىڭ حاس شەبەرىنە اينالعان. مىسالى, 2015 جىلى ول «رولاند گارروستىڭ» جۇپتىق باسەكەسىن جەڭىپ العان. تاعى ءبىر تەننيسشىسى بورنا ءچوريچتى حورۆاتيالىق جۋرناليستەر كوماندا كاپيتانى جەلكو كراياننىڭ ءوز شاكىرتى بولعان سوڭ قۇراماعا قوسىپ ءجۇر دەيدى. دەگەنمەن, بورنا جاستار اراسىندا الەمنىڭ ءبىرىنشى راكەتكاسى بولعانىن ەسكەرەر بولساق, ونىڭ دا ءبىزدىڭ تەننيسشىلەرگە وڭاي قارسىلاس بولماسىن سەزەمىز. نيكولا مەكتيچ پەن ۆيكتور گالوۆچتەر دە ەشكىمنىڭ تاقياسىنا تار كەلمەيتىن تەننيسشىلەر.  

P.S

قوس قۇراما ويىنى الدىندا جەرەبە تارتۋ ءراسىمى ءوتتى. سونىمەن العاشقى كەزدەسۋدە مارين چيليچ دميتري پوپكومەن كەزدەسسە, ەكىنشى ويىندا بورنا چوريچ ميحايل كۋكشكينمەن كۇش سىناسادى. ال ودان كەيىن جۇپتاسى باسەكەسى وتەدى. وندا نيكولا مەكتيچ پەن يۆان دوديگ جۇبىنا قازاقستاندىق الەكساندر نەدوۆەسوۆ پەن تيمۋر حابيبۋللين قارسى تۇرادى.  

ەرمۇحامەد ماۋلەن,

«ەگەمەن قازاقستان»

ۆاراجدين, حورۆاتيا.