وبلىستىق فورۋمدا بيزنەس پەن جەرگىلىكتى بيلىك وكىلدەرى ءوزارا بايلانىس پەن پروبلەمالىق ماسەلەلەردى تالقىلادى, دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
فورۋمدى اتىراۋ وبلىسى اكىمدىگىنىڭ قولداۋىمەن مەملەكەتتىك قىزمەت ىستەرى جانە سىبايلاس جەمقورلىققا قارسى ارەكەت اگەنتتىگى وبلىستىق دەپارتامەنتى, وبلىستىق كاسىپكەرلەر پالاتاسى ۇيىمداستىردى. فورۋم جۇمىسىنا قر كاسىپكەرلەر قۇقىعى بويىنشا وكىلى بولات پالىمبەتوۆ قاتىستى.
اتىراۋ وبلىسىنىڭ اكىمى نۇرلان نوعاەۆ فورۋم قاتىسۋشىلارىنا ساتتىلىك تىلەپ, شارانىڭ ماڭىزدىلىعىن اتاپ ءوتتى. ايماق باسشىسى كاسىپكەرلەر قوعامداستىعى مەن اتقارۋشى بيلىك اراسىنداعى ديالوگ پروبلەمالاردى شەشىپ, كەدەرگىلەردى جويۋعا ىقپال ەتەرىنە سەنىم ءبىلدىردى.
– مەملەكەت باسشىسى نۇرسۇلتان نازارباەۆ كاسىپكەرلىكتى دامىتۋعا, شاعىن جانە ورتا بيزنەستى قولداۋعا ۇنەمى كوڭىل ءبولىپ كەلەدى. مۇنداي كەزدەسۋلەر كاسىپكەرلىك سالاسىنداعى ماسەلەلەردى كوتەرىپ, ورتاق شەشىمگە كەلۋگە مۇمكىندىك بەرەدى, – دەدى نۇرلان نوعاەۆ. – فورۋمعا قر كاسىپكەرلەر قۇقىعى بويىنشا وكىلدىڭ قاتىسۋى شارانىڭ ماڭىزىن ارتتىرا ءتۇسىپ وتىر.
وبلىس اكىمىنىڭ ايتۋىنشا, اتىراۋ ايماعىندا كاسىپكەرلىكتى دامىتۋ بويىنشا اتقارىلىپ جاتقان جۇمىستىڭ اۋقىمى كەڭ. ول مەملەكەت تاراپىنان قارجىلاي كومەك قانا ەمەس, بارلىق مەملەكەتتىك قىزمەتتەردى لايىقتى جۇرگىزۋمەن بايلانىستى.
– ەل ەكونوميكاسى ءۇشىن كاسىپكەرلىكتى دامىتۋ ارقاشان مەملەكەتتىڭ باسىمدىلىعى بولىپ قالا بەرەدى. سوڭعى بەس جىلدا تەك جەرگىلىكتى بيۋدجەتتەن ايماقتاعى كاسىپكەرلىكتى دامىتۋعا 1,2 ملرد تەڭگە ءبولىندى. 2018 جىلى بيۋدجەتتەن 500 ملن تەڭگە ءبولىندى, ونىڭ باسىم بولىگى اۋىلداعى بيزنەستى دامىتۋعا باعىتتالعان. اتىراۋ وبلىسى مۇنايلى ءوڭىر. بىراق سوڭعى جىلدارى ەكونوميكانى ديۆەرسيفيكاتسيالاپ, اگروونەركاسىپ كەشەنىن دامىتۋعا, ءونىم وندىرۋگە كوڭىل ءبولىپ كەلەمىز, – دەدى ن.نوعاەۆ.
ايماق باسشىسى ەكىنشى دەڭگەيلى بانكتەر مەن اۋىل كاسىپكەرلەرىنىڭ سەرىكتەستىگى كۇردەلى ەكەنىن اتاپ ءوتتى. كوپتەگەن اۋىل تۇرعىندارى نەسيە الۋ كەزىندە كەپىل ماسەلەسىمەن بەتپە بەت كەلەدى. وسىنى ەسكەرىپ, جەرگىلىكتى ارتقارۋشى ورگانداردىڭ ارالاسۋىمەن اۋىل بيزنەسىن شاعىن نەسيەلەۋ باعدارلاماسى ەنگىزىلدى. 2017 جىلى «بيزنەس ايماق» باعدارلاماسى بويىنشا جەرگىلىكتى بيۋدجەتتەن 350 ملن تەڭگە ءبولىندى, سونىڭ ارقاسىندا 67 بيزنەس جوبا جۇزەگە اسىرىلدى, 123 جۇمىس ورنى قۇرىلدى. «التىن كەمە» باعدارلاماسى بويىنشا 304 ملن تەڭگەنىڭ 13 جوباسى ماقۇلدانىپ, 25 جۇمىس ورنى اشىلدى. 2017 جىلى اتىراۋ وبلىسىندا «بيزنەستىڭ جول كارتاسى-2020» باعدارلاماسى بويىنشا 1 543,5 ملن تەڭگە ءبولىندى. جالپى 312 جوبا قارجىلاندىرىلىپ, 1210 جۇمىس ورنى اشىلدى.
فورۋمدا بيزنەس-ومبۋدسمەن بولات پولىمبەتوۆ كاسىپكەرلەر ماسەلەلەرىنە توقتالدى.
– سوڭعى ەكى جىلدا كاسىپكەرلەر قۇقىن قورعاۋ بويىنشا 12420 ءوتىنىش ءتۇستى, اتىراۋ وبلىسىندا 378 ءوتىنىش. ايتا كەتۋ كەرەك, پروبلەمانىڭ 90% ايماقتىق ماڭىزعا يە, جەر الۋ, قۇرىلىس ماسەلەلەرىنە قاتىستى, جەرگىلىكتى جەردە شەشىلۋى ءتيىس.بۇل تۋرالى جەرگىلىكتى اتقارۋشى ورگاندار وكىلدەرىنە كەزدەسۋ كەزىندە ايتامىز, – دەدى بولات پولىمبەتوۆ.
بيزنەس-ومبۋدسمەن جەرگىلىكتى اتقارۋشى ورگاندار جەر تەلىمدەرىن الۋ پروتسەسى تۋرالى ءتيىستى اقپاراتتى جاريالاۋلارى كەرەك ەكەنىن اتاپ ءوتتى.
وبلىس اكىمى نۇرلان نوعاەۆ بۇل ماسەلەنى شەشۋ جولىندا جاسالىپ جاتقان جۇمىستاردى باياندادى.
– كاسىپكەرلەرمەن كەزدەسۋدە رۇقسات بەرۋ قۇجاتتارىنا, جەر ماسەلەسىنە قاتىستى سۇراقتار كوتەرىلەدى. قازىر ەلەكتروندى گەوپورتال جاساپ جاتىرمىز, سول ارقىلى بارلىق ماسەلە ەلەكتروندى تۇردە شەشىلەدى, جەر تەلىمدەرىنە قاتىستى جۇمىستار دا اشىق بولادى, – دەدى ايماق باسشىسى.