ەلباسىنىڭ قاتىسۋىمەن ءوتىپ جاتقان ەلوردانى ودان ءارى دامىتۋ ماسەلەلەرى جونىندەگى ماجىلىستە قالا اكىمى اسەت يسەكەشەۆ استانادا جاڭادان 10 ەمحانا اشىلاتىنىن ايتتى.
«اكىمدىك ءومىر ساپاسى مەن ۇزاقتىعىنا اسەر ەتەتىن نەگىزگى اۋرۋلارعا نازار اۋدارىپ وتىر. سوڭعى 10 جىلدىڭ قورىتىندىسى بويىنشا دەنساۋلىق ساقتاۋدىڭ نەگىزگى كورسەتكىشتەرى بويىنشا وڭتايلى قارقىن بار. ينسۋلتتىك ورتالىقتاردىڭ اشىلۋى, دياگنوستيكا مەن ەمدەۋدە جاڭا تەحنولوگيالاردى قولدانۋ وتكەن جىلى ينسۋلتتەن ءولىم-ءجىتىمدى 33,7 پايىزعا, ال ميوكارد ينفاركتى 36,4 پايىزعا تومەندەتۋگە مۇمكىندىك بەردى», دەگەن استانا اكىمى مەديتسينالىق كومەك كورسەتۋگە ايرىقشا ءمان بەرىلىپ وتىرعانىن جەتكىزدى.
ونىڭ ايتۋىنشا تەك 2017 جىلى 8700 مەديتسينالىق مامان بىلىكتىلىكتى ارتتىرۋ كۋرستارىنان وتكەن. 40 دارىگەر وڭتۇستىك كورەيا, يزرايل جانە گەرمانيانىڭ ۇزدىك كلينيكالارىندا ءبىلىمىن جەتىلدىرگەن. اعىمداعى جىلى دا بۇل جۇمىستار جالعاسپاق.
«بيىلعى قىركۇيەكتەن باستاپ دارىگەردىڭ جۇمىس ورنىن تولىقتاي اۆتوماتتاندىرۋ قامتاماسىز ەتىلىپ, قاعازباستىلىق كەزەڭ-كەزەڭمەن جويىلادى», دەدى ول. ياعني مەديتسينالىق ۇيىمداردىڭ شامادان تىس جۇكتەمەسى مەن ولارداعى كەزەكتىلىك ماسەلەسى مەملەكەتتىك-جەكەشەلىك ارىپتەستىك تەتىگى كومەگىمەن شەشىلۋدە.
«جاڭا ەمحانالاردىڭ قۇرىلىسىنىڭ ورنىنا سەنىمگەرلىك باسقارۋعا بەرۋمەن قولايلى عيماراتتاردى ساتىپ الۋ جوسپارلانىپ وتىر. 2025 جىلعا دەيىن 10 ەمحانانى اشۋ كوزدەلگەن. مەملەكەتتىك-جەكەشەلىك ارىپتەستىك تەتىكتەرى ارقىلى 20 ملرد تەڭگەنى ۇنەمدەۋ مۇمكىندىگى بار», دەدى اكىم.