ەلباسى بيىلعى جولداۋىندا ەلىمىزدىڭ الدىندا تۇرعان تەحنولوگيالىق, ەكونوميكالىق, الەۋمەتتىك سالالارداعى قارقىندى وزگەرىستەردىڭ كەلەلى مىندەتتەرىن ناقتى بەلگىلەپ بەردى.
باستان وتكەرىپ وتىرعان بۇگىنگىدەي جاھاندانۋ داۋىرىندە جەتىستىك جولدارىن تابۋ, ياعني دامۋدىڭ جاڭا ساپاسىنا كوتەرىلۋ وڭاي ەمەس. الەمدىك داعدارىستار مەن ىقتيمال سىن-قاتەرلەردى ەڭسەرۋدىڭ باستى كىلتى, بىردەن-ءبىر كەپىلى – ءتورتىنشى ونەركاسىپتىك رەۆوليۋتسيا ەلەمەنتتەرىن كەڭىنەن ەنگىزۋ قاجەتتىگىن مەملەكەت باسشىسى اتاپ كورسەتىپ, جۇرتشىلىق نازارىن نەگىزگى ون قاعيداتقا اۋداردى.
ساياسي تۇراقتىلىق پەن قوعامدىق كەلىسىمنىڭ ارقاسىندا ۇزاق مەرزىمدى ماقساتتارىمىز جۇزەگە اسىپ, تاڭداۋ باعىتىمىز بارىنشا تۇرلاۋلى سيپاتقا يە. ءبارىمىز دە ەرتەڭىمىزدىڭ بۇگىنگىدەن جارقىن بولۋىن قالايمىز. ماقساتىمىز ايقىن. جاڭا الەم كوشباسشىلارىنىڭ قاتارىنا قوسىلۋ – اسىل مۇراتىمىز. وعان جەتۋگە قازاقستاندا بارلىق العىشارتتار قالىپتاسقان. تاريحي قۇجات بيىك بەلەستەرگە جەتەلەپ, تىڭ سەرپىلىستەرگە قۇلشىندىرادى. بۇل ورايدا ادامي كاپيتالدى جاڭعىرتۋدىڭ, جاقسارتۋدىڭ ماڭىزى وتە زور. ءبىلىمدى دە ساۋاتتى ۇرپاق ءوسىرۋ, تاربيەلەۋ باسىم باعىتتاردىڭ ءبىرى بولىپ قالا بەرەدى. حالىقارالىق ستاندارتتارعا نەگىزدەلگەن ءبىلىم بەرۋ باعدارلامالارى دەربەس وزىق جۇيەمىزدى قۇرۋدى جەدەلدەتە تۇسەرى انىق. ونىڭ ومىردەگى ناقتى قولدانىستارىن وڭىردە جۇمىس ىستەيتىن نازارباەۆ زياتكەرلىك مەكتەبى تاجىريبەسىنەن ايقىن اڭعارۋعا بولادى. ونىڭ قاتارىنا قازاق-تۇرىك, «لورد» ليتسەيلەرىن, ءا. دوسمۇحامبەتوۆ اتىنداعى دارىندى بالالارعا ارنالعان مامانداندىرىلعان مەكتەپ-ينتەرناتتى قوسار ەدىك. بۇل ءبىلىم وشاقتارىنىڭ قاي-قايسىسىن الساق تا جاڭارتىلعان مازمۇنداعى ءادىس-تاسىلدەر كەڭىنەن قولدانىلادى. دەسەك تە, ءبىلىم بەرۋ سالاسىندا تولعاقتى ماسەلەلەر از ەمەس. ول كوبىنە وقىتۋ ساپاسىنا, كادرلاردىڭ بىلىكتىلىگىنە كەلىپ تىرەلەدى. بۇدان بىلاي جەكە كاپيتالدى تارتۋ ءۇشىن قالا مەكتەپتەرىندە جان باسىنا قاتىستى قارجىلاندىرۋ ۇلگىسى ەنگىزىلەتىن بولادى. مۇنىڭ ءتيىمدى جاقتارى كوپ. ەڭ باستىسى, باسەكەلەستىك قارىم ارتىپ, تۇپكى ناتيجە ناقتى ايقىندالادى.
حالىق قالاۋلىسى رەتىندە تۇرعىندار اراسىندا ءجيى بولىپ تۇرامىن. وسىنداي كەزدەسۋلەردە اتا-انالار تاراپىنان وقۋشىلار جۇكتەمەسىنىڭ شامادان تىس كوپتىگى ءجيى ايتىلاتىن. تالداۋ كورسەتكەندەي, قازاقستاندا بۇل كورسەتكىش تمد ەلدەرى اراسىندا ەڭ جوعارى ەكەن. مۇنداي جاعداي ويلاندىرماي قويمايدى. ەندى ونى تومەندەتۋ جولدارى قاراستىرىلىپ, ماسەلە شەشىمىن تاباتىن بولادى. ءبىلىم بەرۋدىڭ دەڭگەيىن سانمەن ەمەس, ساپامەن ولشەيتىن مەزگىل جەتتى. بۇل ورايدا پەداگوگتاردى وقىتۋدىڭ جانە ولاردىڭ بىلىكتىلىگىن ارتتىرۋدىڭ ماڭىزى ايرىقشا. كاسىبي شەبەرلىگى جوعارى ۇستاز جاس بۋىندى عىلىمي-زەرتتەۋ سالاسىنا دا, وندىرىستىك-تەحنولوگيالىق ورتاعا دا تەز بەيىمدەي الادى. الداعى ۋاقىتتا مەكتەپ باسشىلارى وسى جاعىن باستى نازاردا ۇستاعاندارى ابزال. كەز كەلگەن ەلدىڭ بولاشاعى ءبىلىمى مەن عىلىمىنىڭ دامۋ دەڭگەيىمەن تىعىز ساباقتاس. ءبىلىم بەرۋ جۇيەسىندەگى تۇبەگەيلى جاڭعىرتۋ مىندەتتەرىن تالاپتاعىداي جۇزەگە اسىرۋدى ساپالى وقۋلىقتاردان, زاماناۋي مەكتەپتەردەن بولە-جارا قاراۋعا بولمايدى. حالىقارالىق ستاندارتتارعا ساي كەلەتىن جانە نازارباەۆ زياتكەرلىك مەكتەپتەرىندە بەيىمدەلۋدەن وتكەن زاماناۋي وقۋ باعدارلامالارى قاجەتتى فۋنكتسيالىق ساۋاتتىلىق پەن سىني تۇرعىدان ويلاۋ قابىلەتىن دارىتارى انىق.
جاس قۇراقتاي جەلكىلدەپ ءوسىپ كەلە جاتقان جاستارىمىزدىڭ جان-جاقتى ىزدەنىستەرى كوڭىلگە ءۇمىت ساۋلەسىن سەبەدى. زاماناۋي تەحنيكالاردى يگەرسەم دەگەن تالاپتارى كۇشتى. جاڭالىقتارعا بەيىم. بىلسەم, ۇيرەنسەم دەگەن قىزىعۋشىلىعى زور. قىزىلجار وڭىرىندە دە ءۇش, ءتورت ءتىلدى ەركىن مەڭگەرگەن جاستار قاتارى قالىڭ. 2019 جىلدان باستاپ 10-11 سىنىپتارداعى جاراتىلىستانۋ عىلىمىنىڭ جەكەلەگەن پاندەرىن وقىتۋدى اعىلشىن تىلىنە كوشىرۋ وقۋشىلار ءۇشىن سونشالىقتى قيىندىق تۋدىرمايدى. جولداۋدا جاستاردى جاڭا تەحنولوگيالىق قالىپقا دايىنداۋدىڭ ماڭىزدى شارتى رەتىندە ءبىلىم بەرۋدىڭ بارلىق دەڭگەيىندە ماتەماتيكا جانە جاراتىلىستانۋ عىلىمدارىن وقىتۋ ساپاسىن كۇشەيتۋ كەرەكتىگىنە دە كوڭىل اۋدارىلدى. تسيفرلى ءبىلىم بەرۋ رەسۋرستارىن دامىتۋ, كەڭ جولاقتى ينتەرنەتكە قوسۋ جانە مەكتەپتەردى بەينەقۇرىلعىلارمەن جابدىقتاۋ جۇمىستارىن جالعاستىرۋ شەتىن ماسەلەلەردىڭ ءبىرى. اسىرەسە شالعاي اۋىل مەكتەپتەرىنىڭ ماتەريالدىق-تەحنيكالىق بازاسىن نىعايتۋ, جاس مامانداردى ورنىقتىرۋ, الەۋمەتتىك جاعداي جاساۋ جەرگىلىكتى بيلىك ورىندارىنىڭ باستى ۇستانىمى بولۋى ءتيىس. ءىرى ورتالىقتاردىڭ «اقىلدى» قالاعا اينالىپ, بالالارعا ارنالعان تەحنوپاركتەردىڭ دامۋى سۇيسىندىرسە, اۋىلدىق مەكتەپتەر تۇبەگەيلى قامقورلىقتى قاجەت ەتەدى. عالامتور جۇيەسىن ەركىن پايدالانا المايتىندارى, ديپلومدى ماماندار بارۋدان قاشقاقتايتىنى جاسىرىن ەمەس. ەلدى مەكەندەردىڭ ينفراقۇرىلىمىن دامىتساق, بۇل ماسەلەلەردىڭ شەشىم تابارى ءسوزسىز. ويتكەنى ادامي كاپيتالدىڭ ساپاسىن جاقسارتۋ ونى الەۋمەتتىك جاعىنان تولىققاندى قامتاماسىز ەتۋگە تىكەلەي قاتىستى.
جولداۋ تالاپتارىن ورىنداۋ – بارشا قازاقستاندىقتاردىڭ ابزال بورىشى.
جانار تالاسپاەۆا,
قالالىق ءماسليحات دەپۋتاتى,
«نۇر وتان» پارتياسى ساياسي كەڭەسىنىڭ مۇشەسى
سولتۇستىك قازاقستان وبلىسى