قازاقستاننىڭ سىرتقى ىستەر ءمينيسترى قايرات ءابدىراحمانوۆ پورتۋگاليا سىرتقى ىستەر مينيسترلىگى سىرتقى ساياسات جونىندەگى باس ديرەكتورى پەدرۋ كوشتا پەرەيرومەن كەزدەستى.
تاراپتار ساياسي, ەكونوميكالىق جانە مادەني-گۋمانيتارلىق ىنتىماقتاستىقتىڭ احۋالىن جانە پەرسپەكتيۆالارىن تالقىلادى, ءارتۇرلى سالاداعى شارتتىق-قۇقىقتىق بازانى كەڭەيتۋ قاجەتتىلىگىن اتاپ ءوتتى. وزەكتى حالىقارالىق پروبلەمالار بويىنشا پىكىر الماستى.
كەلىسسوزدەر بارىسىندا ەكىجاقتى جانە كوپجاقتى فورماتتاعى ىنتىماقتاستىقتى ۇلعايتۋ جولدارى قاراستىرىلدى. اڭگىمەلەسۋشىلەر ەكى ەلدىڭ تسيفرلاندىرۋ, جاڭعىرتىلاتىن ەنەرگەتيكا, ەۋرازيالىق كونتينەنتتەگى كولىك-لوگيستيكالىق بايلانىستاردى دامىتۋ سالالارىندا كووپەراتسيا پەرسپەكتيۆالارىن ءبىراۋىزدان بەلگىلەدى.
ساۋدا-ەكونوميكالىق ءوزارا ءىس-قيمىلدى جانداندىرۋ ماقساتىندا ەكونوميكالىق, ساۋدا جانە تەحنيكالىق ىنتىماقتاستىق تۋرالى ۇكىمەتارالىق كەلىسىمدى جاساسۋ بويىنشا جۇمىستى تەزدەتۋ جونىندەگى ۋاعدالاستىققا قول جەتكىزىلدى.
سونىمەن قاتار ۇستانىمداردى ۇيلەستىرۋ جانە قازىرگى زاماننىڭ وزەكتى پروبلەمالارىن شەشۋ ءۇشىن حالىقارالىق جانە وڭىرلىك ۇيىمدار شەڭبەرىندە ءوزارا ءىس-قيمىل, سونداي-اق سىرتقى ساياسي باستامالارىن ءوزارا قولداۋ ماسەلەلەرى ءسوز بولدى. پورتۋگاليا ءسىم باس ديرەكتورى بۇۇ قاۋىپسىزدىك كەڭەسىنىڭ شەڭبەرىندە قازاقستاننىڭ سىرتقى ساياسي باستامالارىن قولدادى. ليسسابوننىڭ ەلىمىزگە حالىقارالىق ارەنادا قولداۋ كورسەتۋ دايىندىعىن ءبىلدىردى.
كەزدەسۋ بارىسىندا ەۋروپالىق تاراپ قوعامدىق ءومىردىڭ ءارتۇرلى سالاداعى زاڭنامالاردى جەتىلدىرۋگە باعىتتالعان قازاقستانداعى ينستيتۋتتىق رەفورمالاردى ىسكە اسىرۋ بارىسى تۋرالى اقپاراتتاندىرىلدى.
پورتۋگال تاراپى «استانا» حالىقارالىق قارجى ورتالىعى, IT ستارتاپتار حالىقارالىق تەحنوپاركى, سونداي-اق «جاسىل» تەحنولوگيالاردى جانە يننوۆاتسيالىق جوبالاردى دامىتۋ بويىنشا حالىقارالىق ورتالىعى ەكسپو-2017 بازاسىندا جوبالاردى ىسكە اسىرۋعا ىنتىماقتاستىققا شاقىرىلدى.
پورتۋگاليا – قازاقستاننىڭ ەۋروپاداعى ماڭىزدى ساياسي جانە ەكونوميكالىق ارىپتەستىكتەردىڭ ءبىرى. 2017 جىل بويىنشا ەكىجاقتى تاۋار اينالىمى 2016 جىلمەن سالىستىرعاندا 65%-عا ارتىپ, 614,4 ملن دوللارعا جەتكەن. پورتۋگال ينۆەستيتسيالارىنىڭ قازاقستان ەكونوميكاسىنا سالعان كولەمى 250 ملن دوللاردى قۇرايدى.
قازاقستاندا «Saraiva Associados» (ارحيتەكتۋرالىق جوبالاۋ), «SIBS» (بانكتىك قوسىمشالاردى ازىرلەۋ), «RC Europa Stands» (كورمە ستەندىلەرىن جاساۋ) سياقتى جانە باسقا پورتۋگاليالىق كاسىپورىندار تابىستى جۇمىس ىستەۋدە.
ايتا كەتەيىك, پ.پەرەيرو باستاعان پورتۋگاليالىق دەلەگاتسيا استاناعا سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ توراعالىعىمەن وتكەن سىرتقى ىستەر مينيسترلىكتەرى اراسىنداعى كونسۋلتاتسيالاردىڭ كەزەكتى راۋندىنا قاتىسۋعا كەلگەن بولاتىن.
ازىرلەگەن جولدىباي بازار,
«ەگەمەن قازاقستان»