قازاقستانداعى ادام قۇقىقتارى جونىندەگى ۋاكىل اسقار شاكىروۆ بۇۇ بالالار قورىنىڭ (يۋنيسەف) قازاقستانداعى وكىلى يۋري وكساميتنىيمەن بىرگە الماتى وبلىسىنىڭ جاۋعاشتى كەنتىندەگى (لا-155/4) ايەلدەر كولونياسىنا باردى.
بۇل تۇزەۋ مەكەمەسى – اۋماعىندا بالالار ءۇيى ورنالاسقان قازاقستانداعى قىلمىستىق-اتقارۋ جۇيەسىندەگى جالعىز مەكەمە بولىپ تابىلادى. باس بوستاندىعىنان ايىرۋ ورىندارىندا جاس بالالاردىڭ بولۋى بۇگىندە قوعامدىق پىكىرتالاستىڭ تاقىرىبى بولىپ وتىر. اتالعان ساپار وسى جايتقا قاتىستى ماسەلەلەردى زەردەلەۋ ماقساتىندا ۇيىمداستىرىلدى. بۇل ورايدا بالالار ءۇيىن تۇرمە اۋماعىنان شىعارۋ, سونداي-اق جۇكتى ايەلدەرگە جانە كىشكەنتاي بالالارى بار ايەلدەرگە جازاسىن كەيىنگە شەگەرۋدى قامتاماسىز ەتۋ جونىندە ۇسىنىستار بەرىلدى.
مەكەمەدەگى سوتتالعان انالارمەن جانە اكىمشىلىك قىزمەتكەرلەرىمەن وتكىزىلگەن اڭگىمەلەسۋلەر انانىڭ بالاسىنان اجىراۋى ءبىرجولاتا تەرىس سالدارعا اكەلۋى مۇمكىن دەگەن كوزقاراستى راستادى. سەبەبى تابيعي جانە قاجەتتى تۇراقتى بايلانىس اناعا جان-جاقتى وڭ اسەرىن تيگىزەدى جانە بالانىڭ تولىققاندى دامۋى ءۇشىن قاجەتتى العىشارتتار جاسايدى.
بوستاندىعىنان ايىرىلعان ايەلدىڭ ءوتىنىشى تۋرالى بۇۇ-نىڭ جالپىعا بىردەي تانىلعان ستاندارتتارىنا سايكەس (ن.ماندەلانىڭ ەرەجەسى جانە بانگكوكتىك ەرەجە) بالانى تۇرمەدە اتا-اناسىنىڭ بىرىمەن بىرگە قالدىرۋ تۋرالى شەشىم بالانىڭ مۇددەلەرىنە نەگىزدەلۋى ءتيىس.
شەتەلدەردىڭ ءتيىستى تاجىريبەسىن تالداۋ ناتيجەسى باس بوستاندىعىنان ايىرۋ ورىندارىندا انا مەن پەرزەنتىنىڭ قارىم-قاتىناسىن بالا بەلگىلى ءبىر جاسقا تولعانعا دەيىن ولاردىڭ بىرلەسە ءومىر ءسۇرۋىن قامتاماسىز ەتۋ قاجەتتىگىن كورسەتەدى. سونداي-اق بۇل تۇرعىدا بالانىڭ جالپى دامۋىنا جانە ونىڭ الەۋمەتتەنۋىنە قاتىستى بىرقاتار ماسەلەلەردى, اتاپ ايتقاندا اكەسى مەن باسقا جاقىن تۋىستارىنا بالانى اناسىنىڭ كەلىسىمىمەن مەكەمەدەن بەلگىلى ءبىر مەرزىمگە الىپ تۇرۋ قۇقىعىن بەرۋ ماسەلەلەرىن قاراستىرۋ ءجون ەكەندىگى ايتىلۋدا.
جۇكتى ايەلدەر مەن كىشكەنتاي بالالارى بار ايەلدەرگە جازاسىن وتەۋىن شەگەرۋدى قولدانۋ بولىگىندە, قولدا بار ءمان-جايلاردى جان-جاقتى ەسكەرە وتىرىپ, ءاربىر جاعدايعا بايلانىستى جەكە كوزقاراس قاجەت. ال قىلمىستىق كودەكستىڭ 74-بابىنا سايكەس, قولدانىستاعى حالىقارالىق تاجىريبەگە ۇقساس, بۇل شارالار سوتتالعاندارعا اۋىر نەمەسە اسا اۋىر قىلمىستار ءۇشىن قولدانىلمايدى.
جوعارىدا ايتىلعان ماسەلەلەر نەگىزىندە ۋاكىلەتتى مەملەكەتتىك ورگاندارعا جىبەرىلەتىن بىرقاتار ۇسىنىستار ازىرلەندى.