اقپارات جانە كوممۋنيكاتسيالار ءمينيسترى داۋرەن اباەۆ قازاقستاندا Telegram جەلىسىنىڭ بۇعاتتالۋ ىقتيمالدىلىعىنا قاتىستى پىكىر ءبىلدىردى.
«بۇعاتتاۋ - بۇل قۇقىققا قارسى كونتەنتتىڭ تاراتىلۋىمەن كۇرەس جۇرگىزۋدە مەملەكەتتىڭ ەڭ سوڭعى (اقىرعى) شاراسى ەكەنىن ءتۇسىنۋ كەرەك. الايدا, بۇل تەك مەسسەندجەردىڭ اكىمشىلىگى ءبىزدىڭ ەسكەرتۋىمىزدى ەلەمەگەن جاعدايدا عانا ىسكە اسىرىلادى. سونىمەن قاتار, ءدال قازىردىڭ وزىندە Telegram اكىمشىلىگىنىڭ تاراپى ءبىزدىڭ تالاپتارعا تۇسىنىستىكپەن قارايتىنىن كورىپ وتىرمىز. جەكەلەگەن پاراقشالار جويىلىپ جاتىر. سوندىقتان, مەسسەندجەردى بۇعاتتاۋ تۋرالى باق-تاعى شۋلى اقپاراتتار شىندىقتان الىستاۋ», - دەدى داۋرەن اباەۆ.
بۇعان دەيىن داۋرەن اباەۆ Telegram مەسسەندجەرى كانالدارى «قازاقستاننىڭ دەموكراتيالىق تاڭداۋى» قوعامدىق قوزعالىسىنىڭ تىيىم سالىنعان ماتەريالدارىن ءوشىرۋ تۋرالى سوت وكىمىن ورىنداماسا, قازاقستان بيلىگى مەملەكەت تەرريتورياسىندا اتالعان مەسسەندجەردى بۇعاتتايتىنىن ايتقان بولاتىن.
استانا قالاسى ەسىل اۋداندىق سوتى ناۋرىز ايىندا قدت تىركەلمەگەن قوعامدىق قوزعالىسىن ەكسترەميستىك دەپ تانىپ, ونىڭ مەملەكەت اۋماعىندا جۇمىسىن جالعاستىرۋىنا تىيىم سالدى. اتالعان ۇيىمعا بۇرىنعى بانكير جانە شەنەۋنىك مۇحتار ءابليازوۆ توراعالىق ەتەدى.
مينيستر Telegram مەسەندجەرىنىڭ مەكەنجايىنا رەسمي حابارلاما جىبەرىلگەنىن ايتتى. اتالعان حابارلامادا جىبەرۋشى تاراپ قازاقستان تەرريتورياسىندا قدت ماتەريالدارىن كورسەتۋگە تىيىم سالۋ جانە ولاردى جويۋعا قاتىستى شارالار قولدانۋدى سۇراعان.
«بۇگىنگى تاڭدا جىبەرگەن ەسكەرتۋ قاعازىمىزدى Telegram اكىمشىلىگى قاراستىرىپ جاتىر. سونداي-اق, سوت شەشىمى ورىندالماعان جاعدايدا قازاقستان رەسپۋبليكاسىنىڭ قازىرگى زاڭناماسىنا سايكەس مينيسترلىك مەسسەندجەردى ەل تەرريتورياسىندا تولىقتاي بۇعاتتاۋعا ءماجبۇر بولادى», — دەدى اباەۆ.
ەسكە سالا كەتسەك, بۇدان بۇرىن پاۆلودار قالاسىنىڭ تۇرعىنى ءوزىنىڭ كەلىسىمىنسىز Telegram جەلىسىندەگى قازاقستاندا ەكسترەميستىك ۇيىم دەپ تانىلعان قازاقستاننىڭ دەموكراتيالىق تاڭداۋى توبىنا قوسىلىپ كەتكەنى تۋرالى مينيسترلىكتىڭ بلوگىنا شاعىم بىلدىرگەن بولاتىن. «مەنىڭ ويىمشا, ەكسترەميستىك ۇيىمنىڭ باسشىسى قازاقستان رەسپۋبليكاسىنىڭ ازاماتتارىن جاپپاي قىلمىستىق جاۋاپكەرشىلىككە تارتقىسى كەلەتىن سەكىلدى. بۇدان كەيىن «Telegram» مەسسەندجەرىنىڭ اكىمشىلىگى مەنىڭ كەلىسىمىمسىز ءار ءتۇرلى تىيىم سالىنعان توپتارعا ەنگىزىپ جىبەرمەيتىندەي نەمەسە اتالعان توپتى بۇعاتتايتىنداي شارا قابىلداۋ ماسەلەسىن قاراستىرسا دەيمىز», - دەپ جازدى پاۆلودارلىق تۇرعىن.