ۇلتتىق ۇلان قىزمەتىندە ەسىرتكى ىزدەۋ جۇمىسىنا ءيىسشىل يتتەردى پايدالانۋ ءوز تيىمدىلىگىن كورسەتىپ كەلەدى. وتكەن جىلى قىزمەت بارىسىندا ەسىرتكى تابۋدىڭ 56 وقيعاسى تىركەلىپ, 103 كەلى ءتۇرلى ەسىرتكى زاتتارى تاركىلەنگەن. بۇل ناتيجەلەر كينولوگ مامانداردىڭ بىلىكتىلىگىنە تىكەلەي بايلانىستى.
وسى رەتتە, الماتى ماڭىندا ورنالاسقان ۇلتتىق ۇلاننىڭ 6654 اسكەري بولىمىندە وتكەن كينولوگتاردىڭ بىلىكتىلىگىن ارتتىرۋعا ارنالعان 4 اپتالىق حالىقارالىق سەمينار-ترەنينگ شەبەرلىك شىڭداۋدىڭ وزىق الاڭىنا اينالدى دەسەك بولادى.
قاۋىپسىزدىك ماقساتىنداعى سان ءتۇرلى شارادا قىزمەتكەرلەرگە قولعابىس بولاتىن قىراعى يتتەردى باۋلۋدا امەريكاندىقتاردىڭ الدىنا ءتۇسىپ كورگەن ەل جوق. تاجىريبە تۇرعىسىنان دا وزگەلەردەن دارالاناتىن وسى ەلدىڭ كينولوگتارى. ەلىمىزگە ءدال وسى اقش-تان ارنايى كەلگەن وزىق ماماندار, ەسىرتكىگە قارسى كۇرەس باعدارلاماسىنىڭ مەنەدجەرى كريستوفەر كەنت جانە كينولوگ-نۇسقاۋشى بريۋس گۋدلەي مەن سكوتت زايتنەر ءتورت اپتا بويى ۇلان ساربازدارىن بۇل ءىستىڭ قىر-سىرىنا قانىقتىرىپ, ءوز تاجىريبەلەرىمەن ءبولىستى. وقۋ-جاتتىعۋ اياسىندا ەسىرتكى زاتتارىن ىزدەپ تابۋ ماقساتىندا پايدالانىلاتىن ءيىسشىل يەتتەردى باپتاۋ مەن ولاردىڭ داعدىسىن ارتتىرۋ بويىنشا شەتەلدىك مامانداردىڭ تىڭ تاجىريبەسى ۇلان ساپىنداعى كينولوگتاردىڭ بىلىكتىلىگىن شىڭداي ءتۇستى.
حالىقارالىق شەڭبەردە ۇيىمداستىرىلعان سەميناردىڭ جابىلۋ سالتاناتىنا كەلگەن اقش-تىڭ الماتى قالاسىنداعى باس كونسۋلى مارك مۋدي اتالعان شارا ەكى ەل اراسىنداعى ىنتىماقتاستىق پەن اسكەري تاجىريبە الماسۋعا زور سەرپىن بەرگەنىن ايتىپ, الداعى ۋاقىتتا دا بۇل باعىتتاعى جۇمىستار جالعاسىن تاباتىنىن مالىمدەدى.
ۇلتتىق ۇلان كينولوگتارى اسكەري بولىمدەگى كينولوگيالىق ورتالىقتا وتكەن ترەنينگ بارىسىندا اقش-تىڭ تاجىريبەلى ماماندارىنان زاڭسىز تاۋار اينالىمىنا قارسى كۇرەس جۇرگىزۋگە قاتىستى ءادىس-تاسىلدەردى ۇيرەنىپ, ايازدى كۇندەر مەن 40 گرادۋستىق ىستىق اۋا رايىندا قىراعى يتتەرمەن قالاي جۇمىس ىستەۋ كەرەكتىگىن ايتىپ, ءوز تاجىريبەلەرىن دە ورتاعا سالدى. باس-اياعى ءبىر ايعا سوزىلعان حالىقارالىق وقۋ-جاتتىعۋ ناتيجەسى بويىنشا ۇلاندىق كينولوگتار وقۋ كۋرسىنان ءوتىپ, بىلىكتىلىگىن ارتتىرعانىن راستايتىن سەرتيفيكات الۋ ءۇشىن قورىتىندى ەمتيحان تاپسىرعان بولاتىن. ناتيجەسىندە, تالاپكەرلەردىڭ ءبارى دەرلىك سەنىم ۇدەسىنەن شىعا ءبىلدى.
– تاجىريبە ساباقتارى ويداعىداي ءوتتى. شەتەلدىك مامانداردان ءيىسشىل يتتەردى باپتاۋدىڭ تىڭ تاسىلدەرىن ۇيرەندىك. ەندى وسىنى جۇمىس بارىسىندا قولدانۋعا مۇمكىندىك الىپ وتىرمىز, – دەيدى تالىمگەر-كينولوگ ايدوس راحمەتوۆ.
ءىس-شارانىڭ سالتاناتتى جابىلۋ راسىمىندە جاتتىعۋ جيىنىنان وتكەن ساربازدار ەسىرتكى زاتتارىن ىزدەۋ جانە شارتتى قىلمىسكەرلەردى قۇرىقتاۋ بويىنشا ەسىرتكى ىزدەيتىن يتتەرمەن كورسەتىلىمدىك ساباقتار ۇيىمداستىرىپ جينالعاندارعا ءوز ونەرلەرىن پاش ەتتى.
ارمان وكتيابر, «ەگەمەن قازاقستان»