سوڭعى 4 جىلدا قازاقستاننىڭ دۋرۋم بيدايى الەمدىك نارىقتاعى ەكسپورتتىق ۇلەسىن 280 مىڭ تونناعا ارتتىرعان. بۇل تۋرالى استانادا وتكەن «KazGrain 2018» حالىقارالىق كونفەرەنتسياسى بارىسىندا Arete Research&Consulting in Economics اعا كونسۋلتانتى جانە نارىق تالداۋشىسى فيليپپو بەرتۋتستسي مالىمدەدى.
ونىڭ ايتۋىنشا, 2014 جىلى 170 مىڭ توننا بيداي وندىرىلسە, 2017 جىلى بۇل كورسەتكىش 450 مىڭ توننا استىققا دەيىن ۇلعايعان. قازاقستاننان ەكسپورتتالعان ءونىم يتاليا مەن تۇركيا مەملەكەتتەرىنە جونەلتىلدى. نارىق تالداۋشىسى كەلتىرگەن مالىمەتكە سۇيەنسەك, جاھاندىق بيداي ەكسپورتىنداعى جاعداي كانادامەن تىعىز بايلانىستى بولماق. سەبەبى, ساپاسى جاعىنان الەمدىك سۇرانىستى وتەي الاتىن ەلدەردىڭ ءبىرى بولىپ وتىر. بيدايدى كوپ تۇتىناتىن يتاليا بۇعان دەيىن تەك كانادالىق استىقتى قولدانىپ كەلگەن. كەيىنگى ۋاقىتتا ەۋروپا دا بيداي ءوندىرۋدى جولعا قويىپ, ءونىم ۇلەسىن ايتارلىقتاي ۇلعايتۋدا. دەگەنمەن, ءالى دە ورتالىق ەۋروپا جاقسى ءونىم الۋعا قولايسىز.
«بيداي ونىمىنە قاتاستى ارنايى ساراپتاما جاسايتىن ورتالىقتارمەن تىعىز قارىم-قاتىناستامىز. الەمدىك نارىقتا كانادا بيداي ءونىمىن اۋقىمدى كولەمدە يمپورتتاۋشى مەملەكەت اتانىپ, ەكسپورتتىڭ 60 پايىزىن قۇراپ وتىر. ودان كەيىن اقش-دا الدىڭعى قاتارلى ەكسپورتتاۋشى رەتىندە تانىلىپ كەلەدى. بۇل رەتتە بيداي ءونىمىن ەۋروپاعا قازاقستان دا جەتكىزىپ وتىرعاندىعى ايتا كەتكەن ءجون. اسىرەسە, يتاليا مەن گەرمانيا باستى تۇتىنۋشى. سوندىقتان دا, قازاق بيدايى ساپا جاعىنان كانادالىق ونىمنەن ارتىق بولماسا, كەم ەمەس», دەدى Arete Research&Consulting in Economics اعا كونسۋلتانتى. دەسە دە, فيليپپو بەرتۋتستسي ەكسپورت كولەمىن ۇلعايتىپ, ءونىمدى سىرتقا شىعارۋدى كەڭەيتۋ ءۇشىن قازاقستاندىق وندىرۋشىلەرگە جانە دۋرۋم بيدايىن ەكسپورتتاۋشىلارعا ۇزاق مەرزىمدى ستراتەگيا قاجەت ەكەندىگىن تىلگە تيەك ەتتى. سونداي-اق نارىقتاعى باسەكەگە قابىرەتتى بولۋ ءۇشىن ۇدايى تالداۋ جۇرگىزۋ كەرەكتىگىن دە جەتكىزدى.
جاھاندىق نارىقتاعى ساپالى استىقتىڭ ۇلەسىن ارتتىرۋ جانە اتالعان ونىمدەردى جەتكىزۋدىڭ پەرسپەكتيۆالىق باعىتتارىن تالقىلاۋعا ارنالعان فورۋم اياسىندا 21 ەلدەن 270 كومپانيا مەن سالالىق ۇيىمداردىڭ 280 قاتىسۋشىسى باس قوستى.