ەلىمىزدە كوپ بالالى انالار سانى بويىنشا وڭتۇستىك قازاقستان وبلىسى كوش باستاپ تۇر. بۇگىندە وڭىردە كوپ بالالى انالار 98 600-دەن استى. ولاردىڭ 3998-ءى «باتىر انالار», 16361-ءى «التىن القا», 42 724-ءى «كۇمىس القا» يەگەرى. ال, 6906 انا ءى-ءشى جانە ءىى-ءشى دارەجەلى «انا داڭقى» وردەنىمەن ماراپاتتالعان.
وڭتۇستىك قازاقستان وبلىسىنىڭ اكىمى ج.تۇيمەباەۆ قىز-كەلىنشەكتەر مەن اياۋلى انالاردى «8 ناۋرىز – حالىقارالىق ايەلدەر كۇنى» مەرەكەسىمەن قۇتتىقتاۋ كەزىندە وسىنداي دەرەكتەر كەلتىردى. ارداگەرلەر مەن زيالى قاۋىم وكىلدەرى, وبلىستىق اسسامبلەيا وكىلدەرى, وبلىس اكىمىنىڭ جانىنداعى ايەلدەر ىستەرى جانە وتباسىلىق – دەموگرافيالىق ساياسات جونىندەگى كوميسسيا مۇشەلەرى, وبلىستىڭ اۋدان, قالالارىنان ءتۇرلى سالادا قىزمەت ەتەتىن قىز-كەلىنشەكتەر قاتىسقان سالتاناتتى جيىندا ءوڭىر باسشىسى ءۇيدىڭ دە, ءتۇزدىڭ جۇمىسىن قاتار الىپ, قوعامدا ايرىقشا بەلسەندىلىگىمەن كوزگە ءتۇسىپ جۇرگەن 33 ايەلدى ماراپاتتادى.
ونىڭ 5-ىنە «وبلىسقا سىڭىرگەن ەڭبەگى ءۇشىن» بەلگىسى بەرىلسە, 14-ىنە وڭتۇستىك قازاقستان وبلىسى اكىمىنىڭ گراموتاسى, 9-ى وبلىس اكىمىنىڭ العىس حاتى تابىس ەتىلدى. ال, 5 انانىڭ كەۋدەسىنە «التىن القا» توسبەلگىسى تاعىلدى. سونداي-اق, اكىم سالتاناتتى شاراعا كەلگەن باسقا دا قىز-كەلىنشەكتەرگە سىي-سياپات جاسادى.
سونداي-اق, نازىك جاندىلارعا ارنايى اق داستارحان جايىلىپ, «ايەل – انا – ءومىردىڭ وزەگى» اتتى كونتسەرتتىك باعدارلاما ۇيىمداستىرىلدى.
عالىمجان ەلشىباي,
«ەگەمەن قازاقستان»