بۇگىن دۇنيە جۇزىلىك ساۋدا ۇيىمى باس كەڭەسىنىڭ وتىرىسىندا دسۇ-نىڭ ساۋدا بويىنشا قىزمەتتەرى جونىندەگى كەڭەستىڭ ارنايى سەسسياسىنىڭ توراعاسى بولىپ قازاقستان رەسپۋبليكاسى تاعايىندالدى.
مۇنداي جاۋاپتى لاۋازىمعا قازاقستاننىڭ سايلانۋى دسۇ-عا مۇشە مەملەكەتتەردىڭ پرەزيدەنت نۇرسۇلتان نازارباەۆتىڭ باسشىلىعىمەن قولايلى ينۆەستيتسيالىق كليمات قۇرۋ جانە قازاقستانداعى قىزمەتتەر نارىعىن دامىتۋ ماقساتىندا جۇرگىزىلىپ جاتقان رەفورمالارعا سەنىمىن دالەلدەيدى.
قازاقستاننىڭ بۇۇ جانە باسقا دا حالىقارالىق ۇيىمدار جانىنداعى تۇراقتى وكىلى جانار ايتجانوۆانىڭ ايتۋىنشا, دۇنيەجۇزىلىك ساۋدا ۇيىمىنا كىرۋ كەزىندە قازاقستان قارجىلىق, تەلەكوممۋنيكاتسيالىق جانە ەنەرگەتيكالىق قىزمەتتەر سياقتى نەگىزگى ەكونوميكالىق سەكتورلارعا شەتەلدىك كومپانيالارعا قول جەتكىزۋ ءۇشىن وتاندىق قىزمەتتەر نارىعىن كەزەڭ-كەزەڭمەن ىرىقتاندىرۋعا قاتىستى ايتارلىقتاي مىندەتتەمەلەر الدى.
بۇل تۇرعىدا, توراعالىق بارىسىندا قازاقستان جاڭادان قوسىلعان ەلدەر ءۇشىن تەڭ باسەكەلەستىك جاعدايلاردى جاساۋعا ۇمتىلاتىن بولادى جانە دسۇ-عا قۇرۋشى ەلدەردىڭ قىزمەت سەكتورىن ودان ءارى ىرىقتاندىرۋ بويىنشا مىندەتتەمەلەرىن قابىلداۋىنا ىقپال ەتەدى.
قىزمەت كورسەتۋ نارىعى دسۇ-عا مۇشە ەلدەردىڭ ەكونوميكالارىن دامىتۋ ءۇشىن ۇلكەن ماڭىزعا يە ەكەنىن اتاپ وتكەن ءجون. ماسەلەن, 2017 جىلى الەمدىك ءجىو-دەگى قىزمەتتەردىڭ ساۋدا ۇلەسى 70 پايىزدى قۇرادى. قازاقستاننىڭ ءجىو قۇرىلىمىندا قىزمەت كورسەتۋ سالاسىنىڭ كولەمى 57 پايىزدى قۇرايدى.
ساۋدا جونىندەگى كەڭەستىڭ ارنايى سەسسياسى دسۇ-عا مۇشە ەلدەردىڭ قىزمەتتەر نارىعىنا قول جەتكىزۋ ءۇشىن جاعدايدى ودان ءارى ىرىقتاندىرۋ ءۇشىن كەلىسسوزدەر پروتسەسىن ۇيلەستىرۋگە جاۋاپتى.
اتاپ ايتقاندا, كەڭەس شەڭبەرىندە كەلەسى ماسەلەلەر بويىنشا كەلىسسوزدەر جۇرگىزىلەدى:
قىزمەت كورسەتۋ ساۋداسىن, ونىڭ ىشىندە قىزمەت كورسەتۋشىلەرگە رۇقسات بەرۋ جانە ليتسەنزيالاۋ پروتسەدۋرالارىy جەڭىلدەتۋ; ەلەكتروندىق كوممەرتسيا سالاسىن رەتتەۋ;مەملەكەتتىك ساتىپ الۋدى جۇزەگە اسىرۋ ەرەجەسى جانە قىزمەت كورسەتۋ سەكتورىنداعى سۋبسيديالار ۇسىنۋ جانە ت.ب.