وڭتۇستىكتە پرەزيدەنتتىڭ بەس الەۋمەتتىك باستاماسىن جۇزەگە اسىرۋ جولدارى تالقىلاندى

جالپى اعىمداعى جىلى بارلىق قارجىلاندىرۋ كوزدەرى ەسەبىنەن 730 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. بۇدان بولەك, 13,8 ملرد تەڭگەنى قۇرايتىن 22,9 مىڭ شارشى مەتر نەمەسە 1644 پاتەرلى 28 تۇرعىن ءۇيدىڭ جوبالاۋ-سمەتالىق قۇجاتتاماسى ازىرلەنىپ, رەسپۋبليكالىق بيۋدجەتتەن قوسىمشا قارجى بولۋگە ءتيىستى ۇسىنىس بەرىلگەن. بۇل جۇمىستار ەلباسىنىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە ايتىلعان ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋدى» جۇزەگە اسىرۋعا سەپتىگىن تيگىزبەك.  

وبلىس اكىمى ج.تۇيمەباەۆتىڭ توراعالىعىمەن وتكەن, مەملەكەت باسشىسى كوتەرگەن الەۋمەتتىك باستامالاردىڭ وڭىردە ورىندالۋى جۇيەسى تالقىلانعان جيىندا وڭىردە تۇرعىن ءۇي قۇرىلىسىن بەلسەندى تۇردە ىسكە اسىرۋ باستى نازاردا تۇرعانى ايتىلدى. ماسەلەن, 77 نىساننىڭ قۇرىلىسىنا 27,4 ملرد تەڭگە قاراستىرىلعان. سونداي-اق, وبلىس اكىمى ەلباسى باستامالارىن تولىعىمەن جۇزەگە اسىرىپ, وبلىستىڭ الەۋمەتتىك-ەكونوميكالىق جاعدايىن كوتەرۋ مەن تۇرعىنداردىڭ ءال-اۋقاتىن جاقسارتۋ ەكەندىگىن اتاپ ءوتتى. وزگە دە الەۋمەتتىك باستامالاردىڭ وڭىردە ورىندالۋىن جۇيەلەدى. مىسالى, ءۇشىنشى باستاما اياسىندا رەسپۋبليكا بويىنشا 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالىنادى. بۇل شارامەن وبلىستىڭ ستۋدەنتتەرى دە قامتىلاتىن بولادى. ال «شاعىن نەسيە بەرۋدى كوبەيتۋ» باعىتىندا بيىلعى جىلى «وڭتۇستىك» ايماقتىق ينۆەستيتسيالىق ورتالىعى ارقىلى 4 ملرد. تەڭگەگە شاعىن جانە ورتا بيزنەسكە كومەك كورسەتىلۋ جوسپارلانۋدا. جاستاردى قولداۋ ماقساتىندا «جاس كاسىپكەر» باعدارلاماسى جۇزەگە اسىرىلۋدا. باعدارلاما اياسىندا كاسىپكەرلىكپەن اينالىسۋعا نيەت بىلدىرگەن جاستارعا كەپىلسىز 2 ملن تەڭگە كولەمىندە نەسيە قاراجاتى ۇسىنىلادى.

جيىنعا قاتىسقان مەملەكەت جانە قوعام قايراتكەرلەرى, ەل بەلسەندىلەرى ەلباسى باستامالارىن قولداپ, ۇندەۋدە اتاپ كورسەتىلگەن ماسەلەلەر جۇيەلى تۇردە ورىندالۋ قاجەتتىگىن العا تارتتى.

عالىمجان ەلشىباي,

«ەگەمەن قازاقستان»