وسكەمەندە مۇمكىندىگى شەكتەۋلى بالالار وزگەشە كونتسەرت قويدى

وزگەشەلىگى سول, مۇمكىندىگى شەك­تەۋلى بالالار بۇل كۇنى قالا­داعى شالقار مۇحامعاليەۆ, ۆلاد لوسكۋتوۆ سەكىلدى ءانشى جاس­تارمەن بىرگە ءان شىرقاپ, بي بي­لەدى. اسىرەسە ايزار ايدوستىڭ قولاربادا وتىرىپ ورىنداعان «قايتەر ەدىك ومىرگە كەلمەگەندە» ءانىن ايتقانداعى مۇڭدى داۋىسى زالداعى جۇرتشىلىقتىڭ كوزىنە جاس ءۇيىردى. مادەني شارا اياقتالعاننان كەيىن ء«ۇلبى» مۇم­كىندىگى شەكتەۋلى بالالار ورتا­لىعىنىڭ تاربيەلەنۋشىسى, تسەرەبرالدى سال اۋرۋىمەن اۋىراتىن بالعىن روللان سىمباتوۆ ساحناعا شاقىرىلىپ, وعان وسى ۋني­ۆەرسيتەتتىڭ تۇلەگى, جەكە كاسىپ­كەر ميراس ساينولدين كومەك رە­تىندە 200 مىڭ تەڭگەنى تابىس ەتتى.

«نۇرلى جۇرەك» قايى­رىم­دىلىق كلۋبىنىڭ جەتەك­شىسى, وقۋ ورنىنىڭ ساۋلەت فاكۋل­تەتىنىڭ 3-كۋرس ستۋدەنتى نۇرگۇل بازىلقىزىنىڭ ايتۋىنشا, روللان ەمدەلۋ ءۇشىن جاقىندا قىتاي ەلىنە بارماق. وندا بارىپ, تەك تىركەلۋ ءۇشىن عانا 2,5 ميلليون تەڭگە كەرەك. «بىلتىر «نۇرلى جۇرەكتىڭ» مۇشەلەرى روللاننىڭ ءوز ەلىمىزدە ەمدەلۋىنە 500 مىڭ تەڭگە قارجى جيناپ بەرگەن بولاتىن. ال 2,5 ميلليون تەڭگە ءساۋىر ايىنا دەيىن جينالۋعا ءتيىس. ودان كەيىن قانشا رەت شاقىرادى, قانشا قارجى جۇمسالادى. ول جاعى ازىرگە بەلگىسىز», – دەيدى نۇرگۇل.

رەتى كەلگەندە ايتا كەتەيىك, «نۇرلى جۇرەك» قايىرىمدىلىق كلۋبى وسىدان تۋرا ءبىر جىل بۇ­رىن جۇمىسىن باستاپتى. كلۋب مۇشەلەرىنىڭ بارلىعى دا – وسى ۋنيۆەرسيتەتتىڭ بەلسەندى ستۋ­دەنتتەرى. ەلۋگە جۋىق مۇشەسى بار كلۋب مۇمكىندىگى شەكتەۋلى, اتا-انا قامقورلىعىنسىز قالعان بالالار مەن الەۋمەتتىك تۇرعىدان از قامتىلعان وتباسىلارعا كومەك كورسەتۋ ماقساتىندا قۇرىلىپتى. وسى شاراعا ايزار ايدوس ەسىمدى مۇمكىندىگى شەكتەۋلى بالانىڭ اجەسى مارجان شابيەۆا ارنايى كەلىپتى. «مەنىڭ نەمەرەم جۇرە المايدى. ارباعا تاڭىلعان. مى­نا ستۋدەنتتەرگە مىڭ العىس. كە­لىپ, جاعدايىمىزدى ءبىلىپ, سىي­لىقتارىن اكەلىپ تۇرادى», دەپ ريزا­شىلىعىن جەتكىزدى. كەش سو­­ڭىندا ء«ۇمىت» بالالار ءۇيى, ء«ۇلبى» مۇمكىندىگى شەك­تەۋلى بالالار ورتالىعى مەن «اق­نيەت» ين­تەر­ناتىنىڭ 130 تاربيە­لەنۋ­شىسىنە سىيلىقتار تابىس ەتىلدى.

ازامات قاسىم,

«ەگەمەن قازاقستان»

وسكەمەن