رەسەي عىلىم اكادەمياسىنىڭ اكادەميگى ابەل اگانبەگيان مەن رەسەي پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسى عىلىمي كەڭەسىنىڭ مۇشەسى سەرگەي كالەندجيان ستراتەگيانى ازىرلەگەن قازاقستان-رەسەي بىرلەسكەن جۇمىس توبىنىڭ وتىرىسىنا قاتىستى. شاراعا وبلىس اكىمى قىرىمبەك كوشەرباەۆ, وبلىس اكىمىنىڭ ورىنباسارلارى, مەملەكەتتىك ورگانداردىڭ باسشىلارى قاتىستى.
ەستەرىڭىزگە سالا كەتەيىك, 2013 جىلدىڭ جەلتوقسانىندا رەسەي عىلىم اكادەمياسىنىڭ اكادەميگى ابەل اگانبەگيان جەتەكشىلىك جاساعان قازاقستاندىق جانە رەسەيلىك عالىمدار مەن مامانداردىڭ قاتىسۋىمەن ازىرلەنگەن قىزىلوردا وبلىسىنىڭ 2020 جىلعا دەيىنگى الەۋمەتتىك-ەكونوميكالىق دامۋ ستراتەگياسى قابىلدانعان بولاتىن.
ستراتەگيانى جۇزەگە اسىرۋدىڭ ارالىق ناتيجەلەرى ەكى جىل سايىن قورىتىندىلانىپ وتىرادى. 2016 جىلى ابەل اگانبەگيان وڭىرگە كەلىپ, «قىزىلوردا ايتارلىقتاي وزگەردى, دەگەنمەن ءالى دە كوپ جۇمىس ىستەلۋى كەرەك جانە بولاشاققا دەگەن ءۇمىت بار», - دەپ ءوڭىردىڭ دامۋىنا وڭ باعا بەرگەن بولاتىن.
كەزدەسۋدى اشقان وبلىس اكىمى قىرىمبەك كوشەرباەۆ ايماقتىڭ دامۋ قارقىنىن كورسەتەتىن بارلىق ماكروەكونوميكالىق كورسەتكىشتەر بويىنشا وڭ ديناميكاعا قول جەتكىزگەنىن اتاپ ءوتتى. سوڭعى 5 جىلدا مۇناي ءوندىرىسىنىڭ 2 ەسەگە تومەندەۋىنە بايلانىستى وبلىس 2017 جىلى تەك ءبىر عانا كورسەتكىش - ونەركاسىپتىك ءوندىرىس كولەمى بويىنشا وڭ ۆەكتورعا قول جەتكىزە المادى.
«2013 جىلى دامۋ ستراتەگياسىن قابىلداعان كەزدە ءبىزدىڭ الدىمىزعا قويعان باستى مىندەت – ەكونوميكانى يندۋستريالاندىرۋ ارقىلى ءارتاراپتاندىرۋ بولاتىن. سوڭعى بەس جىل ىشىندە وبلىسىمىزدا 50-دەن استام ونەركاسىپ نىسان ىسكە قوسىلسا, ونىڭ 16-سى - ءىرى جانە ورتا كاسىپورىن. ناتيجەسىندە, وڭدەۋشى سەكتوردا وسى كەزەڭ ىشىندە وندىرىلگەن ءونىم كولەمى 65 پايىزعا ارتسا, شيكىزاتتىق ەمەس سەكتوردىڭ ەكسپورت كولەمى تەك سوڭعى جىلدىڭ وزىندە 60 پايىزعا ءوستى»,- دەدى وبلىس اكىمى. سونداي-اق, ايماق باسشىسى وڭىردەگى كاسىپكەرلىكتى دامىتۋدىڭ ماڭىزدىلىعىن اتاپ ءوتتى.
«ەكونوميكانىڭ الەمدىك تۋربۋلەنتتىلىگىنىڭ ساباقتارىن ەسكەرە وتىرىپ, ءبىز بولاشاقتىڭ شاعىن جانە ورتا بيزنەستە ەكەنىنە ءاردايىم كوز جەتكىزۋدەمىز.ونىڭ ۇستىنە, ءبىزدىڭ الدىمىزدا 90 مىڭعا دەرلىك ءوزىن ءونىمسىز جۇمىسپەن قامتىعانداردى راسىمدەۋ مىندەتى تۇر. وسىعان بايلانىستى ءبىز 2018 جىلدى «جاپپاي كاسىپكەرلىكتى دامىتۋ جىلى» ەتىپ جاريالاۋ تۋرالى شەشىم قابىلدادىق »,- دەدى قىرىمبەك كوشەرباەۆ.
وبلىس اكىمىنىڭ ورىنباسالارى مەن مەملەكەتتىك ورگانداردىڭ باسشىلارى ءوڭىر ەكونوميكاسىنىڭ نەگىزگى جەتىستىكتەرى مەن پروبلەمالارى تۋرالى ايتىپ بەردى.
ءوز كەزەگىندە, اكادەميك اگانبەگيان ايماقتىڭ الەۋمەتتىك-ەكونوميكالىق دامۋ قارقىنىن جوعارى باعالادى.
«سوڭعى 5 جىل ىشىندە وتە اۋقىمدى جۇمىس جۇرگىزىلدى. ءبىز بىرنەشە ستراتەگيا جاساقتاۋعا قاتىستىق. ولاردىڭ ەشقايسىسى سىزدەردىكىندەي تابىستى جۇزەگە اسىرىلعان جوق»,-دەدى ابەل اگانبەگيان.
ابەل اگانبەگيان ايماق باسشىلىعى ەكونوميكانى ءارتاراپتاندىرۋدا دۇرىس شەشىم قابىلداعانىن اتاپ ءوتتى.
«ەڭ ماڭىزدىسى, وسى ورايدا وندەۋ ونەركاسىبىنە باسىمدىق بەرىلدى»,- دەدى اگانبەگيان.
«قىزىلوردا كۇندە وزگەرىپ جاتىر. مۇنى ءبىز ءار كەلگەن سايىن بايقاپ وتىرمىز. ەڭ باستىسى, وسىمەن توقتاپ قالماي, باستى سالالاردى دامىتۋ بويىنشا جۇمىس ىستەدى»,- دەدى اكادەميك.
قىزىلوردا وبلىسىنا جۇمىس ساپارى بارىسىندا ابەل اگانبەگيان مەن سەرگەي كالەندجيان قىزىلوردا قالاسى مەن شيەلى اۋدانىنداعى بىرقاتار وندىرىستىك جانە الەۋمەتتىك نىسانداردى ارالاپ, سىرداريانىڭ سول جاعالاۋىندا بوي كوتەرىپ جاتقان جاڭا قالانىڭ قۇرىلىسى مەن كاسىپكەرلىكتى قولداۋ ورتالىعىنىڭ جۇمىسىمەن تانىستى.