كەشە ۇكىمەت ۇيىندە پرەمەر-مينيستر باقىتجان ساعىنتاەۆتىڭ توراعالىعىمەن ينۆەستيتسيالىق احۋالدى جاقسارتۋ جونىندەگى كەڭەس وتىرىسى ءوتتى, دەپ حابارلادى پرەمەر-ءمينيستردىڭ ءباسپاسوز قىزمەتى.
وتىرىستا زياتكەرلىك مەنشىك قۇقىقتارىن قورعاۋ, سالىقتىق زاڭنامانى جەتىلدىرۋ جانە ينۆەستيتسيالىق داۋلاردى شەشۋدىڭ جاڭا قۇرالدارىن تابۋ باعىتتارى بويىنشا ەلدەگى ينۆەستيتسيالىق احۋالدى جاقسارتۋ تۇرعىسىنان «100 ناقتى قادام» ۇلت جوسپارىن ىسكە اسىرۋ بارىسى قارالدى.
تالقىلاۋعا ادىلەت ءمينيسترى مارات بەكەتاەۆ, امەريكا ساۋدا پالاتاسىنىڭ اتقارۋشى ديرەكتورى دوريس برەدبيۋري, اقش-تىڭ قازاقستانداعى ەلشىسى دجوردج كرول, ۇلىبريتانيانىڭ قازاقستانداعى ەلشىسى مايكل گيففورد, كانادانىڭ قازاقستانداعى ەلشىسى نيكولاس برۋسسو, ەو دەلەگاتسياسىنىڭ ساياسات جونىندەگى ءبولىم باسشىسى زولتان سزالاي, ەىدۇ قوعامدىق باسقارما ديرەكتورى ماركوس بونتۋري, Deloitte حالىقارالىق سالىق, ەنەرگەتيكا جانە رەسۋرستار ماسەلەلەرى جونىندەگى سەرىكتەسى ەنتوني مەحون, Baker & McKenzie سەرىكتەستەرى كيورتيس ماستەرس پەن اندرەي ەرش, White & Case Kazakhstan باسقارۋشى سەرىكتەسى ماكسيم تەلەمتاەۆ, Coca-Cola Almaty Bottlers باس مەنەدجەرى احمەت ەرتين قاتىستى.