كەيىپكەرلەرىمىز ساۋلەن وتباسىنان ءتورت ىزدەنۋشى شىعىپ وتىر. ۇلكەنى اقسۇڭقار – حالىقارالىق دەڭگەيدەگى قارجى جانە ەكونوميكا سالاسىنىڭ مامانى. ول 2015 جىلى قىتايدىڭ بەدەلدى وقۋ ورىندارىنىڭ ءبىرى – شانحاي قارجى جانە ەكونوميكا ۋنيۆەرسيتەتىندە ءبىلىم الدى. كوپ وتپەي فرانتسياداعى اتاقتى «Université Paris 1 Panthéon-Sorbonne» ۋنيۆەرسيتەتىندە ەكونوميكا ماماندىعى بويىنشا ماگيستر دارەجەسىن الدى. ەڭبەك جولىن 2016 جىلى «Kazakh Invest» ۇلتتىق كومپانياسىندا باستاپ, شەتەلدەن ينۆەستيتسيا تارتۋ باعىتىندا قىزمەت اتقاردى. ال 2019 جىلدان 2025 جىلعا دەيىن «استانا» حالىقارالىق قارجى ورتالىعىنىڭ اكىمشىلىگىندە ەكونوميست, ءبولىم باسشىسى جانە ينۆەستيتسيا تارتۋ مامانى رەتىندە جۇمىس ىستەپ, ەل ەكونوميكاسىنا حالىقارالىق كاپيتال تارتۋ ىسىنە ۇلەس قوستى.
ساۋلەن وتباسىنداعى ەكىنشى جاس مامان – حاقنازار. ول 2015–2020 جىلدارى نازارباەۆ ۋنيۆەرسيتەتىندە روبوتتەحنيكا جانە مەحاترونيكا ماماندىعى بويىنشا ءبىلىم الدى. تەحنولوگياعا دەگەن قىزىعۋشىلىعىن تەرەڭدەتۋ ماقساتىندا اۋسترالياداعى «Torrens University»-دە IT سالاسى بويىنشا ماگيستراتۋرانى اياقتادى. قازىر ول اۋستراليانىڭ بريسبەن قالاسىندا اقپاراتتىق تەحنولوگيالار سالاسىندا جۇمىس ىستەپ, حالىقارالىق IT-يندۋسترياسىندا تاجىريبە جيناپ ءجۇر. ونىڭ كاسىبي جولى – قازاق جاستارىنىڭ الەمدىك تەحنولوگيالىق كەڭىستىككە ەركىن قانات سەرمەپ جاتقانىن كورسەتەدى.
ايداناق – حالىقارالىق تاجىريبەسى مول جاس كاسىپكەر. ول نازارباەۆ زياتكەرلىك مەكتەبىنىڭ تۇلەگى رەتىندە ءبىلىم جولىن باستاپ, كەيىن نازارباەۆ ۋنيۆەرسيتەتىندە الەۋمەتتانۋ جانە ەكونوميكا ماماندىعى بويىنشا باكالا-ۆريات ءبىتىردى. ستۋدەنتتىك كەزەڭنەن حالىقارالىق جوبالارعا قاتىسىپ, 2018–2020 جىلدارى اقش-تاعى «Southwestern Advantage» كومپانياسىندا ماركەتينگ سالاسىندا جۇمىس ىستەدى. وسى باعدارلاما اياسىندا توعىز ەلدە وتكەن شاراعا ەلىمىز اتىنان قاتىسىپ, كاسىبي تاجىريبەسى مەن بىلىكتىلىگىن كورسەتتى. كەيىن حالىقارالىق «Eskimi Adtech» تەحنولوگيالىق كومپانياسىندا ماركەتينگ جانە بيزنەس اناليتيكا سالاسىندا ەڭبەك ەتىپ, 2023 جىلدان باستاپ جەكە كومپانياسىن دامىتىپ كەلەدى.
وتباسىنداعى ەڭ جاس مامان نارتەگىندى بىلىمگە قۇشتار جاڭا بۋىن وكىلى دەۋگە بولادى. ول 2019–2025 جىلدارى نازارباەۆ زياتكەرلىك مەكتەبىندە ءبىلىم الىپ, ماتەماتيكا ءپانى بويىنشا وليمپيادالاردىڭ جۇلدەگەرى اتاندى. 2025 جىلى نازارباەۆ ۋنيۆەرسيتەتىنە باكالاۆريات باعدارلاماسىنا وقۋعا ءتۇسىپ, بولاشاق عىلىمي جولىنىڭ العاشقى قادامىن جاسادى. ءبىر ءسات بۇل وتباسىنداعى جاس ىزدەنۋشىلەرگە نازار سالساق, ولاردىڭ بىلىمگە قۇشتارلىعى, حالىقارالىق تاجىريبەسى مەن ءوز ءبىلىمىن قوعام يگىلىگىنە جۇمساۋعا دەگەن جاۋاپكەرشىلىگى ماداقتاۋعا تۇرارلىق.