پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ەنەرگەتيكا مينيسترلىگىنىڭ كەڭەيتىلگەن القا وتىرىسى ءوتتى. وعان پرەزيدەنت اكىمشىلىگى, ۇكىمەت اپپاراتى وكىلدەرى, پارلامەنت دەپۋتاتتارى, ەنەرگەتيكا مينيسترلىگىنىڭ باسشىلىعى, ۇلتتىق كومپانيالار مەن ۆەدومستۆولىق باعىنىستى ۇيىمدار قاتىستى.
رومان سكليار ءوز سوزىندە الداعى رەسپۋبليكالىق رەفەرەندۋم مەملەكەتتىك دامۋ نەگىزدەرىن جاڭارتۋدىڭ ماڭىزدى كەزەڭىن بەلگىلەيتىنىن اتاپ ءوتتى. كەڭ قوعامدىق پىكىرتالاس بارىسىندا قالىپتاسقان نەگىزگى زاڭ جوباسى مەملەكەتتىك ينستيتۋتتاردىڭ جاۋاپكەرشىلىگىنىڭ جوعارى ستاندارتتارىن بەلگىلەيدى.
«ەنەرگەتيكالىق قاۋىپسىزدىك جانە تابيعي رەسۋرستاردى ۇتىمدى پايدالانۋ سالالىق مىندەتتەرگە عانا ەمەس, سونىمەن قاتار ەل دامۋىنىڭ جاڭا كونستيتۋتسيالىق مودەلىنىڭ ەلەمەنتتەرىنە اينالىپ كەلەدى. بۇل جاعدايدا نەگىزىنەن شيكىزات مودەلىنەن تەرەڭ وڭدەۋگە جانە جوعارى قوسىلعان قۇندى قۇرۋعا كوشۋ قاجەت», دەدى ر.سكليار.
رومان سكليار ەنەرگەتيكا جانە مۇناي-گاز سالاسىنداعى جۇمىستىڭ باسىم باعىتتارىن بەلگىلەدى. نەگىزگى مىندەتتەر – گەولوگيالىق بارلاۋدى دامىتۋ, كومىرسۋتەكتەردىڭ رەسۋرستىق بازاسىن تولىقتىرۋ, وتاندىق قۇرامنىڭ ۇلەسىن ۇلعايتۋ, سونداي-اق مۇناي وڭدەۋدى كۇشەيتۋ. وسىعان بايلانىستى جاڭا مۇناي وڭدەۋ زاۋىتى ء(موز) قۇرىلىسىنىڭ تەحنيكالىق-ەكونوميكالىق نەگىزدەمەسىن ازىرلەۋگە جانە جۇمىس ىستەپ تۇرعان زاۋىتتاردى كەڭەيتۋگە كىرىسۋ مىندەتتەلدى.
اتىراۋ وبلىسىندا پوليەتيلەن زاۋىتىن سالۋ, پاۆلوداردا الكيلات ءوندىرۋ جونىندەگى جوبالار, سونداي-اق قايتا وڭدەۋ مەن ەنەرگەتيكالىق تاۋەلسىزدىكتىڭ ورنىقتى ءوسۋىن قامتاماسىز ەتۋ ءۇشىن «مۇناي-گاز-حيميا ونەركاسىبى تۋرالى» زاڭ جوباسىن قابىلداۋ ەرەكشە باقىلاۋدا تۇر.
ەنەرگيالىق رەسۋرستارعا ارتىپ كەلە جاتقان سۇرانىستى جابۋ ماقساتىندا بيىل قۋاتتىلىعى 1 ملرد تەكشە مەتر بولاتىن قاشاعانداعى ءموز-ءدى ىسكە قوسۋ, جاڭاوزەندەگى ءموز قۇرىلىسىن 2027 جىلدىڭ سوڭىنا دەيىن اياقتاۋ جانە «بەينەۋ – بوزوي – شىمكەنت» گاز قۇبىرىنىڭ ەكىنشى جەلىسىنىڭ جۇزەگە اسىرىلۋىن قاداعالاۋ مىندەتى قويىلدى.
سونداي-اق تۇركىستانداعى بۋ-گاز قوندىرعىسى جوبالارىن اياقتاۋدى, الماتىداعى جەو-2 مەن جەو-3-ءتى جاڭعىرتۋدى, سونداي-اق باتىس ەنەرگەتيكالىق ايماعىن ەلدىڭ بىرىڭعاي ەلەكتر ەنەرگەتيكالىق جۇيەسىمەن بىرىكتىرۋدى قوسا العاندا, جاڭا گەنەراتسيالاۋشى قۋاتتاردى جەدەل ەنگىزۋگە جانە جۇمىس ىستەپ تۇرعان ستانسالاردى جاڭعىرتۋعا باسا نازار اۋدارىلدى.
كومىر گەنەراتسياسىن دامىتۋ, ەنەرگيا نىساندارىنىڭ تسيفرلىق ەگىزدەرىن ەنگىزۋ ارقىلى سالانى ترانسفورماتسيالاۋ, مۇناي بازالارىن مۇناي ونىمدەرىنىڭ كولەڭكەلى اينالىمىن بولدىرماۋ ماقساتىندا بىرىڭعاي جۇيەگە ينتەگراتسيالاي وتىرىپ, ەسەپتەۋ اسپاپتارىمەن جاراقتاندىرۋ جونىندەگى ۇلتتىق جوباعا ەرەكشە ءمان بەرىلدى.
جيىندى قورىتىندىلاي كەلە رومان سكليار ەنەرگەتيكا مينيسترلىگى كۇش-جىگەردى ەلدىڭ ەنەرگەتيكالىق تاۋەلسىزدىگىن قامتاماسىز ەتۋگە, ينۆەستيتسيالىق جوبالاردىڭ جۇزەگە اسىرىلۋىن قاتاڭ باقىلاۋ قاجەتتىلىگىنە جۇمىلدىرۋى قاجەت ەكەنىن اتاپ ءوتتى. ويتكەنى وتىن-ەنەرگەتيكالىق كەشەندى دامىتۋ – مەملەكەتتىڭ جاڭا ەكونوميكالىق ۇلگىسىنىڭ نەگىزى سانالادى.