اقش-تىڭ بۇۇ-داعى تۇراقتى وكىلى نيككي حەيلي بۇۇ قاۋىپسىزدىك كەڭەسىنىڭ قازاقستاننىڭ باستاماسىمەن ءوتىپ وتىرعان جاپپاي قىرىپ-جويۋدى تاراتپاۋ جونىندەگى وتىرىسىنىڭ ماڭىزدىلىعىن اتاپ ءوتتى.
«قازاقستاننىڭ وسى ءبىر ماڭىزدى وتىرىستى ۇيىمداستىرعانى ورىندى. قازاقستاننىڭ تاۋەلسىز مەملەكەت رەتىندەگى العاشقى شەشىمدەرىنىڭ ءبىرى يادرولىق قارۋدى تاراتپاۋ تاريحىنداعى ماڭىزدى ساتتەردىڭ ءبىرى بولىپ وتىر. كەڭەس وداعى ىدىراعان سوڭ قازاقستان ەرىكتى تۇردە كەڭەستىك يادرولىق زىمىرانداردى ءوز تەرريتورياسىنان الىپ تاستاۋعا كەلىسىپ, يادرولىق قارۋدى تاراتپاۋ تۋرالى شارتقا قوسىلدى» دەپ باستادى ءوزىنىڭ مالىمدەمەسىن نيككي حەيلي.
«يادرولىق قارۋدان باس تارتۋ ارقىلى پرەزيدەنت نازارباەۆ الەمنىڭ وزگە ەلدەرىنە ۇلگى كورسەتتى. بۇل ارەكەت سەنىمدىلىك تۋدىردى. وسى ارقىلى قازاقستان كورشى ەلدەرگە جانە دۇنيە جۇزىنە قاۋىپ توندىرمەيتىنىن جەتكىزدى. بۇل يادرولىق قارۋدى تاراتپاۋدىڭ جاھاندىق نەگىزى سانالاتىن يادرولىق قارۋدى تاراتپاۋ تۋرالى شارتقا سەنىمدىلىك داۋىسى ەدى», دەپ اتاپ وتكەن اقش وكىلى «ەڭ ماڭىزدىسى, قازاقستاننىڭ ءىس-قيمىلدارى بۇل ەلدىڭ وزگە مەملەكەتتەرمەن قارىم-قاتىناسىندا بەيبىتشىلىك پەن تۇراقتىلىقتى باعالايتىندىعىن ءبىلدىردى. ءسوزسىز, بۇل قازاقستاننىڭ ۇلتتار قاۋىمداستىعىنىڭ جاۋاپتى مۇشەسى بولۋعا دايىندىعىن كورسەتتى», دەگەن پىكىر ايتتى.
ەسكە سالا كەتەيىك, قازاقستان پرەزيدەنتى نۇرسۇلتان نازارباەۆ وسى كۇندەرى اقش-تا رەسمي ساپاردا. ەكى كۇن بۇرىن مەملەكەت باسشىسى اقش پرەزيدەنتى دونالد ترامپپەن كەزدەسكەن بولاتىن. بۇگىن ول بۇۇ قك جينالىسىنا توراعالىق ەتتى. وسى جىلدىڭ 1 قاڭتارىنان باستاپ قازاقستان بۇۇ قك توراعالىعىنا كىرىستى. قازاقستان – ورتالىق ازيا ەلدەرى اراسىندا بۇۇ قك تۇراقسىز مۇشەسى اتانعان تۇڭعىش ءارى جالعىز مەملەكەت.