قازاقستان رەسپۋبليكاسى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ شەشىمىمەن دزيۋدودان قازاقستان ۇلتتىق ەرلەر قۇراما كومانداسىنا جاڭا جاتتىقتىرۋشى كەلدى. ەندى ەرلەر ۇلتتىق قۇراما كومانداسىنىڭ ايدىن سماعۇلوۆ باپتايتىن بولادى.
1976 جىلى الماتى وبلىسىندا دۇنيەگە كەلگەن ايدىن سماعۇلوۆ دزيۋدودان قازاقستان رەسپۋبليكاسىنىڭ ەڭبەك سىڭىرگەن سپورت شەبەرى, ەڭبەك سىڭىرگەن جاتتىقتىرۋشىسى, «داڭق» وردەنىنىڭ يەگەرى. دزيۋدودان بىرنەشە حالىقارالىق تۋرنيرلەردىڭ جەڭىمپازى.
باپكەرلىك قىزمەتىن 2005 جىلى الماتى وبلىسىنىڭ اعا جاتتىقتىرۋشىسى بولىپ باستاعان. 2008-2010 جىلدار ارالىعىندا قازاقستان جاستار قۇراماسىنىڭ اعا جاتتىقتىرۋشىسى, 2010-2012 جىلدارى «جاستار» سپورت كەشەنىندە ديرەكتوردىڭ ءبىرىنشى ورىنباسارى, 2012-2017 جىلدار ارالىعىندا قازاقستان ۇلتتىق قۇراما كومانداسىندا جاتتىقتىرۋشى قىزمەتىن اتقارعان. سونىمەن قاتار, ايدىن سماعۇلوۆ 2000 جىلى قىرعىز رەسپۋبليكاسى ساپىندا سيدنەيدە وتكەن جازعى وليمپيادا ويىندارىنا قاتىسىپ, قولا جۇلدەگە يە بولعان.
دزيۋدودان قازاقستان قۇراماسىن 2012-2017 جىلدار ارالىعىندا ەرمەك يمامبەكوۆ جاتتىقتىرعان. ەستەرىڭىزگە سالا كەتسەك, ەرمەك يمامبەكوۆ تۇسىندا قازاقستان ەرلەر قۇراماسى جازعى وليمپيادا ويىندارىنان ءبىر كۇمىس, الەم چەمپيوناتىندا ءبىر التىن, ەكى كۇمىس, ازيا ويىندارىندا ءبىر التىن, ءبىر كۇمىس, ءبىر قولا جانە كوماندالىق جارىس بويىنشا ءبىر كۇمىس مەدالعا قول جەتكىزگەن بولاتىن.
«ماقساتىمىز – قازاقستاندىق دزيۋدوشىلاردىڭ ازيا ويىندارىندا, ازيا جانە الەم چەمپيوناتتارى مەن وليمپيادا ويىندارىندا ناتيجەلى كۇرەس كورسەتىپ, ۇلكەن جەتىستىكتەرگە قول جەتكىزۋ. وسىنداي ماقساتتا باپكەرلەر قۇرامى ۇلتتىق قۇراماداعى دزيۋدوشىلاردىڭ جاتتىعۋىن ءجىتى قاداعالاپ, دزيۋدودان ۇزدىك مەملەكەتتەر قاتارىندا تۇرۋ ءۇشىن ايانباي جۇمىس ىستەيمىز, دەيدى قازاقستان ۇلتتىق قۇراما كومانداسىنىڭ جاڭا باس جاتتىقتىرۋشىسى ايدىن سماعۇلوۆ.