ەلىمىزدىڭ ۇزدىك جوو وقىتۋشىلارىنىڭ ونلاين-دارىستەرىنەن ءبىلىم العىسى كەلەتىن بارلىق ازاماتقا ارنالعان «قازاقستاننىڭ اشىق ۋنيۆەرسيتەتى» – OpenU.kz ءبىلىم بەرۋ پلاتفورماسىنىڭ دارىستەرىن 1000-نان استام ادام تىڭداعان.
وتكەن جىلى «ۇلتتىق اۋدارما بيۋروسى» قوعامدىق قورى (بۇرىنعى WikiBilim) مەن «كسەلل» اق قۇرعان «قازاقستاننىڭ اشىق ۋنيۆەرسيتەتى» بىرلەسكەن بىرەگەي جوباسى ەلىمىزدىڭ ق.ساتباەۆ اتىنداعى قازۇتزۋ, قبتۋ, AlmaU, SDU, ماتەماتيكا جانە ماتەماتيكالىق مودەلدەۋ ينستيتۋتى سياقتى جەتەكشى جوعارعى وقۋ ورىندارىمەن سەرىكتەستىك ورناتا وتىرىپ, قازاقستاندا مەملەكەتتىك تىلدەگى اشىق ونلاين ءبىلىم بەرۋدى دامىتۋدى قولعا العان بولاتىن. «ۇلتتىق اۋدارما بيۋروسى» قق اتقارۋشى ديرەكتورى راۋان كەنجەحانۋلى, «ۇلتتىق اۋدارما بيۋروسى» قق جوبالار جەتەكشىسى اينۇر ساتەكوۆا, «كسەلل» اق كوممۋنيكاتسيالار ءبولىمىنىڭ جەتەكشىسى ناتاليا ەسكوۆا تىلشىلەرمەن تاڭعى شاي تۇرىندە وتكەن ارنايى باسقوسۋدا اتالمىش جوبا جۇمىسى باستالعان توعىز اي ىشىندەگى اتقارىلعان جۇمىستارعا كەڭىنەن توقتالدى.
بۇگىنگى كۇنگە دەيىن OpenU.kz ءبىلىم بەرۋ ونلاين-پلاتفورماسىنا تىركەلگەن تىڭداۋشىلاردىڭ سانى 1013 ادامعا جەتكەنىن جەتكىزگەن «ۇلتتىق اۋدارما بيۋروسى» قق اتقارۋشى ديرەكتورى راۋان كەنجەحان ۇلىنىڭ ايتۋىنشا, جوبا قازاقستاندىقتاردىڭ عىلىمي-تەحنيكالىق سالالار مەن نارىققا قاجەتتى باسقا دا ماماندىقتار بويىنشا تەگىن ءبىلىم الۋىنا جاعداي جاساپ وتىر. ء«بىزدىڭ «كەز كەلگەن ادامعا اشىق ساپالى ءبىلىم» دەگەن ميسسيامىزدى OpenU ءدال ايقىنداپ بەرەدى. اشىق ۋنيۆەرسيتەت پلاتفورماسىن جاساۋ قارا باستىڭ قامى ەمەس, ول – ءبىلىمنىڭ ساپاسى مەن قولجەتىمدىلىگىن قامتاماسىز ەتەتىن, كۇن سايىن جاقسارا تۇسەتىن, اشىق بولا تۇسەتىن قۇرال. ءبىزدىڭ وسى باستامامىزعا تۇسىنىستىك تانىتىپ, قولداۋ كورسەتكەن «كسەلل» كومپانياسىنا العىسىمىزدى ايتامىز», دەدى راۋان كەنجەحان ۇلى.
«قازاقستاننىڭ اشىق ۋنيۆەرسيتەتى» ءبىلىم بەرۋ ونلاين-پلاتفورماسىندا ماتەماتيكا, فيزيكا, ينفورماتيكا سياقتى ءىرى عىلىم سالالارىمەن بىرگە, بيزنەستى جوسپارلاۋ مەن باسقارۋ, web-باعدارلامالاۋ, اۆتوماتتاندىرىلعان قۇرىلعىلار جاساۋ, باعدارلاما تىلىمەن كۇردەلى تەحنولوگيالاردى مودەلدەۋ جانە قۇراستىرۋ سياقتى ءىت سالاسىنىڭ كاسىبي ماماندارىنا ارنالعان دارىستەردى تابۋعا بولادى دەگەن قۇراستىرۋشىلار 80 پايىزعا جۋىعى قازاق تىلىندەگى بىرەگەي ونلاين-كونتەنتتىڭ تىركەلگەن تىڭدارمانى كوپ دارىستەرى قاتارىندا «Java تىلىندەگى كومپيۋتەر عىلىمدارىنا كىرىسپە», «Web-باعدارلامالاۋ نەگىزدەرى», «روبوت تەحنيكاسى» كۋرستارىن اتاپ ءوتتى. شالعاي اۋىلدىق جەرلەردە ورنالاسقان جاستار مەن مۇمكىندىگى شەكتەۋلى جاندار ءۇشىن تاپتىرماس ءبىلىم كوزى بولىپ سانالار بۇل ونلاين-وقۋ ورنى, ياعني «قازاقستاننىڭ اشىق ۋنيۆەرسيتەتى» جوباسىنا ق.ي.سəتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى (قازۇزتۋ), قازاقستان-بريتان تەحنيكالىق ۋنيۆەرسيتەتى (قبتۋ), الماتى مەنەدجمەنت ۋنيۆەرسيتەتى (AlmaU), س.دەميرەل اتىنداعى ۋنيۆەرسيتەت (SDU), ماتەماتيكا جانە ماتەماتيكالىق مودەلدەۋ ينستيتۋتى سياقتى وزىق جوعارى وقۋ ورىندارى سەرىكتەس بولعان. اتالعان وقۋ ورىندارىندا قىزمەت ەتەتىن اسقار جۇمادىلداەۆ, ارمان سۇلەيمەنوۆ, اسەل ارىن, ارداق شالقاربايتەگى سىندى كوپتەگەن بىلىكتى وقىتۋشىلار مەن ءىت سالاسىنىڭ جەتەكشى ماماندارى دارىستەر وقىپ, قاجەتتى ۆيدەوماتەريالداردى جاساۋعا اتسالىسىپ, قولداۋ كورسەتكەن.
ۇيىمداستىرۋشىلارىنىڭ ايتۋىنشا, ونلاين كۋرستاردىڭ اشىلۋى ينتەرنەت-تەحنولوگيا قارقىندى دامىپ جاتقان قازىرگى قوعام تاراپىنان اسا جىلى قابىلدانىپ, وقۋشىلار سانى جىلدام ارتا تۇسكەن جوبا ۇلتتىق ءبىلىم بەرۋ پلاتفورماسى رەتىندە قابىلدانعان.
«قازاقستاندىقتاردىڭ OpenU.kz-ءتى كوپتەپ قولدانا باستاعانىنا قۋانىشتىمىز. بۇل كورسەتكىش وسى پلاتفورماعا ورنالاستىرىلعان كۋرستار شىن مانىندە سۇرانىسقا يە جانە پايدالى دەگەندى بىلدىرەدى. كوپشىلىكتى مەملەكەتتىك تىلدەگى تەگىن ءىت كونتەنتكە قىزىقتىرعانىن اتاپ وتكىم كەلەدى. دەمەك, جوبا ۇدەدەن شىقتى جانە قازاقستاندىقتار اشىق digital-پلاتفورمالار ارقىلى ءبىلىم الۋعا دايىن. الەۋمەتتىك جاۋاپكەرشىلىك ستراتەگياسىن ىسكە اسىرۋدىڭ باسىم باعىتتارىنىڭ ءبىرى قوعامنىڭ بارلىق مۇشەسىنىڭ ءبىلىم الۋىنا مۇمكىندىك ۇسىنۋ بولعاندىقتان «كسەلل» بۇل جوبانى ودان ءارى قولداي بەرمەك», دەدى «كسەلل» اق كوممۋنيكاتسيالار ءبولىمىنىڭ جەتەكشىسى ناتاليا ەسكوۆا.
OpenU.kz پلاتفورماسى الەمنىڭ قوس جەتەكشى جوعارعى وقۋ ورنى – گارۆارد ۋنيۆەرسيتەتى مەن ماسساچۋسەتس تەحنولوگيا ينستيتۋتى جاساعان اشىق باستاپقى كودى بار باعدارلاما – Open edX بازاسىندا قۇرىلعان. جىل بويى وقىلعان دارىستەر پلاتفورمانىڭ جاڭارتىلعان نۇسقاسىنا ورناتىلىپ, كەلەشەكتە دە قولدانۋشىلار كادەسىنە جاراي بەرمەك. قازىرگى ۋاقىتتا پورتالدان «اقپاراتتى تاراتۋ جۇيەسى», «بيزنەس-جوسپارلاۋ», «Java تىلىندەگى كومپيۋتەر عىلىمدارىنا كىرىسپە», «ماتريتسالار جانە انىقتاۋىشتار», «مەملەكەتتىك-جەكەشەلىك ارىپتەستىك», «روبوتوتەحنيكا», «فۋرە تالداۋى», «Python تiلiندە باعدارلامالاۋ نەگiزدەرi», «Scratch باعدارلامالاۋ تىلىمەن انيماتسيا جانە ويىن قۇرۋ», «Web-باعدارلامالاۋ نەگىزدەرى» اتتى 10 كۋرستى تىڭداۋعا بولادى.
«قازاقستان اشىق ۋنيۆەرسيتەتى» الداعى ۋاقىتتا قالاي داميدى دەگەن سۇراققا كەلسەك, «رۋحاني جاڭعىرۋ» باعدارلاماسى اياسىندا «گۋمانيتارلىق ءبىلىم – قازاق تىلىندەگى 100 جاڭا وقۋلىق» جوباسى قولعا الىنعانى, ولاردى وزگە تىلدەردەن اۋدارىپ دايىنداۋ مىندەتى ۇلتتىق اۋدارما قورىنا جۇكتەلگەنى بەلگىلى. بىلتىردان بەرى ەلىمىزدەگى ەڭ بىلىكتى ماماندار جۇمىلا كىرىسىپ, اۋدارىپ شىققان 18 وقۋلىق الداعى وقۋ جىلى جوعارى وقۋ ورىندارىنىڭ قولىنا تيەتىن بولادى. بيىل تاعى 30 وقۋلىق اۋدارۋعا كىرىسىپ كەتتىك. «رۋحاني جاڭعىرۋ» باعدارلاماسى اياسىندا اۋدارىلعان سول وقۋلىقتاردىڭ ءبارى قوسىمشا وقۋلىقتار رەتىندە بىرتىندەپ وسى ونلاين-كۋرس پلاتفورماسىنىڭ قورىنا سالىنىپ وتىرماق. الداعى 3-4 جىل ىشىندە ءبىزدىڭ قورىمىز اۋدارىپ جاتقان 100 جاڭا وقۋلىقتىڭ نەگىزىندە «قازاقستان اشىق ۋنيۆەرسيتەتىندە» اۋقىمدى 100 جاڭا ونلاين-كۋرس اشىلاتىن بولادى. مىسالى, گارۆارد ۋنيۆەرسيتەتىنىڭ 850 بەتتەن تۇراتىن مەنەدجەمەنت وقۋلىعىنىڭ ءوزى ءبىر كۋرستىڭ جۇگى بولماق. سول سياقتى, قازاق تىلىندەگى فيلوسوفيا, الەۋمەتتانۋ, كاسىپكەرلىك, مەنەدجەمەنت سياقتى ءىرى باعىتتار دا الەمدىك وزىق وقۋلىقتارمەن قامتىلاتىن كۇن الىس ەمەس», دەپ اتاپ ءوتتى راۋان كەنجەحان ۇلى.
كەز كەلگەن ازاماتتىڭ كەز كەلگەن جەردە وتىرىپ ەلىمىزدىڭ الدىڭعى قاتارلى ۇزدىك پروفەسسورلارىنىڭ, ءتىپتى شەتەلدىك عالىمداردىڭ دارىستەرىن تەگىن تىڭداي الۋى, البەتتە, جاڭا زامان تالابىنا ساي بولۋعا ۇمتىلعان ازاماتتار ءۇشىن قولجەتىمدى مۇمكىندىك, اشىق ءبىلىم الۋ كوزى ەكەنى انىق. OpenU پلاتفورماسى ءوز كەزەگىندە وبلىستىق, ايماقتىق دەڭگەيدەگى وقۋ ورىندارى ستۋدەنتتەرىنىڭ دە ءبىلىمىن تولىقتىرا تۇسۋگە سەپتىگىن تيگىزبەك. ال «قازاقستان اشىق ۋنيۆەرسيتەتىنە» سەرىكتەس بولعان جوعارىدا اتالعان وقۋ ورىندارىنىڭ ستۋدەنتتەرى كەيبىر پاندەردى پلاتفورمادا وتىلەتىن ساباقتار بويىنشا وقي الادى دەيدى ماماندار. مۇنداي ءادىس ستۋدەنتتىڭ وتكەن تاقىرىپقا ءوز بەتىنشە دايىندالىپ, ىزدەنۋىنە, تۇسىنبەگەن تۇستارىن قايتا قاراۋ ارقىلى جەتە مەڭگەرىپ الۋىنا جاعداي تۋدىرسا, ونلاين-ءدارىس وقيتىن وقىتۋشىلار تاقتا الدىندا ۇزاق تۇرۋ قاجەتتىلىگىنەن ارىلىپ, سونىمەن قاتار, ستۋدەنتكە بەرەتىن اقپاراتتى از عانا ۋاقىت ىشىندە قىسقا دا نۇسقا ەتىپ جەتكىزۋدى داعدىعا اينالدىرۋىنا مۇمكىندىك بەرمەك.
«قازىر كۇن سايىپ جاڭارىپ, جەتىلىپ جاتقان سوڭعى ۇلگىدەگى سمارتفوندار مەن جىلدام ينتەرنەت مۇمكىندىگى قولدا تۇرعان XXI عاسىر زامانىندا مۇنداي كۋرستاردىڭ جاستارعا اسا قاجەت ەكەنى بەلگىلى. وكىنىشكە قاراي, وقىتۋشىلاردىڭ باسىم بولىگى ءالى دە بولسا وسىنداي ونلاين-كۋرستاردان نەمەسە جاڭا ادىستەردەن قورقاقتاپ, بويلارىن اۋلاق سالۋعا تىرىسادى. بىراق ونلاين-ءبىلىم بەرۋ پلاتفورمالارى «مۇعالىم كەرەك ەمەس» دەگەندى بىلدىرمەيتىنىن, كەرىسىنشە, ءبىلىم الۋشىلاردىڭ وقۋعا دەگەن ىنتاسىن ارتتىراتىن جاڭا مۇمكىندىك كوزى ەكەنىن وقىتۋشىلار قاۋىمىنا كوپتەپ ءتۇسىندىرۋ قاجەت» ەكەنىن ايتتى «ۇلتتىق اۋدارما بيۋروسى» قق جوبالار جەتەكشىسى ا.ساتەكوۆا.
ەلباسىنىڭ بيىلعى قازاقستان حالقىنا جولداۋىندا ايرىقشا توقتالىپ وتكەن ءبىلىم بەرۋدىڭ جاڭا ساپاسىن, تسيفرلىق ءبىلىم بەرۋ رەسۋرستارىن دامىتۋ باعىتىندا قولعا الىنىپ جاتقان العاشقى جوبالاردىڭ ءبىرى دەۋگە تۇراتىن مۇنداي ونلاين-ءبىلىم بەرۋ پلاتفورمالارى قولىنا الدىمەن قالام-داپتەر ەمەس, سمارتفون ۇستاپ ساۋات اشىپ جاتقان كەيىنگى ۇرپاق ومىرىندە ايرىقشا ءرول اتقاراتىن ماڭىزدى فاكتورعا اينالارى حاق.
ميرا بايبەك,
«ەگەمەن قازاقستان»
الماتى