اقتوبە ايماعىندا اۋىل شارۋاشىلىعى وندىرىستىك كووپەراتيۆتەرىنىڭ قىزمەتى جاڭا ساپالىق كەزەڭگە اياق باستى. ونىڭ باستى كورىنىسى مۇندا اۋىل شارۋاشىلىعى ونىمدەرىن وڭدەيتىن شاعىن ءوندىرىس ورىندارىنىڭ اشىلا باستاۋى.
وسىنداي ءسۇت وڭدەيتىن شاعىن تسەحتىڭ ءبىرى قوسەستەك اۋىلىندا ىسكە قوسىلدى. ونى ەركىن وتەگەنوۆ جەتەكشىلىك جاسايتىن «قوسەستەك» اۋىل شارۋاشىلىعى وندىرىستىك كووپەراتيۆى جۇزەگە اسىردى.
بۇل ءۇشىن كووپەراتيۆ مۇشەلەرى ءوزارا كەڭەسە كەلىپ, ەڭ الدىمەن ءتيىستى ينفراقۇرىلىمدىق جۇيە جاساقتاۋ قاجەت دەگەن ورتاق ۇيعارىمعا كەلەدى. اتاپ ايتقاندا الداعى ۋاقىتتا سالىناتىن شاعىن وڭدەۋ نىسانى ءۇشىن ەلەكتر جەلىسى تارتىلادى. بۇدان سوڭ گاز, سۋ جانە كارىز جۇيەلەرى ىسكە قوسىلادى. كەلەسى كەزەكتە اۋىزبىرشىلىگى مەن ىنتىماعى جاراسقان اۋىل ازاماتتارى قۋاتتىلىعى اۋىسىمىنا ءبىر توننا شيكىزاتتى وڭدەپ, بۇدان ءازىر ءونىم شىعارا الاتىن قۇرال-جابدىقتار ساتىپ الۋعا قول جەتكىزەدى.
ءسويتىپ, «قوسەسكەك» اۋىلشارۋاشىلىعى وندىرىستىك كووپەراتيۆى بۇگىنگى كۇنى سۇتتەن قايماق, سۇزبە, ماي وندىرۋگە مۇمكىندىك الدى.
– قازىرگى كۇنى ءبىز ءۇشىن ەڭ باستىسى شيكىزات ءوندىرۋ كولەمىن كەمىتىپ الماۋ. ماسەلەن وتكەن جىلى ءبىز تۇرعىنداردان 300 توننا ءسۇت قابىلداپ العان ەدىك. بۇگىنگى مەجە وسى مولشەردەن تومەندەمەي, ونى ءسۇت وڭدەۋ تسەحىنا تاپسىرۋ, - دەيدى egemen.kz تىلشىسىنە كووپەراتيۆ توراعاسى ەركىن وتەگەنوۆ.
ولاردىڭ بۇگىنگى العا قويعان ماقساتتارى مەن ءىس-جوسپارلارى دا ومىرشەڭ. سونىڭ ىشىندە قوسەستەكتىكتەر بۇرىنعى جىلدارى جەرگىلىكتى ماي زاۋىتىنا شىعارىلعان ىرىمشىكتىڭ ەرەكشە ءتۇرىن بۇگىنگى زامانداعى تەحنولوگيانىڭ كومەگىمەن قايتا جاڭعىرتۋدى كوزدەپ وتىر.
ء«بارىن ايت تا, ءبىرىن ايت, كوللەكتيۆتىڭ جىرىن ايت» دەپ توكپەكتەتكەن ەكەن باياعىدا جارىقتىق بي-اعاڭ, بەيىمبەت مايلين. وسى ولشەمگە «قوسەستەك» اۋىلشارۋاشىلىعى وندىرىستىك كووپەراتيۆى مۇشەلەرىنىڭ ىلكىمدى ءىس-قيمىلدارى دا ءدوپ كەلىپ تۇرعانداي.
تەمىر قۇسايىن
اقتوبە وبلىسى
قارعالى اۋدانى
قوسەستەك اۋىلى