بايلانىس قىزمەتىن كورسەتۋ ەرەجەسىنە جاڭا وزگەرتۋلەر ەنگىزىلۋىنە بايلانىستى وزەكتى ماسەلەلەر شەشىلەتىن بولدى. بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ Facebook پاراقشاسىندا حابارلادى.
ء«بىزدىڭ مينيسترلىك بايلانىس قىزمەتىن كورسەتۋ ەرەجەسىنە جاڭا وزگەرتۋلەر ەنگىزەدى. بۇل وزگەرتۋلەر ۇيالى بايلانىس ابونەنتتەرى كوپتەن بەرى ايتىپ جۇرگەن بىرقاتار پروبلەمانى شەشۋگە باعىتتالىپ وتىر.
قانداي كەلەڭسىزدىكتەر جويىلاتىنىنا تومەندە بىرقاتار مىسال كەلتىرىلگەن.
جاڭا ەرەجە بايلانىس وپەراتورلارىنا جەكە شوتتا قاراجات بولماعان جاعدايدا قىزمەت كورسەتۋگە توسقاۋىل قويىپ وتىر. بۇل - نەگىزىنەن روۋمينگ قىزمەتىنە قاتىستى. وسىلايشا, ءبىز ابونەنتتىك نومەردىڭ «مينۋس» بولۋىنىڭ, ياعني قارىز بولىپ قالۋىنىڭ الدىن الامىز.
سونداي-اق, بۇدان بىلاي اۋىستىرىلعان نومەرگە قوڭىراۋ شالۋ كەزىندە «beep» قوسۋ سيگنالىن ەرىكتەن تىس ورناتۋ پراكتيكاسى جويىلادى. ەندى شاقىرۋ سيگنالىنىڭ الدىندا قوسىمشا اكۋستيكالىق سيگنالدار مەن پاۋزالاردى ورناتۋ ابونەنتتىڭ وتىنىشىمەن عانا ىسكە اسادى.
سونىمەن قاتار, ابونەنتكە ussd كوماندا نەمەسە سمس جىبەرۋدى ەنگىزۋ ارقىلى قوسىمشا بايلانىس قىزمەتتەرىن تاڭۋ پروبلەماسى دا شەشىلدى. ەندى كلاۆيشتى قاتەلەسىپ باسۋ, كەزدەيسوق حابارلاما جىبەرۋ نەمەسە باسقا دا بايقاۋسىزدا بولعان ارەكەتتەر سالدارىنان قاجەتسىز قىزمەتتەرگە قوسىلىپ كەتپەيسىز.
جاقىن ۋاقىتتا قۇجاتتىڭ تولىق ءماتىنى باق-تا جاريالانادى, وسىدان كەيىن 10 كۇننەن سوڭ ول كۇشىنە ەنەدى», دەلىنگەن حابارلامادا.